ឧ​ក​ញ៉ា ស្រេង ម៉េង ក្លាយ​​​ជា​​មេ​​ឈ្មួញ ដ៏​​មាន​​ឥ​ទ្ធិ​ពល​​និង​​ដុះ​​ស្នឹម ប្រ​ចាំ​ខេត្ត​​ព្រះ​វិ​ហារ ជ្រក​​ក្រោម​​ឥ​ទ្ធិ​ពល​​ឧ​ក​ញ៉ា ទ្រី​ភាព​ យ៉ាង​ក្រ​អឺត​ក្រ​ទ​ម

Daily News, In Khmer, sex, Sexy, Social News

3/23/2014 02:00:00 PM

ឧកញ៉ា ស្រេង ម៉េង ក្លាយជាមេឈ្មួញ ដ៏មានឥទ្ធិពលនិងដុះស្នឹម ប្រចាំខេត្តព្រះវិហារ ជ្រកក្រោមឥទ្ធិពលឧកញ៉ា ទ្រីភាព យ៉ាងក្រអឺតក្រទម

ខេត្តព្រះវិហារ ៖ មួយរយៈកន្លងមកនេះ សមត្ថកិច្ចបានចេញប្រតិបត្តិការ បង្ក្រាបការដឹកជញ្ជូនឈើខុសច្បាប់ យ៉ាងគគ្រឹកគគ្រេងទាំង តាមរថយន្តតូចនិងរថយន្តធំ ប៉ុន្តែមិនដែលប៉ះពាល់ដល់សកម្មភាព ប្រមូលទិញឈើខុសច្បាប់របស់ឧកញ៉ា ស្រេង ម៉េង ដែលជាមេការ របស់ក្រុមហ៊ុន ទ្រី ភាព ដ៏មានឥទ្ធិពលប្រចាំខេត្តព្រះវិហារ ម្តងណាឡើយ។ ដូចដែលប្រជាពលរដ្ឋ បានរាយការណ៍ថា ទីតាំងសិប្បកម្មនិងឃ្លាំងស្តុកឈើ ដ៏ធំមួយកន្លែង ស្ថិតនៅក្នុងឃុំធ្មា ស្រុកជ័យសែន ខេត្តព្រះវិហារ មានសកម្មភាពប្រមូលទិញ ឈើប្រណីតលេខ១ ប្រភេទ បេង នាងនួន ធ្នង់ ពោលគឺទីតាំងសិប្ប កម្មកែច្នៃឈើដ៏ធំមួយនេះ ស្ថិតក្រោមចាត់ចែងរបស់ ឧកញ៉ា ស្រេង ម៉េង ដោយជ្រកក្រោមឥទ្ធិពល របស់ក្រុមហ៊ុន ទ្រី ភាព កំពុងប្រមូលទិញឈើប្រណីត ដែលមិនមានប្រភពច្បាស់លាស់ យ៉ាងអនាធិបតេយ្យបំផុត ដែលទាមទារឲ្យរដ្ឋមន្ត្រី ក្រសួងកសិកម្ម ពិនិត្យមើលបញ្ហានេះឡើងវិញ ជាបន្ទាន់ផងដែរ។

គេទទួលស្គាល់ថា ក្រុមហ៊ុនឧកញ៉ា ទ្រី ភាព ទទួលបានសិទ្ធិក្នុងការ ប្រមូលទិញឈើដែលបានមកពីការបង្ក្រាប របស់សមត្ថកិច្ច សម្រាប់យកទៅកែច្នៃ ជាគ្រឿងសង្ហារឹមប្រើប្រាស់ក្នុងស្រុក ប៉ុន្តែមានឈ្មួញខិលខូចមួយចំនួន បានប្រើប្រាស់ឥទ្ធិពល របស់ក្រុមហ៊ុន ទ្រី ភាព ក្នុងការប្រមូលទិញ ឈើប្រណីតគ្រប់ប្រភេទ ដោយមិនមានប្រភពច្បាស់លាស់ នាំឲ្យប៉ះពាល់ដល់ឥទ្ធិពល របស់ក្រុមហ៊ុន ទ្រី ភាព ផងដែរ។ ដោយឡែកឧកញ៉ា ស្រេង ម៉េង គេមិនច្បាស់ទេថា គាត់គឺជាមេការរបស់ក្រុមហ៊ុន ទ្រី ភាព ឈរជើងចាំប្រមូលទិញឈើ នៅលើទឹកដីខេត្តព្រះវិហារ ឬក៏យ៉ាងណានោះទេ ប៉ុន្តែភាពអនាធិបតេយ្យ កន្លងមកគឺ ឧកញ៉ា ស្រេង ម៉េង បានប្រមូលទិញឈើ ដែលក្រុមឈ្មួញដឹកជញ្ជូន មកពីស្រុកជ័យសែន ស្រុកឆែប ខេត្តព្រះវិហារទាំងយប់ទាំងថ្ងៃ ហើយឈើទាំងអស់នោះ ត្រូវគេដឹងថា បានមកពីការចូលកាប់បំផ្លាញ តាមព្រៃសហគមន៍ និងតំបន់ព្រៃការពារ ជាដើម ហើយគេដឹងថាឧកញ៉ា ស្រេង ម៉េង គឺជាមេឈ្មួញរកស៊ីដឹកជញ្ជូនឈើដុះស្លែ គ្មាននរណាហ៊ានប៉ះពាល់ឡើយ។

