ខេត្តព្រះសីហនុ ៖ ប្រជាពលរដ្ឋរស់នៅខេត្តព្រះសីហនុ ទាំងអ្នកមាននិងអ្នកក្រ បានសម្តែងភាពក្តៅ ក្រហាយយ៉ាងខ្លាំង ទៅលើចំណាត់ការរបស់លោក សូរ សុខ ឬ លូ សុខ ជាប្រធានសុរិយោដី និងសំណង់ខេត្តព្រះសីហនុ ដែលបានឆ្លៀតឱកាស យកគោលនយោបាយចាស់ សកម្មភាពថ្មីរបស់ប្រមុខរាជរដ្ឋាភិបាល ទៅធ្វើអាជីវកម្មកេងប្រវ័ញ្ចញើសឈាម ប្រជាពលរដ្ឋក្រីក្រយ៉ាងអយុត្តិធម៌បំផុត ហើយគេសង្ឃឹមថា ក្នុងអាណត្តិថ្មីនេះទំនងជាលោក សូ សុខ គ្មានវាសនាបន្តតំណែង ពុករលួយដុះស្លែទៀតទេ។
អតីតគ្រួសារខ្មែរក្រហម រស់នៅភូមិអន្លង់ក្រពើ បានបង្ហើបឲ្យដឹងថា កន្លងមកក្រុមនិស្សិត បានចុះទៅវាស់វែងដីធ្លីដើម្បីធ្វើ ប័ណ្ណកម្មសិទ្ធិជូនពួកគាត់ ប្រមាណ១០៥គ្រួសារ រួចរាល់អស់ហើយ ប៉ុន្តែមកដល់ពេលនេះ ពួកគាត់នៅមិនទាន់ទទួលបានប័ណ្ណកម្មសិទ្ធិ ស្របច្បាប់នៅឡើយទេ។ ប្រជាពលរដ្ឋបានលើកឡើងទៀតថា ក្រោយការចុះវាស់វែងដីធ្លី រួចរាល់ហើយនោះ គេសង្កេតឃើញមន្ត្រីសុរិយោដីរបស់លោក សូរ សុខ បានចុះទៅជួបជាមួយប្រជាពលរដ្ឋ ហើយកន្លែងខ្លះគេទារលុយត្រង់ៗតែម្តង បើប្រជាពលរដ្ឋមិនព្រម បង់លុយឲ្យពួកគេទេនោះ គឺមន្ទីរសុរិយោដីនិងសំណង់របស់លោក សូរ សុខ មិនខ្វល់ខ្វាយចេញប័ណ្ណកម្មសិទ្ធិឲ្យទេ។
សូម្បីតែប្រជាពលរដ្ឋ រស់នៅតំបន់ព្រែកទប់ រាប់រយគ្រួសារ ក៏បានប្រតិកម្មចំពោះ មន្ត្រីជំនាញសុរិយោដីរបស់លោក សូរ សុខ ដែលបានចុះទៅប្រមូលលុយ ពីប្រជាពលរដ្ឋថ្លៃធ្វើប័ណ្ណកម្មសិទ្ធិ បន្ទាប់ពីរាជរដ្ឋាភិបាលបានចេញគោលការណ៍ អនុញ្ញាតឲ្យប្រជាពលរដ្ឋនៅ តំបន់ព្រែកទប់ មានសិទ្ធិកាន់កាប់អាស្រ័យផលលើដីរបស់ពួកគេ ដោយស្របច្បាប់។ ប៉ុន្តែមកដល់ពេលនេះ ក៏មិនទាន់ទទួលបានប័ណ្ណកម្មសិទ្ធិ ស្របច្បាប់នៅឡើយដែរ មិនដឹងជាថ្ងៃណា ហើយនៅពេលឆាប់ៗនេះ ប្រជាពលរដ្ឋគ្រោងនាំគ្នាទៅសួរលោក សូរ សុខ ថាតើប័ណ្ណកម្មសិទ្ធិរបស់ពួកគាត់ ដែលបានបង់លុយរួចហើយនោះ ថ្ងៃណាទើបបានយកមកប្រើប្រាស់ជាផ្លូវការ។
