ខេត្តកំពង់ចាម ៖ យ៉ាងហោចណាស់មនុស្ស ៣នាក់បានស្លាប់ និង ១០នាក់ទៀតរងរបួស ធ្ងន់ស្រាលដោយសាររថយន្ត សាំយ៉ុងមួយគ្រឿង ដែលដឹកកម្មករដកដំឡូង បានផ្ទុះកង់ក្រោយខាងឆ្វេង បណ្តាលឲ្យក្រឡាប់ធ្លាក់ផ្លូវ ចាក់មនុស្សចោលពេញផ្លូវជាតិ ខណៈដែលកំពុងបើកបរ តាមផ្លូវជាតិលេខ៧ ក្នុងភូមិខ្ជាយ ឃុំជាំគ្រវៀន ស្រុកមេមត់ កាលពីវេលាម៉ោង ៣រសៀលថ្ងៃទី១១ ខែធ្នូ ឆ្នាំ២០១៣ ។
រថយន្តបង្កហេតុ ម៉ាកសាំយ៉ុង ពណ៌ស ពាក់ស្លាកលេខ ភ្នំពេញ 2O-0862 អ្នកបើកបរបានរត់គេចខ្លួនបាត់ស្រមោល ក្រោយពេលកើតហេតុ ហើយជនរងគ្រោះដែល របួសធ្ងន់និងស្រាល ត្រូវបានដឹកយកទៅសង្គ្រោះ នៅមន្ទីរពេទ្យបង្អែកស្រុកមេមត់ ភ្លាមៗផងដែរ ។ ជនរងគ្រោះដែលស្លាប់ទាំង ៣នាក់រួមមាន ១-ឈ្មោះ លឹម អូន ភេទប្រុស អាយុ ៥៦ឆ្នាំ រស់នៅភូមិបឹងខ្ចង ឃុំពាមបន្ទា ស្រុកកំពង់ត្របែក ខេត្តព្រៃវែង ២-ឈ្មោះ យួស មាឌ ភេទប្រុស អាយុ ៣៧ឆ្នាំ និង៣-ឈ្មោះ ចែម សារ៉ាន់ ភេទស្រី អាយុ ៣៤ឆ្នាំ ជាប្រពន្ធ រស់នៅភូមិជាទាយ ឃុំពាម ស្រុកកំពង់ត្របែក ខេត្តព្រៃវែង ។
រថយន្តឈ្នួលនេះ បានដឹកកម្មករប្រុសស្រីជិត ២០នាក់ចេញពី ស្រុកកំពង់ត្របែក ខេត្តព្រៃវែង ទៅស៊ីឈ្នួលដកដំឡូង នៅស្រុកស្នួល ខេត្តក្រចេះ ហើយពេលដែលរថយន្ត បើកមកដល់ចំណុចកើតហេតុខាងលើ ក៏បានផ្ទុះកង់ក្រោយខាងឆ្វេង រេចង្កូចបណ្តាលក្រឡាប់ ស្លាប់កម្មករ ៣នាក់ភ្លាមៗ ហើយមនុស្ស ១០នាក់ ផ្សេងទៀត បានរងរបួសធ្ងន់ស្រាល ។ សមត្ថកិច្ចនៅកន្លែងកើតហេតុ បានធ្វើការទំនាក់ទំនង ទៅក្រុមគ្រួសារសាច់ញាតិ របស់ជនរងគ្រោះ ឲ្យមកទទួលយកសព ទៅធ្វើបុណ្យតាមប្រពៃណី និងបាននាំយករថយន្តបង្កទៅរក្សាទុក ដើម្បីរងចាំការដោះស្រាយផងដែរ៕
Source from: watphnom-news.com
Loading...
Post a Comment