ជនសង្ស័យម្នាក់រត់រួចខ្លួនបាត់ស្រមោលពេលប៉ូលិសបណ្តើរមកតុលាការហើយធ្វេសប្រហែស
មានហេតុការណ៍ភ្ញាក់ផ្អើល និងហួសចិត្តមួយបានកើតឡើងនាវេលាម៉ោង១៦ រសៀល ថ្ងៃទី២១ ខែកក្កដា ឆ្នាំ២០១៤នេះ នៅសាលាដំបូងរាជធានីភ្នំពេញ ដោយជនសង្ស័យម្នាក់ដែលសមត្ថកិច្ចនគរបាលខណ្ឌពោធិ៍សែនជ័យបណ្តើរយកមកឲ្យតុលាការដើម្បីធ្វើការចោទប្រកាន់ និងចាត់ការតាមច្បាប់នោះ បានរត់គេចខ្លួនបាត់ស្រមោលដោយសុវត្ថិភាព ខណៈដែលមន្ត្រីនគរបាលយុត្តិធម៌កំពុងបំពេញបែបបទជាមួយមន្ត្រីតុលាការ។
ប្រភពព័ត៌មានពីសមត្ថកិច្ចបានឲ្យដឹថា ជនសង្ស័យដែលបានរត់រួចខ្លួនដោយសុវត្ថិភាពសឹងមិនគួរឲ្យជឿនោះ មានឈ្មោះ ភឿន ប៊ុនបញ្ញា ភេទប្រុស អាយុ២៣ឆ្នាំ មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ។ ជនសង្ស័យរូបនេះ ត្រូវបាននគរបាលយុត្តិធម៌ខណ្ឌពោធិ៍សែនជ័យឃាត់ខ្លួនកាលពីថ្ងៃទី១៧ ខែកក្កដា ឆ្នាំ២០១៤ ពីបទទទួលផលចោរកម្មក្នុងអំពើយកទោចក្រយានយន្តពីចោរលក់ឲ្យទៅប្អូន ហើយត្រូវបានម្ចាស់ចក្រយានយន្តឃើញ និងស្គាល់ទោចក្រយានយន្តរបស់ខ្លួនក៏ប្តឹងទៅសមត្ថកិច្ចនគរបាលឲ្យឃាត់ខ្លួនតែម្តង។
ក្រោយពេលជនសង្ស័យបានរត់គេចខ្លួនបាត់ភ្លាមៗគេឃើញកងកម្លាំងនគរបាលចម្រុះខណ្ឌទាំង១២ក្នុងរាជធានីភ្នំពេញស្វះស្វែងតាមរកចាប់ខ្លួនជនសង្ស័យមកវិញ ខណៈដែលមជ្ឈដ្ឋាននានាមិនសូវមានសង្ឃឹមថានឹងអាចចាប់ខ្លួនជនសង្ស័យបានមកវិញនោះឡើយ។
មជ្ឈដ្ឋានអ្នកច្បាប់ និងប្រជាពលរដ្ឋដែលបានឃើញហេតុការណ៍នេះ បាននិយាយគ្រប់ៗគ្នាថា សមត្ថកិច្ចនគរបាលយុត្តិធម៌ធ្វើការធ្វេសប្រហែស ដែលជាកំហុសឆ្គងដ៏ធំ ទើបធ្វើឲ្យជនសង្ស័យមានឱកាសបានរត់គេចខ្លួនរួច ឬក៏អាចជាចេតនារបស់សមត្ថកិច្ច ដើម្បីឲ្យជនសង្ស័យមានឱកាសរត់យករួចខ្លួនផងក៏ថាបាន៕
Source from: www.dtn7.com
Loading...
Post a Comment