ផ្កាយ៤ អ៊ី ឈាន ត្រូវបានបញ្ចប់តំណែងពីអភិបាលខេត្តប៉ៃលិនដោយសារតែដល់អាយុចូលនិវត្តន៍
ឯកឧត្តម នាយឧត្តមសេនីយ៍ផ្កាយមាស៤ អ៊ី ឈាន អាយុ៦០ឆ្នាំ នាយទាហានជាន់ខ្ពស់នៃកងយោធពលខេមរភូមិន្ទ អត្តលេខ០០៣៨០៤ និងមានឋានន្តរស័ក្តិជាឧត្តមមន្ត្រីថ្នាក់លេខ១ ជាអភិបាលនៃគណៈអភិបាលខេត្តប៉ៃលិន ដែលល្បីល្បាញខាងជាប់ឈ្មោះជាគ្រួសារមហាអំណាចស្តេចត្រាញ់ប្រចាំខេត្តប៉ៃលិន ដ្បិតមានភរិយាឈ្មោះ បាន ស្រីមុំ ជាអ្នកតំណាងរាស្ត្រមណ្ឌលខេត្តប៉ៃលិន មកពីគណបក្សប្រជាជនកម្ពុជាផងនោះ ត្រូវបានដាក់ឲ្យចូលនិវត្តន៍ក្នុងក្របខ័ណ្ឌមុខងារសាធារណៈហើយ ដោយព្រះរាជក្រឹត្យលេខនស/រកត/០២១៤/២១១ ចុះថ្ងៃទី១៧ ខែកុម្ភៈ ឆ្នាំ២០១៤ ។
លើសពីនេះ ឯកឧត្តមនាយឧត្តមសេនីយ៍ផ្កាយមាស៤ អ៊ី ឈាន ក៏ត្រូវបានបញ្ចប់មុខតំណែងពីអភិបាលនៃគណៈអភិបាលខេត្តប៉ៃលិនផងដែរ បន្ទាប់ពីដល់អាយុត្រូវចូលនិវត្តន៍ ហើយមុខតំណែងជាអភិបាលនៃគណៈអភិបាលខេត្តប៉ៃលិនរបស់ឯកឧត្តមនាយឧត្តមសេនីយ៍ផ្កាយមាស៤ អ៊ី ឈាន នឹងត្រូវផ្លាស់ចេញជាស្ថាពរនៅថ្ងៃទី៣១ ខែឧសភា ឆ្នាំ២០១៤ខាងមុខ ដោយលោក កើត សុធា ត្រូវឡើងកាន់មុខតំណែងជាអភិបាលនៃគណៈអភិបាលខេត្តប៉ៃលិនជំនួសវិញម្តង ។
ក្រុមអ្នកតាមដានស្ថានការណ៍នយោបាយនៅកម្ពុជា បានលើកឡើងថា ការបញ្ចប់មុខតំណែងឯកឧត្តមនាយឧត្តមសេនីយ៍ផ្កាយមាស៤ អ៊ី ឈាន ពីអភិបាលនៃគណៈអភិបាលខេត្តប៉ៃលិននោះ គឺដោយសារឯកឧត្តមរូបនេះត្រូវដល់អាយុចូលនិវត្តន៍ ហើយត្រូវបានរាជរដ្ឋាភិបាលដាក់ឲ្យចូលនិវត្តន៍រួចរាល់ប៉ុណ្ណោះ តែប្រសិនបើឯកឧត្តមនាយឧត្តមសេនីយ៍ផ្កាយមាស៤ អ៊ី ឈាន មិនទាន់ដល់អាយុត្រូវចូលនិវត្តន៍ ឬមិនត្រូវបានរាជរដ្ឋាភិបាលដាក់ឲ្យចូលនិវត្តន៍នោះ ទំនងជាឯកឧត្តមរូបនេះនឹងបន្តកាន់អំណាចជាអភិបាលនៃគណៈអភិបាលខេត្តប៉ៃលិនតទៅទៀតគ្មានពេលសម្រាកឡើយ ។
តាមការកត់សម្គាល់ជាក់ស្តែងបានបង្ហាញឲ្យឃើញថា មន្ត្រីសំខាន់ៗរបស់គណបក្សប្រជាជនកម្ពុជា ដែលបានដាក់ឲ្យចូលនិវត្តន៍រួចហើយក៏ដោយ ជាពិសេសមន្ត្រីអតីតជាអភិបាលខេត្ត-រាជធានីដ៏មានឥទ្ធិពល គឺបន្ទាប់ពីបានដាក់ឲ្យចូលនិវត្តន៍ ប្រសិនបើមិនជាប់ឈ្មោះជាអ្នកតំណាងរាស្ត្រ ក៏អាចបន្តទទួលបានងារ និងឋានៈជាឯកឧត្តមតទៅទៀតដែរ ដោយអាចតែងតាំងឲ្យមានមុខតំណែងនយោបាយ ដូចជាអនុរដ្ឋលេខាធិការក្រសួង រដ្ឋលេខាធិការក្រសួង ទីប្រឹក្សាក្រសួង ទីប្រឹក្សាថ្នាក់ដឹកនាំ ឬជាទីប្រឹក្សារាជរដ្ឋាភិបាល…។ល។
ទោះយ៉ាងណាក៏ដោយ មន្ត្រីរាជការ និងប្រជាពលរដ្ឋ ព្រមទាំងអ្នកប្រកបរបរមុខជំនួញផ្សេងៗនៅខេត្តប៉ៃលិន បានលើកឡើងថា ក្នុងករណីឯកឧត្តមនាយឧត្តមសេនីយ៍ផ្កាយមាស៤ អ៊ី ឈាន បញ្ចប់មុខតំណែងពីអភិបាលនៃគណៈអភិបាលខេត្តប៉ៃលិន គឺអាចកាត់បន្ថយឥទ្ធិពលគ្រួសារមហាអំណាចនេះបានខ្លះៗ ដ្បិតកន្លងមក គ្រួសារនេះប្តីជាអភិបាលនៃគណៈអភិបាលខេត្ត បម្រើការងារក្នុងស្ថាប័ននីតិប្រតិបត្តិចំណុះក្រសួងមហាផ្ទៃ រីឯប្រពន្ធជាអ្នកតំណាងរាស្ត្រក្នុងស្ថាប័ននីតិប្បញ្ញត្តិ ៕
Source from: www.dtn7.com
Loading...
Post a Comment