ផ្ទុះកំប៉ុងហ្គាស៍ឆេះផ្ទះបណ្ដែតទឹក របួសប្តីប្រពន្ធនិងកូនតូច ខូចខាតជាង ១ម៉ឺនដុល្លារ
ខេត្តកំពង់ឆ្នាំង៖ផ្ទះបណ្ដែតទឹកមួយខ្នងបានឆាបឆេះនិងមនុស្ស៣នាក់គឺម្តាយឪពុកនិងកូនតូចបានរងរបួសធ្ងន់ស្រាលដោយសារផ្ទុះកំប៉ុងហ្គាសខេត្តកំពង់ឆ្នាំង ៖ ផ្ទះបណ្ដែតទឹកមួយខ្នង បានឆាបឆេះនិងមនុស្ស ៣នាក់គឺម្តាយ ឪពុក និងកូនតូច បានរងរបួសធ្ងន់ស្រាល ដោយសារផ្ទុះកំប៉ុងហ្គាស ពេលកំពុងដាំបបរនៅក្នុងផ្ទះ កាលពីវេលាម៉ោង ៦និង៤០ នាទីយប់ថ្ងៃទី៧ ខែមេសាឆ្នាំ២០១៤ នៅក្នុងភូមិកណ្ដាល សង្កាត់ផ្សារឆ្នាំង ក្រុងកំពង់ឆ្នាំង។
សមត្ថកិច្ចបានឲ្យដឹងថា ជនរងគ្រោះ ជាអ្នកនេសាទត្រីទាំង ៣នាក់នោះ រួមមាន១. ឈ្មោះ ហ៊ីវ អាយុ ២៨ឆ្នាំ ជាប្ដីរងរបួសរលាកភ្លើងធ្ងន់ធ្ងរ ២. ឈ្មោះ ទៀក អាយុ ២៣ឆ្នាំ ជាប្រពន្ធរងរបួសស្រាល និង៣. ឈ្មោះ ហាវ អាយុ ៣ឆ្នាំ ជាកូនរងរបួសស្រាល ពួកគេទាំង ៣នាក់ រស់នៅលើផ្ទះបណ្តែតទឹក ក្នុងភូមិសង្កាត់ កើតហេតុខាងលើ។
មុនពេលកើតហេតុ ក្រុមគ្រួសារជនរងគ្រោះ បានដាំបបរជាមួយចង្ក្រានហ្គាស៍ នៅផ្ទះបាយ ខណៈនោះកំប៉ុងហ្គាស៍ ក៏បានផ្ទុះឡើងបាចសាច ទៅលើគំនរសាច់អួន ដែលទើបជ្រលក់ជ័រកៅស៊ូថ្មីៗ ក៏ផ្ទុះឆេះរាលដាលសន្ធោសន្ធៅឡើង មិនអាចពន្លត់បានភ្លាមៗទេ ទើបអ្នកជិតខាង បាននាំគ្នាកាត់បណ្ដាច់ខ្សែផ្ទះនោះ រុញចេញមកក្រៅឲ្យឆ្ងាយពីគេ ដើម្បីកុំឲ្យឆេះរាលដាល ដល់ផ្ទះអ្នកភូមិដទៃទៀត។
គ្រោះអគ្គីភ័យនេះបានបំផ្លាញ ផ្ទះមួយខ្នងទំហំ ៥គុណ៦ ម៉ែត្រ ឆេះសាច់អួនប្រវែង ៨០ម៉ែត្រ និងមង ២០ដៃ ដែលក្នុងមួយដៃៗ មានប្រវែង ៨០ម៉ែត្រ ធុងទឹកកកធំៗ២ លុយចំនួន ៦០ម៉ឺនរៀល សំលៀកបំពាក់ និងរបស់របរប្រើប្រាស់ក្នុងផ្ទះ ត្រូវឆេះទាំងស្រុង សរុបការខូចខាត ទាំងអស់មានប្រមាណ ១ម៉ឺនដុល្លារ។ ជនរងគ្រោះទាំង ៣នាក់ ត្រូវបានសាច់ញាតិ បញ្ជូនទៅព្យាបាលរបួស នៅគ្លីនិកឯកជនមួយកន្លែង ក្នុងសង្កាត់ផ្សារឆ្នាំង៕
Source from: watphnom-news.com
Loading...
Post a Comment