ក្នុងនាមជាសមាជិកក្រុមប្រឹក្សាជាតិប្រឆាំងអំពើពុករលួយ និងជាប្រធានអង្គភាពប្រឆាំងអំពើពុករលួយ ដែលមានឋានៈស្មើទេសរដ្ឋមន្ត្រីនោះ ឯកឧត្តមបណ្ឌិត ឱម យ៉ិនទៀង បានបបួលកូនប្រុសបង្កើតរបស់ឯកឧត្តមចំនួន២នាក់ជានាយទាហានជាន់ខ្ពស់នៃកងយោធពលខេមរភូមិន្ទ និងមានឋានន្តរស័ក្តិជាឧត្តមសេនីយ៍ទោ(ផ្កាយ២) ឲ្យជួយការងារឪពុកដើម្បីប្រយុទ្ធប្រឆាំងនឹងអំពើពុករលួយនៅកម្ពុជា គឺឯកឧត្តម យ៉ិនទៀង ពុទ្ធិរ៉ា និងឯកឧត្តម យ៉ិនទៀង ពុទ្ធិរិទ្ធ ។
ឯកឧត្តមបណ្ឌិត ឱម យ៉ិនទៀង បានតែងតាំងឯកឧត្តម យ៉ិនទៀង ពុទ្ធិរិទ្ធ ត្រូវជាកូនបង្កើត និងជានាយទាហានជាន់ខ្ពស់នៃកងយោធពលខេមរភូមិន្ទ អត្តលេខ២៣១៧០២ មានឋានន្តរស័ក្តិជាឧត្តមសេនីយ៍ទោ ឲ្យធ្វើជាជំនួយការផ្ទាល់របស់ឯកឧត្តមតែម្តង ដែលមានឋានៈស្មើអគ្គនាយក ។
ដោយឡែក ឯកឧត្តម យ៉ិនទៀង ពុទ្ធិរ៉ា ជានាយទាហានជាន់ខ្ពស់នៃកងយោធពលខេមរភូមិន្ទ អត្តលេខ២៣១៤៧៧ មានឋានន្តរស័ក្តិជាឧត្តមសេនីយ៍ទោ ត្រូវបានតែងតាំងជាឧបការីនៃអង្គភាពប្រឆាំងអំពើពុករលួយ មានឋានៈស្មើអគ្គនាយក ។
មជ្ឈដ្ឋានអ្នកវិភាគកិច្ចការសង្គម បានលើកឡើងថា អំពើពុករលួយនៅកម្ពុជាមានលក្ខណៈជាប្រព័ន្ធតាំងពីលើដល់ក្រោម និងមានរយៈពេលដុះស្លែ ព្រមទាំងមានកម្រាស់ដុះស្នឹមអស់រយៈពេល២០ឆ្នាំមកហើយនាសម័យព្រះរាជាណាចក្រកម្ពុជាទី២នេះ ។ ដូច្នេះ ទោះបីឯកឧត្តមបណ្ឌិត ឱម យ៉ិនទៀង ជាមេប្រឆាំងអំពើពុករលួយ និងជាសមាជិកគណៈកម្មាធិការកណ្តាលគណបក្សប្រជាជនកម្ពុជា បបួលកូនប្រុសបង្កើតទាំង២ជានាយទាហានពាក់ផ្កាយ២ឲ្យមកជួយឯកឧត្តម ក្នុងការប្រយុទ្ធប្រឆាំងអំពើពុករលួយក៏ដោយ ក៏មិនអាចវាយបំបែកជញ្ជាំងនៃអំពើពុករលួយដ៏ក្រាស់ឃ្មឹកនៅកម្ពុជាបានដែរ និងបើបានក៏បានត្រឹមកម្រិតចាត់ការអំពើពុករលួយរបស់មន្ត្រីថ្នាក់តូចតាច កំប៉ិកកំប៉ុកប៉ុណ្ណោះ ដ្បិតអំពើពុករលួយវាបានក្លាយទៅជាមុខរបរដ៏កាក់កបរបស់មន្ត្រីរាជការថ្នាក់កំពូលៗនាសម័យព្រះរាជាណាចក្រកម្ពុជាទី២នេះរួចទៅហើយ ។
