បញ្ញត្ដិមាត្រា១២០ថ្មី(មាត្រា១០១ចាស់)នៃរដ្ឋធម្មនុញ្ញនៃព្រះរាជាណាចក្រកម្ពុជា បានចែងថា “មុខងារនៃ សមាជិករាជរដ្ឋាភិបាលមានវិសមិតភាពនឹងសកម្មភាពខាងវិជ្ជាជីវៈ ផ្នែកពាណិជ្ជកម្ម ឬឧស្សាហកម្ម ហើយនឹងការកាន់តំណែងណាមួយក្នុងមុខងារសាធារណៈ ។ ” ។
មាត្រា១០ កថាខណ្ឌទី២ នៃច្បាប់ស្ដីពីលក្ខន្ដិកៈទូទៅនៃសហគ្រាសសាធារណៈ បានចែងថា “មុខងារនៃប្រធានអគ្គនាយក អគ្គនាយក ឬសមាជិកក្រុមប្រឹក្សាភិបាលនៃសហគ្រាសសាធារណៈ មានវិសមិតភាពជាមួយមុខងារនៃសមាជិករដ្ឋសភា ឬសមាជិករាជ រដ្ឋាភិបាល ។ ” ។
ដោយឡែក ច្បាប់ស្ដីពីលក្ខន្ដិកៈនៃមន្ដ្រីរាជការស៊ីវិលនិងច្បាប់ស្ដីពី លក្ខន្ដិកៈទូទៅចំពោះយោធិននៃកងយោធពលខេមរភូមិន្ទ ក៏បានចែងហាមឃាត់មន្ដ្រីរាជការស៊ីវិល និងយោធិនអាជីព មិនឱ្យយកម៉ោងរដ្ឋបាលទៅប្រកបវិជ្ជាជីវៈជាឯកជន និងមិនឱ្យចូលជាសមាជិកនៃក្រុមប្រឹក្សាភិបាលឬគ្រប់គ្រងក្រុមហ៊ុន ជាលក្ខណៈឯកជនដែរ ។
ថ្វីដ្បិតមានច្បាប់បញ្ញត្តិ ដូច្នេះក៏ដោយ ប៉ុន្តែមានអ្នកធំ អ្នកមានអំណាចនៅស្រុកខ្មែរដែលមានមុខងារជាសមាជិករាជរដ្ឋាភិបាល ឬមន្ដ្រីរាជការក្របខ័ណ្ឌមុខងារសាធារណៈ មានបំណងចង់ប្រកបមុខរបរជំនួញ គឺមិនហ៊ានចេញមុខបើកក្រុមហ៊ុនរកស៊ីផ្ទាល់ទេ ប៉ុន្ដែបានបើកផ្លូវឱ្យប្រពន្ធ-កូន-ប្អូន-ក្មួយរបស់ខ្លួនឈរឈ្មោះជាម្ចាស់ក្រុមហ៊ុនជំនួសវិញ។
ព័ស្ដុតាងដែលបង្ហាញអំពីរូបភាពប្រពន្ធ-កូនអ្នកធំរកស៊ីបើកក្រុមហ៊ុនប្រកបមុខរបរជំនួញ មានដូចតទៅ ៖
១-លោកស្រី ហ៊ុន ម៉ាណា (កូនស្រីបង្កើតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា)ប្រធានក្រុមប្រឹក្សាភិបាលអិនវីអិន ខបភើរេសិន, ប្រធានក្រុមប្រឹក្សាភិបាលក្រុមហ៊ុនបាយ័ន ស៊ីអិម អរហ្គាណាយសឺ ខូ អិលធីឌី, អភិបាលក្រុមហ៊ុនអាលុយមីណា(ខេមបូឌា-វៀតណាម) អភិបាលក្រុមហ៊ុនដ្រេហ្គន រ៉ូយ៉ាល់ ធេលីខម, ប្រធានក្រុមប្រឹក្សាភិបាលក្រុមហ៊ុនកម្ពុជាថ្មីប្រចាំថ្ងៃ …។ លោកស្រី ហ៊ុន ម៉ាណា ដែលត្រូវជាភរិយារបស់លោកឧត្ដមសេនីយ៍ទោឌី វិជ្ជា ហៅដោក (ត្រូវជាកូនប្រុសបង្កើតរបស់ឯកឧត្ដមនាយឧត្ដមសេនីយ៍ ហុក ឡងឌី អតីតអគ្គស្នងការនគរបាលជាតិ) មានមុខរបរក្នុងក្រុមហ៊ុនច្រើនផ្នែកណាស់ គឺទាំងបណ្ដាញឃោសនា (វិទ្យុ ទូរទស្សន៍បាយ័ន និងកាសែតកម្ពុជាថ្មីប្រចាំថ្ងៃ ព្រមទាំងគេហទំព័រផង) ទាំងធនាគារ ទាំងប្រេងឥន្ធនៈ ទាំងសេវាអចលនវត្ថុ ទាំងសេវាទូរស័ព្ទ ទាំងសេវានាំចេញ នាំចូល…។ល។
២-លោកជំទាវ ម៉ែន ភក្ដី (ភរិយាឯកឧត្ដមហុក ឡងឌី)ប្រធានក្រុមប្រឹក្សាភិបាលក្រុមហ៊ុនឌី&អិម(បាវិត)អេសអ៊ីហ្សិត ខូ អិលធីឌី ។
៣-លោកជំទាវ ណុព្វ ស៊ីដារ៉ា (ភរិយាឯកឧត្ដមនាយឧត្ដមសេនីយ៍ ប៉ុល សារឿន អគ្គមេបញ្ជាការកងយោធពលខេមរភូមិន្ទ)អភិបាលក្រុមហ៊ុនរតនៈ ស្ទោន(ខេមបូឌា) ឌីវេឡុបមេន គ្រុប អ៊ីន ។
៤-លោកជំទាវ ម៉ៅ ម៉ាល័យ (ភរិយាឯកឧត្ដមនាយឧត្ដមសេនីយ៍ កែ គឹមយ៉ាន ឧបនាយករដ្ឋមន្ដ្រី ទទួលបន្ទុកប្រធានអាជ្ញាធរជាតិប្រយុទ្ធប្រឆាំងគ្រឿងញៀន)អភិបាល ក្រុមហ៊ុនហ្គ្រេនភ្នំពេញ ហ្គោល ខូ លីមីធីត ។
៥-លោកជំទាវ ជា ខេង (ភរិយាឯកឧត្ដម ស៊ុយ សែម អតីតរដ្ឋមន្ដ្រីក្រសួងឧស្សាហកម្ម រ៉ែ និងថាមពល) អភិបាលក្រុមហ៊ុនខេឌីស៊ី អ៊ិនធើណេសិនណល ។
៦-លោកជំទាវ គាត កុលណី (ភរិយាឯកឧត្ដម ឆាន់ សាផាន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងត្រូវជាប្អូនស្រីបង្កើតរបស់ឯកឧត្ដមកិត្ដិសេដ្ឋាបណ្ឌិត គាត ឈន់ ឧបនាយករដ្ឋមន្ដ្រី រដ្ឋមន្ដ្រី ក្រសួងសេដ្ឋកិច្ចនិងហិរញ្ញវត្ថុ) ប្រធានក្រុមប្រឹក្សាអភិបាលក្រុមហ៊ុនផល វឌ្ឍនភាព, អភិបាលក្រុមហ៊ុនមៀង លីហេង គ្រុប អាហរ័ណ នីហរ័ណ…។
៧-លោកជំទាវ បាន ស្រីមុំ (ភរិយាឯកឧត្ដមអ៊ី ឈាន អភិបាលនៃគណៈអភិបាលខេត្ដប៉ៃលិន)ប្រធានក្រុមប្រឹក្សាភិបាលក្រុមហ៊ុន រិចតូរីយ៉ា.វ៉ាយ.អ៊ីន ។
៨-លោកជំទាវ ចាប ចាន់ម៉ូនីកា (ភរិយាឯកឧត្ដម ជា ចំរើន សមាជិករដ្ឋសភា)អភិបាលក្រុមហ៊ុនចំរើន នីកា គ្រុប ។
៩-លោកជំទាវ ចម និម្មល (កូនស្រីបង្កើតឯកឧត្ដមចម ប្រសិទ្ធ ទេសរដ្ឋមន្ដ្រី រដ្ឋមន្ដ្រីក្រសួងពាណិជ្ជកម្ម)ជាសមាជិកភាគហ៊ុននៃក្រុមហ៊ុនយ៉ាំងអន ត្រឺប្រឺនើរ ។
