ភ្ញាក់ផ្អើលនឹងរឿងបញ្ចេញឈើគ្រញូងតម្លៃរាប់សែនដុល្លារពីក្នុងឃ្លាំងខណ្ឌរដ្ឋបាលព្រៃឈើខេត្តកំពង់ឆ្នាំងស្ងាត់ៗ
មានរឿងគួរឲ្យភ្ញាក់ផ្អើលនិងចាប់អារម្មណ៍មួយបានកើតឡើងកាលពីរសៀលថ្ងៃទី០១ ខែសីហា ឆ្នាំ២០១៤ម្សិលមិញនេះ ដោយគេបានឃើញកម្មករជាច្រើននាក់បាននាំគ្នាជញ្ជូនឈើប្រណីតប្រភេទឈើគ្រញូងច្រើនម៉ែត្រគូប ចេញពីឃ្លាំងរបស់ខណ្ឌរដ្ឋបាលព្រៃឈើខេត្តកំពង់ឆ្នាំង ដាក់ទៅលើរថយន្តប្រភេទយីឌុបដ៏ធំមួយ ក្រោមការត្រួតពិនិត្យចាត់ចែងពីសំណាក់នាយរងខណ្ឌរដ្ឋបាលព្រៃឈើម្នាក់ ខណៈដែលឈើគ្រញូងទាំងនោះគឺសុទ្ធតែជាឈើដែលក្រុមសមត្ថកិច្ចចម្រុះបង្ក្រាបចាប់បាន និងរឹបអូសពីជនល្មើសប្រគល់ឲ្យទៅជំនាញរដ្ឋបាលព្រៃឈើរក្សាទុកធ្វើជាវត្ថុតាង ។
នៅក្នុងហេតុការណ៍គួរឲ្យចាប់អារម្មណ៍ទាក់ទងនឹងការដឹកជញ្ជូនឈើគ្រញូងដាក់រថយន្តយីឌុបចេញពីឃ្លាំងខណ្ឌរដ្ឋបាលព្រៃឈើខេត្តកំពង់ឆ្នាំងដោយស្ងាត់ៗនេះ គឺនៅពេលដែលអ្នកសារព័ត៌មានភ្ញាក់ផ្អើលនាំគ្នាចុះទៅយកព័ត៌មាន ស្រាប់តែទទួលរងនូវការស្តីបន្ទោស និងការប្រើពាក្យពេជ្រអសុរោះយ៉ាងច្រើនពីនាយរងខណ្ឌរដ្ឋបាលព្រៃឈើ ដែលឈរមើលការខុសត្រូវពេលកម្មករកំពុងលើកឈើដាក់រថយន្ត ហាក់មានចេតនាលាក់បាំងមិនឲ្យអ្នកសារព័ត៌មានដឹងរឿងរ៉ាវនេះឡើយ ខណៈដែលឃ្លាំងដាក់ឈើរបស់ខណ្ឌរដ្ឋបាលព្រៃឈើខេត្តកំពង់ឆ្នាំងធ្លាប់បាត់បង់ឈើជាញឹកញាប់ ហើយមិនដែលរកឃើញមុខសញ្ញាចោរលួចឈើទេ ។
មន្ត្រីរាជការបម្រើការងារនៅក្រសួងសេដ្ឋកិច្ចនិងហិរញ្ញវត្ថុមួយរូប បាននិយាយឲ្យដឹងថា តាមនីតិវិធីក្នុងករណីលក់ឈើដែលសមត្ថកិច្ចបង្ក្រាបបានពីក្រុមជនល្មើសទុកជាវត្ថុតាង ដើម្បីបានជាប្រយោជន៍ថវិការដ្ឋនោះ គឺត្រូវអនុវត្តន៍តាមគោលការណ៍ដេញថ្លៃជាសាធារណៈ តាមរយៈគណៈកម្មការចម្រុះមួយដោយអាជ្ញាធរខេត្ត ក៏អាចចូលរួមដឹងឮផងដែរ មិនអាចប្រព្រឹត្តឡើងដោយស្ងាត់ៗលាក់កំបាំងនោះឡើយ ។
ដោយឡែក ពាក់ព័ន្ធនឹងរឿងបញ្ចេញឈើគ្រញូងចេញពីឃ្លាំងខណ្ឌរដ្ឋបាលព្រៃឈើខេត្តកំពង់ឆ្នាំងដ៏ច្រើនម៉ែត្រគូប តាមរថយន្តយីឌុបនេះ គឺឯកឧត្តម ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង បានមានប្រសាសន៍ប្រាប់បណ្តាញអ្នកសារព័ត៌មានថា ឯកឧត្តមមិនទាន់បានដឹងពីករណីនេះទេ ចាំឯកឧត្តមសួរនាំទៅមន្ត្រីជំនាញសិន ។
