អភិបាលខណ្ឌពោធិ៍សែនជ័យ ឃុបឃិតឲ្យឈ្មួញកាយរណ្តៅដី និងលុបប្រឡាយតាមចិត្ត
រាជធានីភ្នំពេញ៖នៅក្នុងសង្កាត់ភ្លើងឆេះរទេះខណ្ឌពោធិ៍សែនជ័យសម្បូរទៅដោយរណ្តៅដីយក្សយ៉ាងតិច៤កន្លែងចង់ប៉ុនទន្លេសាបរាជធានីភ្នំពេញ ៖ នៅក្នុងសង្កាត់ភ្លើងឆេះរទេះ ខណ្ឌពោធិ៍សែនជ័យ សម្បូរទៅដោយរណ្តៅដីយក្ស យ៉ាងតិច ៤កន្លែង ចង់ប៉ុនទន្លេសាប មានជម្រៅដូចសមុទ្រ ដែលច្បាប់រ៉ែនិងថាមពល កំណត់ឲ្យជីកត្រឹមតែ ជម្រៅ ៣ទៅ៤ ម៉ែត្រប៉ុណ្ណោះប៉ុន្តែអាចមានករណីលើកលែង រហូតដល់៥ម៉ែត្រ ប៉ុន្តែរណ្តៅចំនួន ៤កន្លែងនេះ មានរណ្តៅខ្លះជម្រៅ រហូតដល់ជិត ២០ម៉ែត្រ និងរណ្តៅខ្លះមានជម្រៅជិត ១០ម៉ែត្រ ដែលផ្ទុយពីច្បាប់ ដែលបានកំណត់ តែគេមិនដឹងថា សាលារាជធានីភ្នំពេញ និងសាលាខណ្ឌពោធិ៍សែនជ័យ បានដឹងអំពីរណ្តៅខាងលើនេះ ឬមួយលោកបានដឹងដែរ តែធ្វើជាមិនដឹង ?
មិនតែប៉ុណ្ណោះក្រុមឈ្មួញទាំងនេះ បានលុបប្រឡាយទឹករួមរបស់អ្នកភូមិ យកធ្វើជាប្រយោជន៍ផ្ទាល់ខ្លួន ធ្វើឲ្យប្រជាពលរដ្ឋ នៅក្នុងសង្កាត់ភ្លើងឆេះរទេះ មានការលំបាកខណៈដែលស្រូវ របស់ពួកគាត់ជួបគ្រោះរាំងស្ងួត ពីព្រោះច្រើនឆ្នាំមកហើយ ពួកគាត់អាស្រ័យផលបានល្អ ដោយសារតែមាន ប្រឡាយទឹកខាងលើនេះ ដើម្បីស្រោចស្របផលដំណាំ ប៉ុន្តែឥឡូវប្រឡាយមួយនេះ បានក្លាយជាផ្លូវសម្រាប់ឡានដឹកដី និងក្លាយជាចិញ្ចើម មាត់រណ្តៅដីអស់ទៅហើយ តើពេលរដូវស្ទូងដកខាងមុខនេះ ពួកគាត់សង្ឃឹមទៅលើអ្វី។
ប្រជាពលរដ្ឋដែលមានស្រែចំការ នៅជាប់មាត់ប្រឡាយទឹក និងក្បែររណ្តៅដីខាងលើ បាននិយាយថា ចាប់តាំងពីមានរណ្តៅដី នៅក្បែរស្រែចំការ របស់ពួកគាត់ នាំឲ្យមានផលពិបាកក្នុងការប្រកបរបរ ធ្វើស្រែចំការ ដោយគ្រាន់តែភ្លៀងធ្លាក់មួយច្រូច ក៏ជ្រាបចូលទៅរណ្តៅដីអស់ ស្រែរបស់ពួកគាត់ គ្មានទឹកមួយតក់ដដែល។ ហើយឥឡូវនេះ ក្រុមឈ្មួញថែមទាំងលុបប្រឡាយទឹក ដែលជាសម្បត្តិរួម របស់ពួកគាត់ យកធ្វើជាកម្មសិទ្ធិផ្ទាល់ខ្លួន ដែលប្រឡាយមួយខ្សែនេះ គឺជាដង្ហើមសម្រាប់ ប្រកបរបរចិញ្ចឹមជីវភាព តាំងពីដូនតាមកម្ល៉េះ។
