សាលារាជធានីភ្នំពេញនៅថ្ងៃម្សិលមិញ បានចេញលិខិតផ្លូវការមួយច្បាប់លេខ៨១១ឆត.ចសម ចុះថ្ងៃទី១៥ ខែធ្នូ ឆ្នាំ២០១៣ ជម្រាបជូនលោកប្រធានគណបក្សសង្គ្រោះជាតិ ក្នុងកម្មវត្ថុស្តីពីការដង្ហែក្បួនធ្វើបាតុកម្ម និងការស្នាក់នៅលើទីលានប្រជាធិបតេយ្យនារាត្រីថ្ងៃទី១៥ ខែធ្នូ ឆ្នាំ២០១៣ ដោយបានចោទប្រកាន់សកម្មភាពនៃការធ្វើបាតុកម្មរបស់គណបក្សសង្គ្រោះជាតិថា ជាអំពើខុសឆ្គងបែបអនាធិបតេយ្យ ។
លិខិតផ្លូវការរបស់សាលារាជធានីភ្នំពេញបានគូសបញ្ជាក់ថា ការធ្វើបាតុកម្មរបស់គណបក្សសង្គ្រោះជាតិបានរំលោភបំពានទៅលើចំណុចមួយចំនួនដូចខាងក្រោម ៖
១-មានការហែក្បួនខុសពីលិខិតអនុញ្ញាត និងស្មារតីកិច្ចប្រជុំជាបន្តបន្ទាប់
២-មិនបញ្ចប់ការធ្វើបាតុកម្មតាមច្បាប់កំណត់ ព្រមទាំងបន្តស្នាក់នៅលើទីលានប្រជាធិបតេយ្យដោយគ្មានការអនុញ្ញាតនៅរាត្រីថ្ងៃទី១៥ ខែធ្នូ ឆ្នាំ២០១៣
៣-ប្រកាសបន្តធ្វើបាតុកម្មនៅថ្ងៃទី១៦ ខែធ្នូ ឆ្នាំ២០១៣ ដោយគ្មានការជូនដំណឹងមកអាជ្ញាធរមានសមត្ថកិច្ច ស្របតាមនីតិវិធីដែលមានចែងក្នុងច្បាប់ស្តីពីការធ្វើបាតុកម្មដោយសន្តិវិធី ។
សាលារាជធានីភ្នំពេញបានបន្ថែមទៀតថា "ចំពោះអំពើខុសឆ្គងបែបអនាធិបតេយ្យនេះ គណបក្សសង្គ្រោះជាតិត្រូវទទួលខុសត្រូវនូវរាល់ឧបទ្ទវហេតុគ្រប់បែបយ៉ាង ពិសេសលើបញ្ហាសន្តិសុខ សណ្តាប់ធ្នាប់សាធារណៈ និងបញ្ហាអនាម័យ បរិស្ថាន ដែលកើតចេញពីសកម្មភាពខុសច្បាប់នេះទាំងស្រុង ។ " ។
គួរបញ្ជាក់ជូនថា ឆ្លងតាមសកម្មភាពជាក់ស្តែងរបស់គណបក្សសង្គ្រោះជាតិ ទាក់ទងនឹងការធ្វើបាតុកម្មតវ៉ាទាមទារឲ្យមានការបង្កើតគណៈកម្មការចម្រុះឯករាជ្យស៊ើបអង្កេតភាពមិនប្រក្រតីនៃការបោះឆ្នោតនាពេលកន្លងមក រហូតមកដល់ពេលធ្វើបាតុកម្មទាមទារឲ្យមានការបោះឆ្នោតសាជាថ្មីឡើងវិញនៅថ្ងៃម្សិលមិញនេះ គឺគណបក្សសង្គ្រោះជាតិបានបង្ហាញនូវជំហររបស់ខ្លួនរួចហើយថា ច្បាប់របស់ប្រទេសជាតិដែលគ្រប់គ្រងអំណាចដោយគណបក្សប្រជាជនកម្ពុជាបច្ចុប្បន្នគ្មានប្រសិទ្ធភាពទៅលើគណបក្សប្រឆាំងទេ ដ្បិតគណបក្សប្រឆាំងគ្មានជំនឿទុកចិត្តទៅលើប្រព័ន្ធច្បាប់ទាំងនោះបន្តិចឡើយ ៕
Source from: www.dtn7.com
Loading...
Post a Comment