ខេត្តព្រះសីហនុ៖ប្រជាជនរស់នៅក្រុម២៧ភូមិ០១សង្កាត់លេខ០៤ក្រុងព្រះសីហនុកំពុងមានកង្វល់ខេត្តព្រះសីហនុ ៖ ប្រជាជនរស់នៅក្រុម ២៧ ភូមិ០១ សង្កាត់លេខ០៤ ក្រុងព្រះសីហនុ កំពុងមានកង្វល់ ជាច្រើនទាក់ទង ទៅនឹងភាពអសកម្ម ដែលបង្កឡើងដោយ មេបនល្បែងស៊ីសង ក៏ដូចជាក្រុមឈ្មួញ ជួញដូរចែកចាយថ្នាំញៀនមិនទាន់ឃើញសមត្ថកិច្ច និងមន្ត្រីជំនាញចាត់វិធានការបង្ក្រាប ឲ្យមានប្រសិទ្ធភាពនៅឡើយទេ ទើបពួកគាត់បានទទូច សូមឲ្យលោក ស្បោង សារ៉ាត ជាអភិបាលខេត្តព្រះសីហនុ មេត្តាពិនិត្យមើលបញ្ហានេះ ឡើងវិញផង។
ប្រជាពលរដ្ឋបានបង្ហើបឲ្យដឹងថា នៅតំបន់នោះមានឈ្មោះ រឹត និងប្រពន្ធឈ្មោះ ចន្ធូ ជាមេក្លោងលក់ចែកចាយ គ្រឿងញៀនដ៏ធំ មិនដែលមាននរណាហ៊ានប៉ះពាល់ទេ។ ដោយឡែកមានឈ្មោះ រិនដា ក៏ជាអ្នកចែកចាយថ្នាំញៀនដ៏សកម្ម រួមជាមួយពួកម្នាក់ទៀត ដែលមិនស្គាល់ឈ្មោះ។ ឈ្មោះ រឹត និងឈ្មោះ រិនដា តែងតែធ្វើសកម្មភាព ចែកចាយគ្រឿងញៀន យ៉ាងឆ្វេចឆ្វាច នៅតាមផ្លូវក្នុងភូមិ យ៉ាងចំហរដូចគេ លក់ស្ករគ្រាប់អីចឹង។ ជាពិសេសនៅចំណុចផ្លូវ ជាច្រកចូលភូមិ ត្រង់បង្គោលភ្លើង កណ្តាលផ្លូវបេនម៉ូតូ ពីមុខតូបលក់បបរ ផ្លូវបំបែកជាបួន បានក្លាយជាស្នាក់ការ ចែកចាយថ្នាំញៀន ជាយូរមកហើយ។
មន្ត្រីតូចតាចម្នាក់ក៏បានលួចបង្ហើប ឲ្យដឹងផងដែរថា ជារឿយៗឈ្មោះ រឹត និងឈ្មោះ រិនដា ធ្វើសកម្មភាពនៅទីនោះ ចាប់ពីម៉ោងប្រហែល ១៦ល្ងាច រហូតដល់ម៉ោង ១៩ ឬ ២០ យប់ ដែលនៅទីនោះក៏មានការលួចលាក់ បើកបនល្បែងស៊ីសងដ៏ធំ ប្រចាំភូមិផងដែរ ។ ប៉ុន្តែឈ្មោះ រឹត នេះក៏មានទីតាំងលក់ និងជក់អចល័ត នៅក្នុងខ្ទមរបស់ខ្លួន ដែលគេដឹងថា ស្ថិតនៅក្រោយផ្ទះឪពុកក្មេកឈ្មោះ ផេង នៅក្នុងក្រុមទី ៣១- ៣៣ ដែលជាកន្លែងលក់ និងចែកចាយដ៏ធំ ហើយធ្វើសកម្មភាពពេញ ២៤ ម៉ោង។ នៅម្តុំនោះ និងតាមបណ្តោយផ្លូវ ឆ្ពោះទៅកាន់ផ្ទះឈ្មោះ រឹត ក៏ជាប្រភពល្បែងស៊ីសង ដែលតែងតែបង្កនូវបញ្ហា និងរំខានភាពសុខសាន្ត នៅក្នុងភូមិផងដែរ ។