មានការបញ្ជាក់ផងដែរថា សិប្បកម្មកែច្នៃឈើដ៏ធំ របស់ឧកញ៉ា ស្រេង ម៉េង មានមេជាងនិងកម្មករទាំងជនជាតិខ្មែរ និងជនអន្តោប្រវេសន៍យួន ខុសច្បាប់ជាច្រើននាក់ បម្រើការងារនៅទីនោះមិនដែលមាននរណា ហ៊ានទៅសួរនាំនោះទេ ព្រោះមួយម៉ាត់ណាក៏ដោយ ឧកញ៉ា ស្រេង ម៉េង តែងតែយកឥទ្ធិពល របស់ក្រុមហ៊ុន ទ្រី ភាព មកបិទមុខជានិច្ច។ កន្លងមកឧកញ៉ា ស្រេង ម៉េង បានប្រមូលទិញឈើ នៅចំណុចឃុំស្តៅ ស្រុកសង្គមថ្មី ខេត្តព្រះវិហារ យកទៅលក់ឲ្យក្រុមហ៊ុន ទ្រី ភាព ជាប្រភេទឈើធ្នង់ជាង ៦០ម៉ែត្រគូប ក៏គេសង្ស័យថា ឈើទាំងនោះគ្មានប្រភពច្បាស់លាស់ និងបានមកពីការកាប់បំផ្លាញ តាមតំបន់ព្រៃការពារជាដើម។ ពលរដ្ឋមួយចំនួនបានដឹកជញ្ជូន ឈើប្រណីតចេញពីក្នុងព្រៃ តាមរថយន្តកែច្នៃ យកមកលក់ឲ្យឧកញ៉ា ស្រេង ម៉េង ក្នុងតម្លៃថោកៗ ដែលពេលខ្លះឈើរបស់ឧកញ៉ា ស្រេង ម៉េង គរដូចភ្នំរកកន្លែងទុកគ្មានក៏សុំយក ទៅរក្សាទុកនៅតាម ប៉ុស្តិ៍សមត្ថកិច្ចមួយចំនួនផងដែរ ។

គេមិនច្បាស់ទេថា ភាពអនាធិបតេយ្យដែលបង្កឡើង ដោយឧកញ៉ា ស្រេង ម៉េង នាពេលបច្ចុប្បន្ននេះ មានជាប់ជំពាក់ជំពិនអ្វី ជាមួយក្រុមហ៊ុន ទ្រី ភាព ព្រោះជាគោលការណ៍ ក្រុមហ៊ុន ទ្រី ភាព ទទួលបានសិទ្ធិប្រមូលទិញឈើ ដែលបានមកពីការបង្ក្រាប របស់សមត្ថកិច្ច និងមន្ត្រីជំនាញ ប៉ុន្តែឧកញ៉ា ស្រេង ម៉េង បានប្រមូលទិញឈើ ពីប្រជាពលរដ្ឋដែល ដឹកជញ្ជូនចេញពីក្នុងព្រៃទាំងយប់ ទាំងថ្ងៃ គឺជាបទល្មើស និងផ្ទុយពីគោលការណ៍ របស់ក្រុមហ៊ុន ទ្រី ភាព។ ដូច្នេះគេចង់ឃើញ ផ្នែកពាក់ព័ន្ធត្រួតពិនិត្យមើល ទីតាំងសិប្បកម្មកែច្នៃឈើខុសច្បាប់ និងទីតាំងស្តុកឈើទ្រង់ទ្រាយធំ ដែលមានឈើប្រណីតគរដូចភ្នំ របស់ឧកញ៉ា ស្រេង ម៉េង ឡើងវិញផង ព្រោះគេសង្ស័យថា ឧកញ៉ា ស្រេង ម៉េង បានយកឈ្មោះក្រុមហ៊ុនទ្រី ភាព យកទៅប្រើប្រាស់សម្រាប់ ជាផលប្រយោជន៍ផ្ទាល់ខ្លួន និងជាប្រភពនៃការលើកទឹកចិត្ត ឲ្យមានបទល្មើសកាប់បំផ្លាញព្រៃឈើ យ៉ាងវិនាសហិនហោច លើទឹកដីខេត្តព្រះវិហារ៕