កុមារីអាយុ ៨ឆ្នាំម្នាក់ ត្រូវឪពុកចិញ្ចឹម​ល្មោភកាម​រំលោភ​សេពសន្ថវៈ​បាន​សម្រេច

12/13/2013 05:01:00 AM

បន្ទាប់ពីទទួលបានពាក្យបណ្តឹងរបស់អ៊ុំស្រីកុមារីរងគ្រោះតាមរយៈអង្គការម្លប់តាប៉ាងរួចមក បុរសល្មោភកាមចិត្តតិរច្ឆានអាយុ ៤៣ ឆ្នាំម្នាក់ត្រូវបានសមត្ថកិច្ចនគរបាលខេត្តព្រះសីហនុធ្វើការឃាត់ខ្លួនពីបទរំលោភសេពសន្ថវៈ ទៅលើក្មេងស្រីអាយុ៨ឆ្នាំ និងបញ្ចូនខ្លួនមកកាន់ស្នងការដ្ឋាននគរបាលខេត្ត កាលពីវេលាល្ងាចថ្ងៃទី១១ ខែធ្នូ ឆ្នាំ២០១៣ ម្សិលមិញនេះ ដើម្បីកសាងសំណុំរឿងទៅសាលាដំបូងខេត្តព្រះសីហនុ ចាត់ការតាមនីតិវិធីនៃច្បាប់ ។ សមត្ថកិច្ចនគរបាលព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តព្រះសីហនុបានឲ្យដឹងថា កុមារីរងគ្រោះមានឈ្មោះ ស.ស.ល អាយុ៨ឆ្នាំ ជាសិស្សលាសា ។

រីឯជនសង្ស័យក្នុងបទល្មើសរំលោភសេពសន្ថវៈនេះ មានឈ្មោះ ងួន ពៅ អាយុ៤៣ឆ្នាំ មានទីលំនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ ជាពេទ្យសត្វចាក់ថ្នាំតាមភូមិនិងត្រូវជាឪពុកចិញ្ចឹមរបស់កុមារីរងគ្រោះ ។

សមត្ថកិច្ចបានឲ្យដឹងទៀតថា ករណីរំលោភសេពសន្ថវៈនេះ បានកើតឡើងតាំងពីរាត្រីថ្ងៃទី០៨ ខែធ្នូ ឆ្នាំ២០១៣ វេលាម៉ោង២០និង៣០នាទី មកម្ល៉េះ ប៉ុន្តែដោយមានការគំរាមកំហែងសម្លាប់ពីសំណាក់ជនសង្ស័យ ទើបកុមារីរងគ្រោះបានលាក់រឿងនេះ រហូតដល់ព្រឹកម៉ោង០៨ និង ៣០នាទីថ្ងៃទី១១ ខែធ្នូ ឆ្នាំ២០១៣ ទើបកុមារីរងគ្រោះសារភាពប្រាប់រឿងពិត ហើយក៏ត្រូវអ៊ុំស្រីបង្កើតកុមារីរងគ្រោះប្តឹងទៅអង្គការម្លប់តាប៉ាងនិងអង្គការក៏បានប្តឹងបន្តមកសមត្ថកិច្ចទើបឈានទៅឃាត់ខ្លួនជនសង្ស័យតែម្តង ។

ស្ត្រីឈ្មោះ សឿន ជិនសេង ត្រូវជាអ៊ុំស្រីរបស់កុមារីរងគ្រោះបានឲ្យដឹងថា នៅវេលាយប់មិនចាំម៉ោងនាថ្ងៃទី០៨ ខែធ្នូ ឆ្នាំ២០១៣ គាត់បានឃើញជនសង្ស័យចាក់សោកូនស្រីឲ្យនៅម្នាក់ឯង ដោយជនសង្ស័យបានទៅដេកជាមួយប្រពន្ធនៅឯមុខរោងចក្រញូវស្តារ ហើយនៅពេលនោះគាត់មិនបានចាប់អារម្មណ៍អ្វីដែរ ។លុះដល់ព្រឹកឡើងថ្ងៃទី០៩ ខែធ្នូ ឆ្នាំ២០១៣ គាត់បានឃើញក្មួយស្រីមានដំណើរខុសពីធម្មតា គាត់ក៏សួរនាំតែត្រូវក្មួយស្រីឆ្លើយថា ដើរដួលពេលឆ្លងស្ពាន ។ រហូតដល់ថ្ងៃទី១១ ខែធ្នូ ឆ្នាំ២០១៣ ដោយពុំអស់ចិត្តគាត់ក៏បានសម្រេចនាំក្មួយស្រីទៅកាន់មន្ទីរពេទ្យបង្អែកដើម្បីពិនិត្យ ប៉ុន្តែមិនទាន់មកដល់ពេទ្យផងក្មួយស្រីក៏បានសារភាពថា ជនសង្ស័យជាឪពុកចិញ្ចឹមចាប់រំលោភរូបគេតាំងពីរាត្រីថ្ងៃទី០៨ ខែធ្នូ ឆ្នាំ២០១៣ មកម្ល៉េះ ។

នេះជាករណីមួយក្នុងចំណោមករណីជាច្រើនផ្សេងទៀតដែលបានបង្ហាញឲ្យឃើញថា សីលធម៌សង្គមនៅកម្ពុជាមានការធ្លាក់ចុះយ៉ាងខ្លាំងសូម្បីតែឪពុកបង្កើតឬក៏ឪពុកចិញ្ចឹមក៏ហ៊ានដាច់ចិត្តរំលោភសេពសន្ថវៈ ទៅលើកូនរបស់ខ្លួនដែរ ហើយជាកូនក្មេងមិនទាន់គ្រប់អាយុរៀបការថែមទៀត ៕

ariseu

Source from: www.dtn7.com