ខេត្តកំពង់ឆ្នាំង ៖ យុវជនម្នាក់បានបើកម៉ូតូ ជែងរ៉ឺម៉កមួយគ្រឿង ហើយបានទាក់ដៃចង្កូត ដួលបោកនឹងថ្នល់ ហើយគាប់ជួន មានរថយន្តធុនធំមួយគ្រឿង មកដល់បើកបុកកិនបែកក្បាល ស្លាប់យ៉ាងអាណោចអាធ័មបំផុត កាលពីវេលាម៉ោង ៦និង៣០ នាទីព្រលប់ថ្ងៃទី០៦ ខែធ្នូ ឆ្នាំ២០១៣ ត្រង់ចំណុចគីឡូម៉ែត្រលេខ ៥៩និង៦០ លើផ្លូវជាតិលេខ៥ ស្ថិតក្នុងភូមិអូររូង ឃុំតាជេស ស្រុកកំពង់ត្រឡាច ខេត្តកំពង់ឆ្នាំង។
សមត្ថកិច្ចបានឲ្យដឹងថា យុវជនរងគ្រោះមានឈ្មោះ អ៊ឹម រ៉នី អាយុ ២២ឆ្នាំ រស់នៅភូមិត្រពាំងខ្ទុម ឃុំឈូកស ស្រុកកំពង់ត្រឡាច ខេត្តកំពង់ឆ្នាំង បានបើកម៉ូតូម៉ាក ស្មាស់ ពណ៌ខ្មៅ អត់ស្លាកលេខ ក្នុងទិសដៅពីត្បូងទៅជើង លុះមកដល់ចំណុចកើតហេតុ ជនរងគ្រោះបានបើកជែង រ៉ឺម៉កមួយគ្រឿង ដែលដឹកកម្មកររោងចក្រ ក្នុងស្ថានភាពគ្រោះថ្នាក់ ក៏ទាក់ដៃចង្កូតជាមួយរ៉ឺម៉ក ហើយដួលនៅកណ្តាលថ្នល់។
ខណៈនោះមានរថយន្តធំ មួយគ្រឿងមិនស្គាល់ម៉ាក បើកបរក្នុងទិសដៅច្រាសគ្នា ចាប់ហ្វ្រាំងមិនទាន់ ក៏ជ្រុលទៅកិនចំក្បាល ផ្ទុះធ្លាយខួរស្លាប់ភ្លាមៗ នៅនឹងកន្លែងតែម្តង។ ក្រោយពេលកើតហេតុ រថយន្តបង្កបានបើករត់គេចបាត់ស្រមោល រីឯសពយុវជនរងគ្រោះ ត្រូវបានសមត្ថកិច្ចប្រគល់ឲ្យ ក្រុមគ្រួសារយក ទៅធ្វើបុណ្យតាមប្រពៃណី ក្រោមសម្រែកទួញសោក គួរឲ្យអាណិតអាសូរបំផុត៕
Source from: watphnom-news.com
Loading...
Post a Comment