សាកលវិទ្យាល័យបញ្ញាជាតិប្តឹងចៅក្រមសាលាដំបូងរាជធានីភ្នំពេញម្នាក់ទៅអង្គភាពប្រឆាំងអំពើពុករលួយ
កាលពីថ្ងៃទី០៩ ខែមេសា ឆ្នាំ២០១៤ម្សិលមិញនេះ សាកលវិទ្យាល័យបញ្ញាជាតិដែលមានលោកបណ្ឌិត រុន រ័ត្នវាសនា ជាសាកលវិទ្យាធិការ បានចេញសេចក្តីថ្លែងការណ៍មួយ ដោយសម្តែងនូវការសោកស្តាយ និងការខកចិត្តចំពោះការវិនិច្ឆ័យសេចក្តីរបស់លោក លី លីបម៉េង ចៅក្រមជំនុំជម្រះសាលាដំបូងរាជធានីភ្នំពេញ ក្នុងសំណុំរឿងព្រហ្មទណ្ឌលេខ២១២០ ចុះថ្ងៃទី០៥ ខែកក្កដា ឆ្នាំ២០១៣ របស់សាលាដំបូងរាជធានីភ្នំពេញ និងបានចេញសាលក្រមព្រហ្មទណ្ឌលេខ២៧ "ខ" ចុះថ្ងៃទី០៧ ខែមេសា ឆ្នាំ២០១៤ និងប្តឹងលោកចៅក្រម លី លីបម៉េង ទៅអង្គភាពប្រឆាំងអំពើពុករលួយ ដេលមាន ឯកឧត្តមបណ្ឌិតទេសរដ្ឋមន្ត្រី ឱម យ៉ិនទៀង ជាប្រធាន ឲ្យស៊ើបអង្កេតភាពមិនប្រក្រតីនៃសាលក្រមដែលសម្តេចដោយលោកចៅក្រមជំនុំជម្រះ ពាក់ព័ន្ធនឹងការស៊ីសំណូក ពុករលួយ ។
ក្រុមប្រឹក្សាភិបាល និងគណៈគ្រប់គ្រងនៃសាកលវិទ្យាល័យបញ្ញាជាតិ បានអះអាងនៅក្នុងសេចក្តីថ្លែងការណ៍របស់ខ្លួន ដោយចាត់ទុកការសម្រេចសេចក្តីរបស់លោកចៅក្រមជំនុំជម្រះ លី លីបម៉េង ថា បានរំលោភយ៉ាងធ្ងន់ធ្ងរទៅលើសេចក្តីសម្រេចអធិបញ្ជារបស់អគ្គព្រះរាជអាជ្ញាអមសាលាឧទ្ធរណ៍ និងបានលុបលាងអំពើឃោរឃៅរបស់ជនជាប់ចោទឈ្មោះ ហ៊យ ហ៊ាង ជាមន្ត្រីកងរាជអាវុធហត្ថ និងគូកន ដែលបំផ្លិចបំផ្លាញទ្រព្យសម្បត្តិរបស់សាកលវិទ្យាល័យអស់ចំនួន៣៣១.៧០០ដុល្លារអាមេរិក ។
ក្រៅពីការប្តឹងទៅអង្គភាពប្រឆាំងអំពើពុករលួយនោះ សាកលវិទ្យាល័យបញ្ញាជាតិក៏បានប្តឹងសុំឲ្យឯកឧត្តម ឌិត មុន្ទី ប្រធានតុលាការកំពូល និងជាប្រធានក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម ជួយស៊ើបអង្កេត និងផ្តល់យុត្តិធម៌ដល់សាកលវិទ្យាល័យផង បន្ទាប់ពីមានការសម្រេចសេចក្តីពោរពេញដោយភាពមិនប្រក្រតីរបស់លោកចៅក្រម លី លីបម៉េង ។
សូមបញ្ជាក់ជូនថា លោក លី លីបម៉េង ជាសិស្សចៅក្រមជំនាន់ទី១ នៃរាជបណ្ឌិត្យសភាវិជ្ជាជីវៈតុលាការ ត្រូវបានតែងតាំងឲ្យទៅបម្រើការងារជាចៅក្រមកម្មសិក្សានៅសាលាដំបូងខេត្តស្វាយរៀង ដោយព្រះរាជក្រឹត្យលេខនស/រកត/១២០៥/៥៣៤ ចុះថ្ងៃទី២៨ ខែធ្នូ ឆ្នាំ២០០៥ ។ លោក លី លីបម៉េង ត្រូវបានតាំងស៊ប់ក្នុងក្របខ័ណ្ឌនៃអង្គចៅក្រម និងចាត់ឲ្យនៅបម្រើការងារនៅសាលាដំបូងខេត្តស្វាយរៀង ដោយព្រះរាជក្រឹត្យលេខនស/រកត/០២០៧/០៦៧ ចុះថ្ងៃទី១៦ ខែកុម្ភៈ ឆ្នាំ២០០៧ ។ ក្រោយមកទៀត លោកចៅក្រម លី លីបម៉េង ក៏ត្រូវបានផ្ទេរភារកិច្ចឲ្យមកបម្រើការងារជាចៅក្រមសាលាដំបូងរាជធានីភ្នំពេញ ដោយព្រះរាជក្រឹត្យលេខនស/រកត/០៧១១/៦៩៥ ចុះថ្ងៃទី២៥ ខែកក្កដា ឆ្នាំ២០១១ ។
លោក លី លីបម៉េង ក៏ជាសមាជិកគណៈមេធាវីនៃព្រះរាជាណាចក្រកម្ពុជាម្នាក់ដែរ ដែលមានអត្តលេខ១៦៧ ប៉ុន្តែសព្វថ្ងៃជាមេធាវីសុំនៅក្រៅបញ្ជីគណៈមេធាវី (ដោយសារមានវិសមិតភាពមកបំពេញការងារជាចៅក្រម) ។ លោកបានធ្វើសច្ចាប្រណិធានចូលប្រកបវិជ្ជាជីវៈមេធាវី នាថ្ងៃទី៣១ ខែធ្នូ ឆ្នាំ១៩៩៧ ៕
Source from: www.dtn7.com
Loading...
Post a Comment