ប្រជាពលរដ្ឋបានលួចបង្ហើបទៀតថា បើចង់បានប័ណ្ណកម្មសិទ្ធិ យកមកប្រើប្រាស់ប្រជាពលរដ្ឋ ទៅទំនាក់ទំនងជាមួយមន្ត្រីជំនាញ សុរិយាដីរបស់លោក សូ សុខ ហើយមានការតម្រូវ ឲ្យប្រជាពលរដ្ឋបង់លុយ ចាប់ពី ១២០០ដុល្លារ រហូតដល់រាប់ម៉ឺនដុល្លារ អាស្រ័យទៅតាមទំហំដីតូចឬធំ ហើយតម្លៃសេវាដ៏ខ្ពស់កប់ពពកបែបនេះ សម្រាប់តែដីនៅក្នុងក្រុង និងដីតាមទីប្រជុំជនស្រុក។ ក្នុងមន្ទីរសុរិយោដីខេត្តព្រះសីហនុ នាពេលបច្ចុប្បន្ននេះ មានប្រព័ន្ធគ្រប់គ្រងតាមបែប ក្រុមហ៊ុនអាជីវកម្មផ្តាច់មុខមួយ ដោយជ្រកក្រោមស្លាករដ្ឋ ព្រោះថាក្នុងមន្ទីរមួយនេះ មានការចាត់តាំងឲ្យមន្ត្រីចាំគាបជំរិត យកលុយពីប្រជាពលរដ្ឋដែលទៅសុំច្បាប់សាងសង់ ឬទៅសុំធ្វើប័ណ្ណកម្មសិទ្ធិ។
ប្រជាពលរដ្ឋដែលធ្លាប់ធ្វើ ប័ណ្ណកម្មសិទ្ធិបានបង្ហើបឲ្យដឹងថា តាមតម្លៃហាងឆេងផ្ទេរសិទ្ធិ ទិញលក់ដីតម្លៃទាបបំផុតគឺត្រឹម ១២០០ដុល្លារ រហូតដល់រាប់ម៉ឺនដុល្លារ ហើយតម្លៃធ្វើប័ណ្ណកម្មសិទ្ធិ ស្របច្បាប់មានចាប់ពី ៣ពាន់ដុល្លារ ដល់រាប់ម៉ឺនដុល្លារ ហើយតម្លៃបែបនេះ គេគិតតែសេវាដីធ្លីទាំងឡាយណា ដែលមានលក្ខណៈស្របច្បាប់ គ្មានការប្តឹងផ្តល់តាមផ្លូវតុលាការ។ ចំពោះការធ្វើប័ណ្ណកម្មសិទ្ធិ លើដីមិនស្របច្បាប់ ដូចជាប័ណ្ណកម្មសិទ្ធិ សម្រាប់ដីលើចំណីអូរ ចំណីសមុទ្រ ដីព្រៃលិចទឹកជាដើម គឺបង់ក្នុងកម្រិតខ្ពស់ ១គុណនឹង៥ឯណោះ បើទោះបីជាតំបន់ខ្លះ រដ្ឋបានហាមឃាត់មិនឲ្យ មានការធ្វើកម្មសិទ្ធិឲ្យឯកជន ក៏លោក សូ សុខ អាចសម្របសម្រួលធ្វើបានទាំងអស់ ឲ្យតែមានលុយបង់ជូនគាត់ ហើយកន្លងមករាជរដ្ឋាភិបាល ក៏ធ្លាប់បានមោឃៈចោលនូវប័ណ្ណកម្មសិទ្ធិដីធ្លី ដែលចេញដោយលោក សូ សុខ ផងដែរ។
ក្រោម ការដឹកនាំរបស់លោក សូរ សុខ អស់រយៈពេល៣អាណត្តិមកនេះ គេសង្កេតឃើញថា មន្ទីរសុរិយោដី និងសំណង់ខេត្តព្រះសីហនុ បានក្លាយទៅជាក្រុមហ៊ុនឯកជន អាជីវកម្មផ្តាច់មុខ រង់ចាំប្រមូលលុយពីប្រជាពលរដ្ឋ ដែលមកស្នើសុំធ្វើប័ណ្ណកម្មសិទ្ធិ ឬស្នើសុំឯកសារផ្សេងៗ ហើយសម្រាប់ការបញ្ជូនឯកសារ ឲ្យថ្នាក់លើពិនិត្យនិងសម្រេច បើឯកសារណាមួយ មិនមានភ្ជាប់ប្រាក់ទេនោះ ថ្នាក់លើក៏មិនពិនិត្យដែរ។ ជាធម្មតាប្រជាពលរដ្ឋទៅធ្វើប័ណ្ណកម្មសិទ្ធិ ឬស្នើសុំផ្ទេរកម្មសិទ្ធិ ជួបផលលំបាកយ៉ាងខ្លាំង ប៉ុន្តែសម្រាប់អ្នកមានលុយ មានអំណាចទទួលបានការយោគយល់ពីលោក សូរ សុខ ឲ្យតែបង់លុយគ្រប់ចំនួន ទោះជាដីព្រៃលិចទឹក ដីចំណីសមុទ្រ ឬដីមានទំនាស់ ក៏ពួកគេអាចធ្វើប័ណ្ណកម្មសិទ្ធិស្របច្បាប់៕
Source from: watphnom-news.com
Loading...
Post a Comment