មានការបញ្ជាក់ផងដែរថា រីឯចរាចរនៅតំបន់នោះវិញ រឹតតែជាចំណុចមួយ ដ៏ព្រួយបារម្ភយ៉ាងខ្លាំង ដែលបង្កឡើងដោយពួកក្មេងស្ទាវ តែងតែជិះម៉ូតូលឿនៗ ចេញចូលទិញ និងជក់គ្រឿងញៀន នៅទីនោះ។ អ្នកភូមិធ្លាប់បានរាយការណ៍ ជូនអាជ្ញាធរសង្កាត់ និងនគរបាលជំនាញ នៅក្នុងខេត្តជាច្រើនលើកច្រើនសារ និងច្រើនខែមកហើយ តាំងពីពាក់កណ្តាលខែកក្កដា ឆ្នាំ២០១៣ រហូតមកដល់ម៉ោងនេះ។ ប៉ុន្តែមិនទាន់ឃើញមានវិធានការ ចុះមកបង្ក្រាបម្តងណាឡើយ សូម្បីតែវង់ល្បែង ដែលបើកលេង យ៉ាងអនាធិបតេយ្យ ផ្ទុយពីគោលនយោបាយ ភូមិសង្កាត់មានសុវត្ថិភាព ក៏គ្មានការបង្ក្រាបនោះដែរ។
មន្ត្រីតូចតាចមួយចំនួនបានឲ្យដឹងថា ទីតាំងចូលភូមិនិងជា កន្លែងលក់គ្រឿងញៀន ដែលកំពុងមានភាពអនាធិបតេយ្យនោះ ស្ថិតនៅតាមបណ្តោយផ្លូវទៅអូរ ១ ទល់មុខហាងលក់ម៉ូតូ HONDA លីម៉ុងគក់ មានផ្លូវតូចមួយ ខាងឆ្វេងដៃ ក្បែរផ្ទះទន្តពេទ្យ នារី ចូលទៅក្នុងត្រង់ប្រហែល ១២០ ម៉ត្រែ ដែលនៅទីនោះជា ចំណុចផ្លូវបំបែកជាបួន មានបង្គោលភ្លើងកណ្តាលផ្លូវ មានតូបលក់ដូរ មានតូបលក់បបរ និងជាបេនម៉ូតូ ហើយក៏ជាទីតាំងចែកចាយគ្រឿងញៀន ដ៏សកម្មផងដែរ។
ចំណែកទីតាំងមួយទៀត គឺនៅពេលមកដល់ផ្លូវបំបែកជា ៤នោះ ឡើងទៅលើត្រង់ប្រហែល ១០០ ម៉ែត្រ មានផ្ទះល្វែងជួលថ្មីមួយ និងមានផ្លូវបំបែកជាបួន ត្រូវបត់ស្តាំ ចុះទៅក្រោមត្រង់ ប្រហែលជា ១០០ ម៉ែត្រ ខាងឆ្វេងដៃ មានសាលាអង្គការ ម្លប់តាប៉ាង។ ទៅដល់ទីនោះមានផ្លូវបែកជាពីរ មួយផ្លូវទៅមុខត្រង់ប្រហែលជា ៣០ ម៉ែត្រជាផ្លូវទាល់ និងខាងស្តាំនៅផ្ទះទីពីរ គឺជាកន្លែងលក់ និងជក់គ្រឿងញៀន ។ ចំណែកឯផ្លូវបត់ទៅខាងស្តាំ រំលងផ្ទះមួយជាផ្ទះថ្ម មានកម្ពស់ពីរជាន់ ទីនោះគឺជាផ្ទះឪពុកក្មេករបស់ឈ្មោះ រឹត ហើយកូនប្រុសម្នាក់របស់ផ្ទះនេះ ឈ្មោះ ផុន ក៏ជាអ្នកលក់គ្រឿនញៀន នៅឯផ្លូវធំមុខផ្ទះសំណាក់ អូគីណាវ៉ា នៅពេលយប់ផងដែរ៕
Source from: watphnom-news.com
Loading...
Post a Comment