ថ្នាក់ដឹកនាំកំពូលរបស់បក្សធំៗទាំងពីរសម្រេចជួបប្រជុំគ្នានៅថ្ងៃស្អែក ២២ កក្កដា
សម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំង អនុប្រធានគណបក្សប្រជាជនកម្ពុជាដ៏មានឥទ្ធិពល អ្នកតំណាងរាស្ត្រមណ្ឌលខេត្តកណ្តាល និងជានាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តមសម រង្ស៊ី ប្រធានគណបក្សសង្គ្រោះជាតិនឹងជួបប្រជុំជាមួយគ្នានៅថ្ងៃស្អែកទី២២ ខែកក្កដា ឆ្នាំ២០១៤ វេលាម៉ោង០៩ព្រឹកខាងមុខ នៅវិមានព្រឹទ្ធសភាដើម្បីពិភាក្សាលម្អិតរកដំណោះស្រាយនយោបាយរួមឈានទៅបញ្ចប់សភាពការណ៍តានតឹងរវាងគណបក្សនយោបាយធំៗទាំងពីរ ដែលមានអាសនៈនៅក្នុងរដ្ឋសភាបច្ចុប្បន្ន ។
យោងតាមសេចក្តីប្រកាសព័ត៌មានរបស់គណបក្សប្រជាជនកម្ពុជានិងគណបក្សសង្គ្រោះជាតិ កាលពីថ្ងៃទី២០ ខែកក្កដា ឆ្នាំ២០១៤ម្សិលមិញនេះ បានបញ្ជាក់ថា «ក្នុងស្មារតីបង្រួបបង្រួមជាតិ ផ្សះផ្សាជាតិនិងឯកភាពជាតិដោយឈរលើការគោរពផលប្រយោជន៍ដ៏ឧត្តុង្គឧត្តមរបស់ប្រទេសជាតិនិងប្រជារាស្ត្រ គណបក្សប្រជាជនកម្ពុជា និងគណបក្សសង្គ្រោះជាតិបានឯកភាពគ្នាដោះស្រាយបញ្ចប់បញ្ហានយោបាយដែលកើតមានក្រោយការបោះឆ្នោត ជ្រើសតាំងតំណាងរាស្ត្រនីតិកាលទី៥នៃរដ្ឋសភា នាថ្ងៃទី២៨ ខែកក្កដា ឆ្នាំ២០១៣ រហូតដល់បច្ចុប្បន្ននេះ ដោយផ្អែកលើមូលដ្ឋាននៃការព្រមព្រៀងគ្នាជាគោលការណ៍រវាងសម្តេចអគ្គមហាសេនាបតីតេជោ ហ៊ុន សែន និងឯកឧត្តម សម រង្ស៊ី កាលពីថ្ងៃទី០៩ ខែមេសា ឆ្នាំ២០១៤ » ។
មូលដ្ឋាននៃការព្រមព្រៀងគ្នាជាគោលការណ៍រវាងបុរសខ្លាំងនិងឯកឧត្តម សម រង្ស៊ី កាលពីថ្ងៃទី០៩ ខែមេសា ឆ្នាំ២០១៤ មុនពិធីបុណ្យចូលឆ្នាំថ្មីប្រពៃណីជាតិ ឆ្នាំ២០១៤នោះ មិនមាននរណាដឹងច្បាស់លាស់ទេ ប៉ុន្តែគ្រាន់បានដឹងថា ពេលនោះ បុរសខ្លាំងបានជួបសន្ទនាគ្នា តាមទូរស័ព្ទជាមួយឯកឧត្តម សម រង្ស៊ី អស់រយៈពេលជិត១ម៉ោង ។
