មន្ត្រីកងរាជអាវុធហត្ថលើផ្ទៃប្រទេសត្រូវចោរប្លន់លុយ២ម៉ឺនដុល្លារទើបដឹងថាជាអ្នករត់ការសេវាលុយឲ្យក្រុមហ៊ុនប្តូរប្រាក់លីហួរ
បណ្តាញសារព័ត៌មានក្នុងស្រុកបានចុះផ្សាយថា មន្ត្រីកងរាជអាវុធហត្ថលើផ្ទៃប្រទេសម្នាក់ត្រូវបានក្រុមចោរប្រដាប់អាវុធចំនួន២នាក់ ជិះទោចក្រយានយន្តមួយគ្រឿងមិនចាំម៉ាក ធ្វើសកម្មភាពភ្ជង់ប្លន់យកកាបូបលុយអស់ប្រាក់ប្រមាណ២ម៉ឺនដុល្លារអាមេរិក ខណៈកំពុងជិះទោចក្រយានយន្តម្នាក់ឯងម៉ាក Honda Dream C125 ស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ 1CN-1936 តាមបណ្តោយវិថីព្រះមុនីរ៉េត ទល់មុខផ្សារស្ទឹងមានជ័យថ្មី សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ នៅវេលាម៉ោងប្រមាណ០៨និង១៥នាទីព្រឹក នាថ្ងៃទី១៨ ខែកក្កដា ឆ្នាំ២០១៤នេះ ។
សមត្ថកិច្ចបានប្រាប់ឲ្យដឹងថា មន្ត្រីកងរាជអាវុធហត្ថលើផ្ទៃប្រទេសដែលត្រូវក្រុមចោរប្រដាប់អាវុធភ្ជង់ប្លន់យកកាបូបលុយនោះ មានឈ្មោះ ទីន វណ្ណៈ ភេទប្រុស អាយុ៣៣ឆ្នាំ និងធ្វើជាអ្នករត់ការសេវាលុយយកទៅដាក់តាមខេត្ត សាខាក្រុមហ៊ុនប្តូរប្រាក់លីហួរទៀតផង ។
មជ្ឈដ្ឋានប្រជាពលរដ្ឋបានសម្តែងនូវការចាប់អារម្មណ៍ផង និងរិះគន់ផងថា មានបុគ្គលមួយចំនួនឋិតក្នុងក្របខ័ណ្ឌជាមន្ត្រីកងរាជអាវុធហត្ថលើផ្ទៃប្រទេស ត្រូវមានកាតព្វកិច្ចបម្រើប្រជាពលរដ្ឋ ដ្បិតទទួលប្រាក់បៀវត្សរ៍ពីរដ្ឋជាញើសឈាមរបស់ប្រជាពលរដ្ឋ បែរជាទៅបម្រើការងាររកស៊ីជាមួយក្រុមហ៊ុន ឬទៅកាងការពារផលប្រយោជន៍ឲ្យក្រុមហ៊ុនឯកជន ដើម្បីផលប្រយោជន៍ផ្ទាល់ខ្លួនទៅវិញ ជាហេតុធ្វើឲ្យប៉ះពាល់ដល់កិត្យានុភាពកងយោធពលខេមរភូមិន្ទ ជាពិសេសស្ថាប័នកងរាជអាវុធហត្ថ និងខូចខាតដល់ផលប្រយោជន៍ជាតិយ៉ាងធ្ងន់ធ្ងរ ។
សូមឯកឧត្តម នាយឧត្តមសេនីយ៍ផ្កាយមាស៤ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស មេត្តាធ្វើការពិចារណាទៅលើករណីដែលមន្ត្រីកងរាជអាវុធហត្ថ ឋិតក្នុងក្របខ័ណ្ឌកងកម្លាំងរបស់ជាតិ បែរជាមានការពាក់ព័ន្ធនឹងមុខរបរផ្ទាល់ខ្លួនជាមួយក្រុមហ៊ុនឯកជន ដើម្បីវេចខ្ចប់ផលប្រយោជន៍ផ្ទាល់ខ្លួននោះផង ដើម្បីកុំឲ្យប៉ះពាល់ដល់មុខមាត់របស់ស្ថាប័នកងរាជអាវុធហត្ថទាំងមូល ៕
Source from: www.dtn7.com
Loading...
Post a Comment