ដូច្នេះការលុបប្រឡាយទឹករួមនេះ ហាក់បីដូចជាខ្ទប់ដង្ហើម របស់ពួកគាត់ ឲ្យដាច់ខ្យល់ស្លាប់អីចឹង ព្រោះជីវភាពគ្រួសាររបស់ពួកគាត់ រំពឹងទៅលើរបរ ស្រែចំការតែមួយមុខគត់។ ប្រជាពលរដ្ឋមានការងឿងឆ្ងល់ថា អ្នកណាជាអ្នកអនុញាតិ ឲ្យលុបប្រឡាយពួកគាត់ ? តើអាជ្ញាធរមូលដ្ឋាន បានដឹងដែរឬអត់ ? ទើបបណ្តែតបណ្តោយ ឲ្យក្រុមឈ្មួញធ្វើព្យុះធ្វើភ្លៀង បែបនេះ ឬមួយក៏ក្រុមឈ្មួញទាំងនេះ ផ្តល់លាភសក្តារៈ ឲ្យក្រុមមន្ត្រីទាំងនេះ ទើបចេះតែធ្វើមិនដឹងមិនឮ។ លោកចៅសង្កាត់គឺជាម៉ែឪ របស់ពួកគាត់ ប៉ុន្តែលោកចៅសង្កាត់ ភ្លើងឆេះរទេះ បច្ចុប្បន្ននេះ ពុំដែលដឹងពីសុខទុក្ខពួកគាត់ឡើយ ទោះបីជាពួកគាត់ ជួបបញ្ហាអីក៏ជួបទៅ គឺលោកបានត្រឹមតែ ធ្វើហេះហេរ ! ហើយគិតតែផលប្រយោជន៍ ផ្ទាល់ខ្លួនប៉ុណ្ណោះ។
ថៅកែរណ្តៅដីទាំងនោះ រួមមាន ឬី១-ឈ្មោះ ឆេង គង់ ដែលមានជម្រៅជិត ១០ម៉ែត្រ ទី២-ឈ្មោះ ហង្ស សុខលាង ដែលជីកក្នុងជម្រៅជាង ២០ម៉ែត្រ និងទី៣-ឈ្មោះ គឹម គង់ ជីកក្នុងជម្រៅជាង ១០ម៉ែត្រ រីឯថៅកែរណ្តៅដី មួយកន្លែងទៀត ក្បែរផ្លូវរថយន្តនោះ គ្រាន់តែគេស្គាលឈ្មោះថា ទ្រា គឺជីកក្នុងជម្រៅជាង ២០ម៉ែត្រ ដូច្នេះរណ្តៅដីទាំងនេះ គ្មានលោកថៅកែមួយណា ជីកគោរពទៅតាមច្បាប់ រ៉ែនិងថាមពល នោះទេ។ ប៉ុន្តែទោះបីជាយ៉ាងណា ក៏ពុំទាន់មានប្រភពបញ្ជាក់ ឲ្យបានច្បាស់ថា រណ្តៅទាំងនេះមានថៅកែ ឈ្មោះដូចខាងលើ ឬមួយយ៉ាងណានោះទេ។
បើតាមមន្ត្រីមួយចំនួន បានខ្សិបឲ្យដឹងថា រណ្តៅដីទាំងនេះភាគច្រើន ទំនងជាពុំមានច្បាប់ទម្លាប់ ត្រឹមត្រូវនោះទេ ប្រសិនបើគេធ្វើច្បាប់ទម្លាប់ត្រឹមត្រូវនោះ គឺគេត្រូវបង់ពន្ធ សួយសារអាករចូលរដ្ឋ ដោយគិតជាភាគរយពី ៦ទៅ១០ ភាគរយ ដូច្នេះប្រសិនបើគេមានច្បាប់ទម្លាប់ត្រឹមត្រូវនោះ គឺរដ្ឋទទួលបានចំណូល មិនតិចលានទេក្នុងមួយឆ្នាំៗ។ សូមបញ្ជាក់ផងដែរថា កាលពីអំឡុងប៉ុន្មានសប្តាហ៍មុន សាលារាជធានី បានចុះបង្ក្រាបរថយន្ត ដឹកដី និងដឹកខ្សាច់ថ្ម ធ្វើឲ្យខូចផ្លូវ ក្នុងសង្កាត់ស្នោរ បានចំនួន ២០គ្រឿង មិនទាន់ដោះស្រាយនៅឡើយទេ៕
Source from: watphnom-news.com
Loading...
Post a Comment