រាជធានីភ្នំពេញ ៖ ករណីដែលលោក កែត ស៊ីវិនី ប្រធានផ្សារដើមគ ប្រព្រឹត្តអំពើពុករលួយ ជាយូរមកហើយនោះ ត្រូវបានបុគ្គលិក និងសន្តិសុខក្រោមឱវាទ នាំគ្នាលាតត្រដាងជាសាធារណៈ ដោយអំពាវនាវឱ្យលោក ឯក ឃុនជឿន អភិបាលខណ្ឌទួលគោក ចាត់វិធានការទប់ស្កាត់ជាបន្ទាន់ ហើយលោក ប៉ា សុជាតិវង្ស អភិបាលរាជធានីភ្នំពេញ ក៏ត្រូវក្រឡេកមើល អំពើពុករលួយរបស់លោក កែត ស៊ីវិនី ផងដែរ ព្រោះគាត់បានកេងប្រវ័ញ្ច លើកម្លាំងញើសឈាម របស់បុគ្គលិក និងក្រុមសន្តិសុខ ផ្សារដើមគតាមអំពើចិត្តជាយូរមកហើយ តាមរយៈការកិបកេងប្រាក់ រាប់សិបលានរៀល ដែលប្រមូលបាន ពីក្រុមអាជីវករលក់ដូរ តាមផ្លូវលេខ៣៣៦ ខាងជើងផ្សារនិងក្រោមដើមក្ងោក យកទៅធ្វើមានធ្វើបានផ្ទាល់ខ្លួន។
ក្រុមបុគ្គលិកនិងសន្តិសុខផ្សារដើមគ បានបញ្ជាក់ថា ពួកគេទទួលបានប្រាក់ខែប្រមាណ ៧ម៉ឺនរៀល ទៅ ២៥ម៉ឺនរៀល ប៉ុន្តែប្រធានផ្សារបានធ្វើរបាយការណ៍ទៅថ្នាក់លើថា ពួកគេទទួលបានប្រាក់ខែពី ៣០ម៉ឺនរៀលដល់ ៤៥ម៉ឺនរៀល។ បុគ្គលិកនិងសន្តិសុខផ្សារដើមគ បានត្អូញត្អែរថា លោក កែត ស៊ីវិនី ប្រព្រឹត្តអំពើពុករលួយតាមគ្រប់រូបភាព ហើយបានយកឈ្មោះ មន្ត្រីជាន់ខ្ពស់នៅសាលារាជធានីភ្នំពេញ មកគំរាមកំហែង ដើម្បីកុំឱ្យពួកគេធ្វើការតវ៉ា។ ទោះជាយ៉ាងណាឥឡូវរឿងអាស្រូវនេះ កំពុងបែកធ្លាយ ព្រោះលោក កែត ស៊ីវិនី បានកេងប្រវ័ញ្ចលើបុគ្គលិក និងក្រុមសន្តិសុខ កាន់តែខ្លាំងឡើងៗ ដើម្បីប្រមូលលុយយកទៅ ធ្វើមានធ្វើបានផ្ទាល់ខ្លួន យ៉ាងក្រអឺតក្រទម។ មិនតែប៉ុណ្ណោះលោក កែត ស៊ីវិនី បានប្រើពាក្យសំដីអសីលធម៌ មកលើបុគ្គលិកនិងសន្តិសុខ ស្រេចតែអំពើចិត្ត ហើយខ្លួនឯងផ្ទាល់អង្គុយ តែក្នុងស្នាក់ការដើម្បីប្រមូលលុយ តាមរបៀបពុករលួយសព្វបែបយ៉ាង។
សន្តិសុខនិងបុគ្គលិកផ្សារដើមគ ជាច្រើននាក់បានឱ្យដឹងថា ការណែនាំ របស់អភិបាលខណ្ឌទួលគោក គឺបានតម្រូវឱ្យប្រធានផ្សារ បើកប្រាក់ខែដល់ពួកគេ ក្នុងចំនួនពី ៣០ម៉ឺនទៅ៤០ ម៉ឺនរៀល ប៉ុន្តែជាក់ស្តែងគឺពួកគេ ទទួលបានត្រឹមតែ ៧ម៉ឺនទៅ១០ ម៉ឺនរៀលប៉ុណ្ណោះ។ ឈ្មោះបុគ្គលិកដែលទទួលបាន ប្រាក់ខែត្រឹមតែ ៧ម៉ឺនរៀលត្រូវលោក កែត ស៊ីវិនី សរសេរក្នុងរបាយការណ៍ថា ៣០ម៉ឺនរៀលចំណែកអនុប្រធាន