១០-លោកឧត្ដមសេនីយ៍ទោ ឌី វិជ្ជា (ស្វាមីរបស់លោកស្រី ហ៊ុន ម៉ាណា និងត្រូវជាកូនប្រសារបស់នាយករដ្ឋមន្ដ្រី)អភិបាលក្រុមហ៊ុន (ខេមបូឌា)ខូលផត, អភិបាលក្រុមហ៊ុនសុខាអ៊ែឡាញ, អភិបាលក្រុមហ៊ុនឌីខប ខូអិលធីឌី…។
១១-លោកឧកញ៉ា ស្រី សុធា (សាច់ញាតិឯកឧត្ដមនាយឧត្ដមសេនីយ៍ ឯម សំអាន រដ្ឋលេខាធិការក្រសួងមហាផ្ទៃ )ប្រធានក្រុមប្រឹក្សាភិបាលក្រុមហ៊ុន៧អេនជីនី ខូអបភើរេសិន និងលោកស្រី ចន្ធូ អភិបាលក្រុមហ៊ុន៧អេនជី គ្រុប និងអភិបាលក្រុមហ៊ុន៧អេនជី អេហ្គ្រីខលឈ័រ…។
១២-លោកឧត្តសេនីយ៍យោធា យ៉ិនទៀង ពុទ្ធិរ៉ា (កូនប្រុសបង្កើតរបស់ឯកឧត្ដមបណ្ឌិត ឱម យ៉ិនទៀង ទេសរដ្ឋមន្ដ្រី ទទួលបន្ទុកប្រធានអង្គភាពប្រឆាំងអំពើពុករលួយ)ប្រធាន ក្រុមប្រឹក្សាភិបាលក្រុមហ៊ុនឡុង សូរិយា អ៊ីមផត អ៊ិចផត ។
១៣-លោក ឌី ចូច (ក្មួយប្រុសរបស់សម្តេចនាយករដ្ឋមន្ដ្រី) អភិបាលក្រុមហ៊ុនអ៊ឹមលាង ឌី ចូច សោភ័ណ្ឌ។ល។
ក្រុមអ្នកប្រកបរបរជំនួញនៅកម្ពុជា បានលាន់មាត់ថា ក្នុងនាមជាអ្នកជំនួញដូចគ្នាគឺពិបាកប្រកួតប្រជែងខ្លាំងណាស់ជាមួយ ម្ចាស់ក្រុមហ៊ុនដែលជាភរិយា ឬជាកូន ឬជាក្មួយ…របស់អ្នកធំ អ្នកមានអំណាច ពីព្រោះពួកគេមានដើមទុនធំផងនិងមានបក្ខពួករឹងមាំផង ហើយអាជ្ញាធរពាក់ព័ន្ធតែងបង្កលក្ខណៈងាយស្រួលឱ្យអ្នកជំនួញត្រូវជា ភរិយាឬជាកូនអ្នកធំជាដារាប។
មជ្ឈដ្ឋានអ្នកច្បាប់ឯករាជ្យ និងអ្នកជំនាញខាងពាណិជ្ជកម្ម បានលើកឡើងថា មន្ដ្រីអ្នកមានអំណាចនិងអ្នកមានលុយកាក់នៅកម្ពុជា ភាគច្រើនបានប្រគល់ភារកិច្ចឱ្យប្រពន្ធ ឬកូន ក្មួយរបស់ពួកគេចេញមុខធ្វើជាអ្នកជំនួញដែលមានលទ្ធភាពជាប្រព័ន្ធ ខាងទទួលបានប្រាក់ចំណេញ និងអាចលាងលុយកខ្វក់បានមកពីអំពើពុករលួយ ឱ្យក្លាយទៅជាលុយសស្អាតបាន តាមរយៈមុខជំនួញរបស់ពួកគេ ។ លើសពីនេះ ដោយសារសង្គមកម្ពុជាឱ្យតម្លៃទៅលើអំណាច និងលុយកាក់ ព្រមទាំងបក្ខពួកនិយមផង ដូច្នេះការប្រកួតប្រជែងក្នុងមុខរបរជំនួញពាណិជ្ជកម្ម ឧស្សាហកម្ម និងសេវាកម្មរវាងប្រពន្ធ-កូន ក្មួយ បងប្អូនអ្នកធំ និងអ្នកជំនួញដទៃទៀត គឺគ្មានភាពស្មោះត្រង់ និងគ្មានយុត្ដិធម៌ពិតប្រាកដឡើយ៕
Source from: www.dtn7.com
Loading...
Post a Comment