ឯកឧត្តម ឡេង ប៉េងឡុង ឋានន្តរស័ក្តិឧត្តមអភិបាលថ្នាក់លេខ១ ក្របខ័ណ្ឌមន្ត្រីរាជការនៃក្រុមនីតិប្បញ្ញត្តិ និងមានមុខងារជាអគ្គលេខាធិការនៃអគ្គលេខាធិការដ្ឋានរដ្ឋសភា ត្រូវបានដាក់ឲ្យចូលនិវត្តន៍ចាប់ពីថ្ងៃទី០១ ខែតុលា ឆ្នាំ២០១៣រួចហើយ ដោយព្រះរាជក្រឹត្យលេខនស/រកត/១០១៣/១១៤៩ ចុះថ្ងៃទី៣០ ខែតុលា ឆ្នាំ២០១៣ ។
ព័ស្តុតាងបានបង្ហាញថា ថ្វីដ្បិតព្រះរាជក្រឹត្យឡាយព្រះហស្តលេខាដោយព្រះមហាក្សត្រ ត្រាស់បង្គាប់ដាក់ឯកឧត្តម ឡេង ប៉េងឡុង ឲ្យចូលនិវត្តន៍ចាប់ពីថ្ងៃទី០១ ខែតុលា ឆ្នាំ២០១៣ និងចូលជាធរមានអនុវត្តន៍ចាប់ពីថ្ងៃទី៣០ ខែតុលា ឆ្នាំ២០១៣រួចហើយក៏ដោយ ក៏ប៉ុន្តែឯកឧត្តម ឡេង ប៉េងឡុង អាចនៅបំពេញការងារ ព្រមទាំងចុះហត្ថលេខានៅលើលិខិតស្នាមផ្សេងៗជាហូរហែ រហូតដល់ខែធ្នូ ឆ្នាំ២០១៣នេះ ក្នុងនាមជាអគ្គលេខាធិការរដ្ឋសភាទៅវិញ ជាអាទិ៍ លិខិតសេចក្តីជូនដំណឹងលេខ៩៩៣/១៣ អរស.សជណ ចុះថ្ងៃទី០៥ ខែធ្នូ ឆ្នាំ២០១៣ ស្តីពីនិរាករណ៍ស្លាកលេខរថយន្តរដ្ឋសភា1, រដ្ឋសភា2, រដ្ឋសភា3 និងរដ្ឋសភា4 ព្រមទាំងលិខិតលេខ៩៩៩អរស ចុះថ្ងៃទី០៦ ខែធ្នូ ឆ្នាំ២០១៣ គោរពជូនឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស្នើសុំចាត់វិធានការចំពោះការប្រើប្រាស់ស្លាកលេខរថយន្តរដ្ឋសភា1, រដ្ឋសភា2, រដ្ឋសភា3 និងរដ្ឋសភា4 ដែលបាននិរាករណ៍ជាដើម ។
មជ្ឈដ្ឋានអ្នកច្បាប់ឯករាជ្យនៅកម្ពុជា បានលើកឡើងថា អនុលោមតាមព្រះរាជក្រឹត្យលេខនស/រកត/១០១៣/១១៤៩ ចុះថ្ងៃទី៣០ ខែតុលា ឆ្នាំ២០១៣ ដែលបានដាក់ឯកឧត្តម ឡេង ប៉េងឡុង ឲ្យចូលនិវត្តន៍ និងបានចូលជាធរមានអនុវត្តន៍នៅថ្ងៃទី៣០ ខែតុលា ឆ្នាំ២០១៣នោះ គឺឯកឧត្តម ឡេង ប៉េងឡុង លែងមានសិទ្ធិចុះហត្ថលេខានៅលើលិខិតស្នាមផ្សេងៗបានទៀតឡើយ ក្នុងនាមជាអគ្គលេខាធិការរដ្ឋសភា ចាប់តាំងពីថ្ងៃទី៣០ ខែតុលា ឆ្នាំ២០១៣មក ។ រីឯការចុះហត្ថលេខានៅលើលិខិតផ្សេងៗដោយឯកឧត្តម ឡេង ប៉េងឡុង ក្នុងនាមជាអគ្គលេខាធិការរដ្ឋសភា គឺជាអំពើខុសច្បាប់ទាំងស្រុង ហើយលិខិតស្នាមទាំងនោះក៏ត្រូវនិរាករណ៍ចោលដែរ ។
ក្រុមអ្នកច្បាប់ឯករាជ្យបានលើកឡើងទៀតថា ការចុះហត្ថលេខានៅលើលិខិតស្នាមផ្សេងៗដោយឯកឧត្តម ឡេង ប៉េងឡុង ក្នុងនាមជាអគ្គលេខាធិការរដ្ឋសភា នៅក្រោយថ្ងៃទី៣០ ខែតុលា ឆ្នាំ២០១៣ មិនត្រឹមតែជាការខុសច្បាប់ប៉ុណ្ណោះទេ ប៉ុន្តែថែមទាំងបានបង្ហាញថា ជាអំពើប្រមាថ ឬមិនគោរពព្រះរាជក្រឹត្យរបស់ព្រះមហាក្សត្រទៀតផង ៕ 
Source from: www.dtn7.com
Loading...
Post a Comment