ក្រុងប៉ោយប៉ែត៖សំណង់ខុសច្បាប់រីកដុះដាលគ្រប់ទីកន្លែងដែលភាគច្រើនមិនបានបង់ពន្ធជូនរដ្ឋហើយប្រជាពលរដ្ឋរាប់រយគ្រួសាររស់នៅលើទឹកដីជាយដែនក្រុងប៉ោយប៉ែតក្រុងប៉ោយប៉ែត ៖ សំណង់ខុសច្បាប់ រីកដុះដាលគ្រប់ទីកន្លែង ដែលភាគច្រើនមិនបាន បង់ពន្ធជូនរដ្ឋ ហើយប្រជាពលរដ្ឋរាប់រយគ្រួសារ រស់នៅលើទឹកដីជាយដែនក្រុងប៉ោយប៉ែត កំពុងរងទុក្ខវេទនា ដោយសារបញ្ហាជម្លោះដីធ្លី សូម្បីតែក្រុមឈ្មួញមួយចំនួន ក៏ឈឺក្បាលវិលមុខ ដោយសារតែបញ្ហាជម្លោះដីធ្លី ដែលផ្តើមចេញពីការចេញ ប័ណ្ណកម្មសិទ្ធិជាន់លើគ្នា កើតទៅជាជម្លោះប្តឹងផ្តល់ តាមផ្លូវតុលាការអស់លុយ ច្រើនសន្ធឹកសន្ធាប់ និងប្រើពេលវេលារាប់សិបឆ្នាំ នៅតែដោះស្រាយមិនចេញ។ បញ្ហាទាំងនេះកើតឡើង ដោយសារតែលោក ប្រាក់ ប៉ូលី ជាប្រធានសុរិយោដីក្រុងប៉ោយប៉ែត ដែលមាន ជំនាញប្រមូលលុយ យកទៅធ្វើមានធ្វើបានផ្ទាល់ខ្លួន មិនដែលក្រែងញញើត ពីច្បាប់ទម្លាប់នោះទេ។
ប្រជាពលរដ្ឋរាប់រយគ្រួសារ បានសម្តែងភាពក្តៅក្រហាយយ៉ាងខ្លាំង នៅពេលដែលពួកគាត់ ទៅសុំធ្វើប័ណ្ណកម្មសិទ្ធិ កាន់កាប់ដីធ្លីស្របច្បាប់ បែរជារងនូវការកោសរូស បង្ខំឲ្យបង់លុយចាប់ពី ៥០០ទៅ១៥០០ ដុល្លារអាមេរិក អាស្រ័យទៅតាមទំហំដីធំឬតូច ហើយប្រជាពលរដ្ឋក្រីក្រខ្លះ សឹងថាមួយជីវិត មិនអាចសុំប័ណ្ណកម្មសិទ្ធិ កាន់កាប់ដីធ្លីបានទេ ក៏ព្រោះតែពួកគាត់គ្មានលុយ បង់ឲ្យមន្ត្រីសុរិយោដី របស់លោក ប្រាក់ ប៉ូលី។ បញ្ហានេះបានក្លាយជាដើមហេតុ នាំឲ្យមានការទន្ទ្រានរឹបអូស យកដីធ្លីពីប្រជាពលរដ្ឋក្រីក្រ នៅលើទឹកដីក្រុងប៉ោយប៉ែត បង្កទៅជាវិបត្តិនិងជម្លោះ ដីធ្លីដ៏រាលដាល ហើយនៅទីបំផុត មានតែប្រជារាស្ត្រក្រីក្រទន់ខ្សោយប៉ុណ្ណោះ ត្រូវបាត់បង់ដីធ្លីផ្ទះសម្បែង យ៉ាងអយុត្តិធម៌។
ក្នុងនាមជាប្រធាន ការិយាល័យសុរិយោដី និងសំណង់ ប្រចាំក្រុងប៉ោយប៉ែត លោក ប្រាក់ ប៉ូលី បានប្រើប្រាស់សិទ្ធិអំណាចរបស់ខ្លួន ទៅប្រព្រឹត្តអំពើពុករលួយ ដោយគ្មានសេចក្តីអៀនខ្មាស តាមរយៈការឃុបឃិតជាមួយឈ្មួញ ទន្ទ្រានយកដីធ្លីស្រែចំការ របស់ប្រជាពលរដ្ឋទន់ខ្សោយ ហើយក៏មានការឃុបឃិត ចេញប័ណ្ណកម្មសិទ្ធិជាន់លើគ្នា ជាច្រើនករណីកើតទៅជា ជម្លោះប្តឹងផ្តល់តាមផ្លូវតុលាការ គេមិនដែលឃើញលោក ប្រាក់ ប៉ូលី ឈឺក្បាលវិលមុខ ពីបញ្ហានេះម្តងណាឡើយ។ បើពិនិត្យតាមផ្លូវច្បាប់លោក ប្រាក់ ប៉ូលី ក៏ជាប់ពាក់ព័ន្ធ ក្នុងការប្រព្រឹត្តអំពើល្មើសមួយចំនួន ដូចជាការចេញប័ណ្ណកម្មសិទ្ធិជាន់លើគ្នា និងការឃុបឃិតជាមួយ អ្នកមានលុយមានអំណាច ក្នុងការទន្ទ្រានយកដីធ្លីប្រជារាស្ត្រ ក្រីក្រទន់ខ្សោយសឹងរាប់ភ្លេចទៅហើយ។
លោក គោ ស៊ុំសារឿត ជាអភិបាលខេត្ត បន្ទាយមានជ័យ ទើបឡើងតំណែងថ្មី ហាក់កំពុងល្វីងមុខដោយសារតែ បញ្ហាជម្លោះដីធ្លីដ៏រាលដាល នៅក្រុងប៉ោយប៉ែត ព្រោះប្រជាពលរដ្ឋ រាប់រយនាក់បាននាំគ្នាតវ៉ាទាមទារដំណោះស្រាយ និងយុត្តិធម៌ នៅមុខសាលាខេត្ត ច្រើនលើកច្រើនសា រួចមកហើយ ពាក់ព័ន្ធករណីដែលលោក ហង្ស ម៉ៅ ជាមន្ត្រីយោធានៅ កងពលតូចលេខ៧០ បាននាំសមត្ថកិច្ចចម្រុះ ចុះទៅពិនិត្យលើទីតាំង ព្រំដីមួយកន្លែងដែលមានទំនាស់ ជាមួយប្រជាពលរដ្ឋជាង ៥០គ្រួសារ ផ្តើមចេញពីរឿងអាស្រូវ ដែលលោក ប្រាក់ ប៉ូលី មិនធ្វើប័ណ្ណកម្មសិទ្ធិ ឲ្យប្រជាពលរដ្ឋ កាន់កាប់ដីធ្លីស្របច្បាប់ ក៏កើតទៅជារឿង ទំនាស់ដីធ្លីដ៏រាលដាល មានការប្តឹងផ្តល់តាមផ្លូវតុលាការ ប៉ុន្តែប្រជាពលរដ្ឋក្រីក្របានក្លាយជាជនរងគ្រោះយ៉ាងអយុត្តិធម៌បំផុត គ្មាននរណាជួយរកខុសត្រូវឲ្យទេ។
លោក ប្រាក់ ប៉ូលី ក៏បានឃុបឃិត ឲ្យអ្នកមានលុយ មានអំណាចមួយចំនួន សាងសង់ផ្ទះនិងអគារធំៗ តាមតែទំនើងចិត្ត មិនគោរពច្បាប់ទម្លាប់ ធ្វើខាតបង់ចំណូលពន្ធ យ៉ាងច្រើនសន្ធឹកសន្ធាប់ ដូចជាករណីខ្លះប្រជាពលរដ្ឋសង់ផ្ទះ នៅលើដីចំណីផ្លូវ ឬដីប្រឡាយ ឲ្យតែមានលុយបង់ជូន មន្ត្រីជំនិតៗរបស់លោក ប្រាក់ ប៉ូលី ។ សូម្បីតែផ្ទះរបស់លោក ប្រាក់ ប៉ូលី ដ៏ធំស្កឹមស្កៃនៅក្បែរផ្សារអគ្គថ្មី ដែលសង់រួចរាល់ជាស្ថាពរហើយនោះ ក៏គ្មានច្បាប់ទម្លាប់ដែរ នាំឲ្យមានការរិះគន់ជាទូទៅ ។ នៅពេលដែលប្រជាពលរដ្ឋ បង់លុយឲ្យមន្ត្រីជំនាញទាំងនោះ ទៅតាមការទាមទារអាចធ្វើអ្វីក៏បាន គេមិនដែលឃើញមន្ត្រីជំនាញ របស់លោក ប្រាក់ ប៉ូលី ចុះទៅត្រួតពិនិត្យ ឬហាមឃាត់ចំពោះ សំណង់ទាំងឡាយណា ដែលសង់នៅលើដីចំណីផ្លូវ ដីបម្រុងសម្រាប់ការអភិវឌ្ឍនោះទេ៕
Source from: watphnom-news.com
Loading...
Post a Comment