យោងតាមសេចក្តីសម្រេចលេខ៥៨/៤ ចុះថ្ងៃទី៣១ ខែធ្នូ ឆ្នាំ២០០៣ របស់មហាសន្និបាតអង្គការសហប្រជាជាតិនោះ ព្រះរាជាណាចក្រកម្ពុជាបានកំណត់យកថ្ងៃទី០៩ ខែធ្នូ ធ្វើជាទិវាជាតិប្រយុទ្ធប្រឆាំងអំពើពុករលួយ ដោយស្មារតីអនុក្រឹត្យរបស់រាជរដ្ឋាភិបាលលេខ១៥០អនក្រ.បក ចុះថ្ងៃទី០៦ ខែធ្នូ ឆ្នាំ២០១០ ដែលកម្ពុជាបានប្រារព្ធទិវានេះចំនួន២លើករួចមកហើយ ក្នុងគោលបំណង ៖ -ចូលរួមក្នុងការអនុវត្តអនុសញ្ញាអង្គការសហប្រជាជាតិប្រឆាំងអំពើពុករលួយ ។ -លើកកម្ពស់ប្រសិទ្ធភាពសេវាគ្រប់បែបយ៉ាង ពង្រឹងអភិបាលកិច្ច និងនីតិរដ្ឋនៅក្នុងការដឹកនាំ និងការគ្រប់គ្រងរដ្ឋ ព្រមទាំងរក្សាភាពស្អាតស្អំ និងយុត្តិធម៌ ដែលជាមូលដ្ឋានចាំបាច់ក្នុងការអភិវឌ្ឍសង្គមជាតិ និងកាត់បន្ថយភាពក្រីក្រ ។ -បង្កើនការគាំទ្រពីមហាជន និងលើកកម្ពស់ស្មារតីចូលរួមប្រយុទ្ធប្រឆាំងអំពើពុករលួយ ។ -កសាងជំនឿទុកចិត្តរបស់ប្រជាពលរដ្ឋលើការដឹកនាំរបស់រាជរដ្ឋាភិបាល ។ -អប់រំ ផ្សព្វផ្សាយពីផលវិបាកនៃអំពើពុករលួយ ។
ដើម្បីត្រៀមរៀបចំប្រារព្ធទិវាជាតិប្រយុទ្ធប្រឆាំងអំពើពុករលួយលើកទី៣ នៅថ្ងៃទី០៩ ខែធ្នូ ឆ្នាំ២០១៣ខាងមុខនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់នៅក្នុងសារលិខិតរបស់សម្តេចចុះថ្ងៃទី០៦ ខែធ្នូ ឆ្នាំ២០១៣ថា "ឲ្យគ្រប់ថ្នាក់ដឹកនាំក្រសួង ស្ថាប័ន អាជ្ញាធរគ្រប់ជាន់ថ្នាក់លុបបំបាត់នូវការទារលុយកាក់ក្រៅច្បាប់ឲ្យបានជាដាច់ខាត ។ រាជរដ្ឋាភិបាលអាណត្តិទី៥ប្តេជ្ញាប្រយុទ្ធប្រឆាំងអំពើពុករលួយដោយគ្មានងាករេ ដើម្បីគាស់រំលើងយកចេញនូវឧបសគ្គដល់ការអភិវឌ្ឍ ដល់ដំណើរសេដ្ឋកិច្ច ដល់កិច្ចប្រឹងប្រែងនៃការកាត់បន្ថយភាពក្រីក្រ និងដល់យុត្តិធម៌សង្គម ។ សម្តេចនឹងគាំទ្រដល់សកម្មភាពរបស់អង្គភាពប្រឆាំងអំពើពុករលួយ ដែលប្រតិបត្តិច្បាប់ដោយគ្មានការលើកលែង ។…" ។
ឥឡូវ យើងទាំងអស់គ្នាត្រូវរង់ចាំតាមដានមើល តើការប្តេជ្ញាចិត្តរបស់បុរសខ្លាំងនៃកម្ពុជានឹងក្លាយទៅជាការពិតដែរឬទេ ទាក់ទងនឹងដំណើរការប្រយុទ្ធប្រឆាំងនឹងអំពើពុករលួយនៅកម្ពុជា? ៕
Source from: www.dtn7.com
Loading...
Post a Comment