ថ្លែងនៅក្នុងសន្និសីទសារព័ត៌មាននាថ្ងៃទី០៩ ខែធ្នូ ឆ្នាំ២០១៣នេះ នៅទីស្តីការក្រសួងប្រៃសណីយ៍និងទូរគមនាគមន៍ "PMTC" ឯកឧត្តម នាយឧត្តមសេនីយ៍ផ្កាយមាស៤ ប្រាក់ សុខុន រដ្ឋមន្ត្រីក្រសួង MPTC បានបញ្ជាក់ថា ក្រសួងត្រូវអនុវត្តន៍តាមការសម្រេចរបស់រាជរដ្ឋាភិបាល ដូចមានចែងនៅក្នុងស្មារតីលិខិតលេខ១៨៨៨សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី ដើម្បីទប់ស្កាត់ភាពអនាធិបតេយ្យនៃការប្រកួតប្រជែងក្នុងទីផ្សារទូរគមនាគមន៍ និងបង្កើនចំណូលថវិការដ្ឋ ពោលគឺត្រូវបន្តអនុវត្តន៍ឲ្យបានម៉ឺងម៉ាត់ដាច់ខាតនូវប្រកាសអន្តរក្រសួងលេខ២៣២ សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ ។
យោងតាមលិខិតលេខ១១១៧សហវ.បទ ចុះថ្ងៃទី១២ ខែវិច្ឆិកា ឆ្នាំ២០១៣ របស់ក្រសួងប្រៃសណីយ៍និងទូរគមនាគមន៍ "MPTC" និងក្រសួងសេដ្ឋកិច្ចនិងហិរញ្ញវត្ថុ "MEF" ដែលបានស្នើសុំអនុញ្ញាតបន្តអនុវត្តន៍សារាចរអន្តរក្រសួងលេខ១២៧៧សហវ.បទ ចុះថ្ងៃទី២៩ ខែកញ្ញា ឆ្នាំ២០០៩ ស្តីពីវិធានការទប់ស្កាត់ភាពពុំស្មោះត្រង់នៃការប្រកួតប្រជែងក្នុងវិស័យទូរគមនាគមន៍, បទបញ្ជារបស់រាជរដ្ឋាភិបាលលេខ០១បប ចុះថ្ងៃទី២១ ខែតុលា ឆ្នាំ២០០៩ ស្តីពីវិធានការបញ្ឈប់បិទខ្ទប់ការតភ្ជាប់បណ្តាញសេវាទូរស័ព្ទគ្នាទៅវិញទៅមក រវាងប្រតិបត្តិករទូរស័ព្ទមួយទៅប្រតិបត្តិករទូរស័ព្ទមួយទៀត និងប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ ស្តីពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ ដែលទទួលបានចំណារឯកភាព ចុះថ្ងៃទី២១ ខែវិច្ឆិកា ឆ្នាំ២០១៣ របស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនោះ រាជរដ្ឋាភិបាលបានសម្រេចយល់ព្រមតាមសំណើរបស់ក្រសួង MPTC និងក្រសួង MEF ទាំងស្រុង ដោយស្មារតីលិខិតលេខ១៨៨៨សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី ។
ការសម្រេចពង្រឹងការអនុវត្តបទប្បញត្តិធរមានខាងលើតាមសំណើរបស់ក្រសួង MPTC និងក្រសួង MEF នេះ ត្រូវបានរាជរដ្ឋាភិបាលលើកហេតុផលដូចតទៅ ៖
១-ក្រុមហ៊ុនទូរស័ព្ទស្ទើរទាំងអស់បានគាំទ្រ និងទទួលអនុវត្តន៍តាមដូចមានឯកសារជំនួយស្មារតីដែលក្រុមហ៊ុនចំនួន៨បានចុះហត្ថលេខា ទល់ក្រុមហ៊ុនចំនួន១ ។
២-បង្កើនចំណូលថវិការដ្ឋ ។
៣-ទប់ស្កាត់ភាពអនាធិបតេយ្យនៃការប្រកួតប្រជែងក្នុងទីផ្សារទូរគមនាគមន៍ ។
លើសពីនេះ រាជរដ្ឋាភិបាលបានសម្រេចប្រគល់ភារកិច្ចជូនបញ្ញត្តិករទូរគមនាគមន៍កម្ពុជាបន្តការពិភាក្សាសម្របសម្រួលជាមួយបណ្តាប្រតិបត្តិករទូរស័ព្ទ និងធ្វើការសិក្សាបន្ថែមបន្តទៀត ដើម្បីពិនិត្យកែសម្រួលការកំណត់ថ្លៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញរវាងប្រតិបត្តិករទូរស័ព្ទមួយ ទៅប្រតិបត្តិករទូរស័ព្ទមួយទៀតក្នុងករណីចាំបាច់ ដែលអាចធ្វើឲ្យទីផ្សារទូរគមនាគមន៍នៅកម្ពុជាមានការប្រកួតប្រជែងដោយស្មើភាពគ្នា ផ្តល់គុណភាពសេវាខ្ពស់ ថ្លៃថោកសមរម្យ និងបង្កើនចំណូលថវិកាជាតិ ។
