រាជធានីភ្នំពេញ ៖ សមត្ថកិច្ចខណ្ឌឫស្សីកែវ បានធ្វើការឡោមព័ទ្ធ ចាប់មុខសញ្ញាចោរប្លន់ យ៉ាងកក្រើករាជធានីភ្នំពេញម្នាក់ ផ្អើលប្រជាពលរដ្ឋ នាំគ្នាចោមរោមមើល និងជួយដេញចាប់ កាលពីវេលាម៉ោង ៤និង៤០ នាទី រសៀលថ្ងៃទី១០ ខែធ្នូឆ្នាំ២០១៣ នៅចំណុចផ្ទះជួល មួយកន្លែងស្ថិតក្នុង ភូមិទី៤ សង្កាត់ច្រាំងចំរេះ ខណ្ឌឫស្សីកែវ ខណៈដែលមុខសញ្ញា ជនសង្ស័យរត់ចូលទឹក ហើយឈានដល់ ការឃាត់ខ្លួនម្ចាស់ផ្ទះម្នាក់ទៀត យកទៅសួរនាំផងដែរ។
មុនពេលកើតហេតុ សមត្ថកិច្ចខណ្ឌឫស្សីកែវ បានល្បាតក្នុងមូលដ្ឋាន ក៏ប្រទះឃើញមុខសញ្ញា ជនសង្ស័យឈ្មោះ ទូច ឡុង ភេទប្រុស អាយុ ៣០ឆ្នាំ ដែលជាមុខសញ្ញាចាស់ ធ្លាប់ចោរប្លន់យ៉ាងសកម្ម ក្នុងក្រុងភ្នំពេញ និងធ្លាប់បាញ់សម្លាប់ជនរងគ្រោះ ក្នុងខណ្ឌសែនសុខ ក៏បានប្រដេញតាមចាប់ តែជនសង្ស័យបានរត់ចូល ផ្ទះជួលមួយកន្លែង រួចលោតចូល ក្នុងស្រះទឹកបាត់។ ប្រជាពលរដ្ឋច្រាំងចំរេះ រាប់រយនាក់ បានមកជួយឡោមព័ន្ធ ហើយសមត្ថកិច្ចចេញទូកទៅចាប់ ដល់កណ្ដាលស្រះទឹក ដោយក្នុងប្រតិបត្តិការនេះ ប្រើរយៈពេលប្រមាណជាង ១ម៉ោង ទើបចាប់ជនសង្ស័យបាន។
សមត្ថកិច្ចមិនបានផ្ទុះអាវុធ ក្នុងប្រតិបត្តិការ គួរឲ្យរំជើបរំជួលនេះទេ ព្រោះមានកិច្ចសហការ ពីប្រជាពលរដ្ឋ ហើយដកហូតបានម៉ូតូស្កុបពី ពណ៌ស ១គ្រឿង ពាក់ស្លាកលេខ កណ្តាល 1V-5678 ជា របស់ជនសង្ស័យ កាំភ្លើងខ្លីក្លែងក្លាយ ១ដើម កាំភ្លើងបាញ់សត្វ ១ដើម រថយន្ត ១គ្រឿង។ សមត្ថកិច្ចក៏បានឃាត់ខ្លួន ម្ចាស់ផ្ទះជួលម្នាក់ឈ្មោះ សុខ ចំរើន ហៅជ័យ ភេទប្រុស អាយុ ៣៦ឆ្នាំ ដើម្បីនាំទៅសាកសួរ ផងដែរ ដោរសារតែជនសង្ស័យ បានរត់ចូលក្នុងផ្ទះនេះ ខណៈដែលសមត្ថកិច្ច និងប្រជាពលរដ្ឋ តាមឡោមព័ទ្ធ៕
Source from: watphnom-news.com
Loading...
Post a Comment