ក្រុមសន្តិសុខដែលទទួលបានប្រាក់ខែត្រឹម ១០ ម៉ឺនរៀលគេសរសេរ ក្នុងរបាយការណ៍ថា ៣៥ម៉ឺនរៀល។ ចំណែកប្រធាន សន្តិសុខនិងអនុប្រធានមួយចំនួន ដែលទទួលបានប្រាក់ខែត្រឹម ១៥ម៉ឺនរៀល គេសរសេរក្នុងរបាយការណ៍ដាក់ថា ៤០ម៉ឺនរៀលដែលបញ្ហានេះ គឺជារបៀបកេងប្រវ័ញ្ចយ៉ាងច្បាស់ក្រឡែត មិនអាចបិទបាំងបានទេ។
មានការបញ្ជាក់ផងដែរថា ក្នុងមួយខែចំណូលរបស់ផ្សារដើមគ ដែលបានមកពីការ ដើរទាត់កញ្ច្រែងអាជីវករ គឺមានប្រមាណជិត ៤០លានរៀល ដែលប្រធានផ្សារកេងប្រវ័ញ្ច យកទៅធ្វើមានធ្វើបានផ្ទាល់ខ្លួន។ ជាងនេះទៅទៀតនៅមាន ការកាត់ចិញ្ចើមផ្លូវ ឱ្យអាជីវករធ្វើជាកន្លែងលក់ដូរ និងយកធ្វើតូបជាង ២០ជាប់នឹងរបង មហោស្រពចេនឡា ហើយអាជីវករទាំងនោះ ត្រូវបង់ក្នុងមួយឆ្នាំ ៥០០ដុល្លារ ដោយមិនគិតពីភាស៊ី និងអនាម័យនៅឡើយទេ។ អាចនិយាយបានថា ក្នុងតួនាទីជាប្រធានផ្សារដើមគ គឺលោក កែត ស៊ីវិនី កេងប្រវ័ញ្ចលើកម្លាំងញើសឈាម បុគ្គលិកនិងសន្តិសុខផ្សារ ស្រេចតែអំពើចិត្ត ហើយលោក កែត ស៊ីវិនី បានយកឈ្មោះមន្ត្រីជាន់ខ្ពស់ សាលារាជធានីភ្នំពេញមកធ្វើជាខែល ដើម្បីបិទបាំងអំពើអាក្រក់របស់ខ្លួន។
បុគ្គលិកនិងសន្តិសុខផ្សារដើមគ បានអំពាវនាវទៅសាលារាជធានីភ្នំពេញ ឱ្យជួយអន្តរាគមន៍ទៅប្រធានផ្សារដើមគ ធ្វើយ៉ាងណាឱ្យពួកគេ បានទទួលប្រាក់ខែ ដូចមាននៅក្នុងសេចក្តីណែនាំ របស់សាលាខណ្ឌទួលគោក។ ជាមួយគ្នានេះ លោកអភិបាលខណ្ឌទួលគោក ក៏ដូចជាលោកអភិបាលរាជធានីភ្នំពេញ មិនគួរបណ្តោយឱ្យលោក កែត ស៊ីវិនី ធ្វើអ្វីៗស្រេចតែអំពើចិត្តតទៅទៀតទេ ព្រោះអំពើពុករលួយរបស់ប្រធានផ្សារ បានធ្វើឱ្យបុគ្គលិក និងសន្តិសុខក្រោមឱវាទ ទទួលរងនូវទុក្ខលំបាក គ្មានទីបញ្ចប់។ ម្យ៉ាងទៀតចំណូល ដែលបានមកពីការជួលតូប ឬលក់តូបមួយចំនួន ត្រូវបានលោក កែត ស៊ីវិនី កេងប្រវ័ញ្ចយកទៅធ្វើជា ផលប្រយោជន៍ផ្ទាល់ខ្លួន ដោយគ្មានខ្លាចក្រែង អ្វីទាំងអស់។ បើប្រៀបធៀបជាមួយប្រធានផ្សារដើមគ កាលពីមុនគឺខុសគ្នាដូចមេឃនិងដី ព្រោះប្រធានផ្សារមុន ចេះស្គាល់ពីទុក្ខលំបាករបស់បុគ្គលិក និងសន្តិសុខក្រោមឱវាទខ្លះៗ មិនកេងប្រវ័ញ្ច ស្រេចតែអំពើចិត្តឡើយ៕
Source from: watphnom-news.com
Loading...
Post a Comment