ចំណុចសំខាន់ៗចំនួន៤នៃប្រកាសអន្តរក្រសួងលេខ២៣២សហវ.បទ ចុះថ្ងៃទី០៧ ខែធ្នូ ឆ្នាំ២០០៩ រវាងក្រសួងប្រៃសណីយ៍និងទូរគមនាគមន៍ និងក្រសួងសេដ្ឋកិច្ចនិងហិរញ្ញវត្ថុ ស្តីអំពីការកំណត់ថ្លៃអប្បបរមានៃសេវាទូរស័ព្ទចល័ត អចល័ត និងថ្លៃតភ្ជាប់បណ្តាញ គឺ ៖
១-ការកំណត់ថ្លៃអប្បបរមានៃសេវាទូរស័ព្ទចល័តហៅក្នុងបណ្តាញតែមួយចំនួន៤,៥សេនដុល្លារអាមេរិកក្នុង១នាទី "ដោយពុំទាន់គិតអាករលើតម្លៃបន្ថែម និងអាករពិសេស" ។
២-ការកំណត់ថ្លៃសេវាអប្បបរមាក្នុងការហៅឆ្លងកាត់បណ្តាញចំនួន៥,៩៥សេនដុល្លារអាមេរិកក្នុង១នាទី "ដោយពុំទាន់គិតអាករលើតម្លៃបន្ថែម និងអាករពិសេស" ។
៣-ការគិតតម្លៃសេវាជាវិនាទីជំនួសការគិតជានាទី ។
៤-ការទាក់ទាញអតិថិជនដោយរូបភាពបញ្ចុះថ្លៃ ការផ្តល់ជាប្រាក់ ជានាទី ឬរូបភាពផ្សេងៗទៀតតាមរយៈការឃោសនាពាណិជ្ជកម្មនៃប្រតិបត្តិករទាំងអស់ ត្រូវមានការអនុញ្ញាតជាមុនពីក្រសួងប្រៃសណីយ៍និងទូរគមនាគមន៍ ខ្លឹមសារនិងរូបភាពនៃការឃោសនាពាណិជ្ជកម្មនីមួយៗតាមគ្រប់បណ្តាញឃោសនា គ្រប់ទីសាធារណៈមិនត្រូវលើសពីរយៈពេល៣០ថ្ងៃ គិតចាប់ពីថ្ងៃទទួលបានការអនុញ្ញាតពីក្រសួង និងការឃោសនាពាណិជ្ជកម្មអំពីថ្លៃតភ្ជាប់ទូរស័ព្ទចល័តក្នុងបណ្តាញតែមួយ មិនត្រូវទាបជាង៥០%នៃថ្លៃសេវាអប្បបរមាចំនួន៤,៥សេនដុល្លារអាមេរិកក្នុង១នាទី ។
មន្ត្រីជាន់ខ្ពស់ក្រសួងប្រៃសណីយ៍និងទូរគមនាគមន៍ បានលើកឡើងថា ប្រកាសអន្តរក្រសួងលេខ២៣២នេះ រៀបចំឡើងដោយបានស្រាវជ្រាវ សិក្សា និងវិភាគយ៉ាងល្អិតល្អន់លើមូលដ្ឋានដូចតទៅ ៖
១-ប្រកាសរបស់ក្រសួងប្រៃសណីយ៍និងទូរគមនាគមន៍លេខ២៥៩បទ.ប្រក ចុះថ្ងៃទី២៣ ខែកក្កដា ឆ្នាំ២០០៣ ស្តីពីការតភ្ជាប់រវាងបណ្តាញទូរស័ព្ទ ។
២-សារាចរអន្តរក្រសួងលេខ១២៧៧សហវ.បទ ចុះថ្ងៃទី២៩ ខែកញ្ញា ឆ្នាំ២០០៩ រវាងក្រសួងសេដ្ឋកិច្ចនិងហិរញ្ញវត្ថុ និងក្រសួងប្រៃសណីយ៍និងទូរគមនាគមន៍ ស្តីអំពីវិធានការទប់ស្កាត់ភាពពុំស្មោះត្រង់នៃការប្រកួតប្រជែងក្នុងវិស័យទូរគមនាគមន៍ ។
៣-បទបញ្ជារបស់រាជរដ្ឋាភិបាលលេខ០១បប ចុះថ្ងៃទី២១ ខែតុលា ឆ្នាំ២០០៩ ស្តីពីវិធានការបញ្ឈប់ការបិទខ្ទប់ការភ្ជាប់បណ្តាញសេវាទូរស័ព្ទគ្នាទៅវិញទៅមករវាងប្រតិបត្តិករទូរស័ព្ទមួយទៅទូរស័ព្ទមួយទៀត ។
៤-ឯកសាររបស់សហភាពទូរគមនាគមន៍អន្តរជាតិ "ITU" និងអង្គការពាណិជ្ជកម្មពិភពលោក "WTO" ។
៥-ស្មារតីនៃការពិគ្រោះយោបល់ជាមួយជំនាញការនៃធនាគារអភិវឌ្ឍន៍អាស៊ី "ADB" ។
៦-ឯកសារថ្លៃដើមលម្អិត "Cost based" ដែលផ្តល់ដោយប្រតិបត្តិករ ។
៧-ការសិក្សាប្រៀបធៀបជាមួយថ្លៃសេវាតភ្ជាប់ទូរស័ព្ទដែលកំពុងអនុវត្តនៅប្រទេសជិតខាងក្នុងតំបន់ ៕
Source from: www.dtn7.com
Loading...
Post a Comment