សមាសភាពរបស់គណបក្សប្រជាជនកម្ពុជា ដែលនឹងត្រូវជួបប្រជុំជាមួយគណបក្សសង្គ្រោះជាតិ នៅថ្ងៃស្អែកនោះ គឺមានចំនួន៨នាក់ ដឹកនាំដោយសម្តេចអគ្គមហាសេនាបតីតេជោ ហ៊ុន សែន,ឯកឧតុ្តម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអ្នកតំណាងរាស្ត្រមណ្ឌលខេត្តបាត់ដំបង និងឯកឧត្តម សាយ ឈុំ អនុប្រធានទី១ព្រឹទ្ធសភានៃព្រះរាជាណាចក្រកម្ពុជា និងមានក្រុមជំនួយការចំនួន៥នាក់ រួមមាន៖ ឯកឧត្តម ប្រាក់ សុខុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍, ឯកឧត្តម សោម សឿន រដ្ឋមន្ត្រី ប្រតិភូអមនាយករដ្ឋមន្ត្រី, ឯកឧត្តម សក់ សេដ្ឋា រដ្ឋលេខាធិការក្រសួងមហាផ្ទៃ, ឯកឧត្តម ព្រុំ សុខា រដ្ឋលេខាធិការក្រសួងមហាផ្ទៃ និងឯកឧត្តម កើត រិទ្ធ រដ្ឋលេខាធិការក្រសួងយុត្តិធម៌។ រីឯគណបក្សសង្គ្រោះជាតិ ដែលមានចំនួន៨នាក់ដូចគ្នា ដឹកនាំដោយឯកឧត្តម សម រង្ស៊ី ,ឯកឧត្តម កឹម សុខា អនុប្រធានគណបក្សសង្គ្រោះជាតិ និងជាបេក្ខជនតំណាងរាស្ត្រជាប់ឆ្នោតមណ្ឌលខេត្តកំពង់ចាម និងឯកឧត្តម ប៉ុល ហំម បេក្ខជនតំណាងរាស្ត្រជាប់ឆ្នោតមណ្ឌលខេត្តតាកែវ និងមានក្រុមជំនួយការចំនួន៥នាក់ រួមមាន៖ ឯកឧត្តម សុន ឆ័យ បេក្ខជនតំណាងរាស្ត្រជាប់ឆ្នោតមណ្ឌលរាជធានីភ្នំពេញ, ឯកឧត្តម គួយ ប៊ុនរឿន បេក្ខជនតំណាងរាស្ត្រជាប់ឆ្នោតមណ្ឌលខេត្តកំពង់ចាម, ឯកឧត្តម យឹម សុវណ្ណ បេក្ខជនតំណាងរាស្ត្រជាប់ឆ្នោតមណ្ឌលរាជធានីភ្នំពេញ, ឯកឧត្តម យ៉ែម បុញ្ញឫទ្ធិ បេក្ខជនតំណាងរាស្ត្រជាប់ឆ្នោតមណ្ឌលខេត្តព្រៃវែង និងឯកឧត្តម អេង ឆៃអ៊ាង បេក្ខជនតំណាងរាស្ត្រជាប់ឆ្នោតមណ្ឌលខេត្តកណ្តាល។
មជ្ឈដ្ឋានអ្នកតាមដានព្រឹត្តិការណ៍នយោបាយនៅកម្ពុជា បានលើកឡើងថា ប្រសិនបើគណបក្សសង្គ្រោះជាតិ បង្ហាញនូវជំហរទោរទន់ នៅចំពោះមុខគណបក្សប្រជាជនកម្ពុជា របស់បុរសខ្លាំង គឺលទ្ធផលនៃកិច្ចប្រជុំថ្ងៃស្អែកអាចនឹងបើកផ្លូវឲ្យមានការដោះលែងបេក្ខជនកតំណាងរាស្ត្រជាប់ឆ្នោតជិត១០នាក់របស់គណបក្សសង្គ្រោះជាតិដែលកំពុងជាប់ឃុំនៅក្នុងពន្ធនាគារព្រៃសក្រោមរូបភាពសម្របសម្រួលខាងនយោបាយតែម្តង៕
Source from: www.dtn7.com
Loading...
Post a Comment