ប្រភពពីមន្ត្រីខណ្ឌរដ្ឋបាលព្រៃឈើម្នាក់ដែលសុំមិនបញ្ចេញឈ្មោះ បានបង្ហើបប្រាប់ឲ្យដឹងថា ឈើគ្រញូងដែលដឹកចេញពីឃ្លាំងខណ្ឌរដ្ឋបាលព្រៃឈើខេត្តកំពង់ឆ្នាំងនេះ ត្រូវបានលក់ឲ្យទៅក្រុមហ៊ុនមួយរួចទៅហើយ តែត្រង់ថា ដេញថ្លៃជាសាធារណៈ ឬក៏អត់នោះ លោកក៏មិនបានដឹងច្បាស់ដែរ ។
មជ្ឈដ្ឋានអ្នកតាមដានបទល្មើសឧក្រិដ្ឋកម្មព្រៃឈើនៅកម្ពុជា បានលើកឡើងថា ថ្វីដ្បិតមានសកម្មភាពបង្ក្រាបបទល្មើសឈើប្រណីត ជាពិសេសប្រភេទឈើគ្រញូងខ្លះៗពីសំណាក់សមត្ថកិច្ចក៏ដោយ ប៉ុន្តែនៅទីបំផុត ឈើដែលរឹបអូសបានពីជនល្មើសទុកជាវត្ថុតាងទាំងនោះ ត្រូវបានធ្លាក់ទៅដល់ដៃក្រុមឈ្មួញឈើគ្រាក់ៗដដែល តាមរយៈការទិញ-លក់ស្ងាត់ៗ ឬតាមរបៀប"ដេញថ្លៃចងមុង" រួចហើយក្រុមឈ្មួញឈើបាននាំចេញទៅប្រទេសវៀតណាម និងប្រទេសចិនបន្តទៀត ខណៈដែលលោកឧកញ៉ា ទ្រី ភាព អគ្គនាយក្រុមហ៊ុន MDS Import Export Co., Ltd. និងត្រូវជាប្អូនធម៌សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា និងជាភរិយារបស់សម្តេចអគ្គមហាសេនាបតីតេជោ ហ៊ុន សែន ហៅបុរសខ្លាំងជានាយករដ្ឋមន្ត្រី នៃព្រះរាជាណាចក្រកម្ពុជា មានការពាក់ព័ន្ធយ៉ាងជ្រៅក្នុងរឿងធ្វើអាជីវកម្មឈើនៅកម្ពុជា ។
របាយការណ៍ស៊ើបអង្កេតរបស់ក្រុមកិច្ចការពិសេសសិទ្ធិមនុស្សនៅកម្ពុជា ចេញផ្សាយកាលពីថ្ងៃទី២០ ខែវិច្ឆិកា ឆ្នាំ២០១៣កន្លងមក បានឲ្យដឹងថា ក្រុមហ៊ុនលោកឧកញ៉ា ទ្រី ភាព បានបង់ប្រាក់ឲ្យក្រុមគ្រួសារបុរសខ្លាំងចំនួនប្រមាណ១លានដុល្លារអាមេរិកក្នុង១ខែ ដើម្បីទទួលបានសិទ្ធិអំណាចកាន់កាប់ និងធ្វើអាជីវកម្មឈើនៅកម្ពុជា នាំចេញទៅប្រទេសវៀតណាម និងប្រទេសចិន ។
ដូច្នេះ ឈើគ្រញូងជាច្រើនម៉ែត្រគូប និងមានតម្លៃរាប់សែនដុល្លារអាមេរិក ដែលបញ្ចេញចេញពីឃ្លាំងរបស់ខណ្ឌរដ្ឋបាលព្រៃឈើខេត្តកំពង់ឆ្នាំង ក៏ដូចជាឃ្លាំងនៅតាមបណ្តាខេត្តផ្សេងៗទៀត ត្រូវបានគេសង្ស័យថា អាចរត់ចូលទៅក្នុងឃ្លាំងរបស់ក្រុមហ៊ុនលោកឧកញ៉ា ទ្រី ភាព តែម្តងនៅដំណាក់កាលចុងក្រោយបំផុត ៕
Source from: www.dtn7.com
Loading...
Post a Comment