មនុស្សរងគ្រោះស្លាប់និងរបួសជាច្រើននាក់បានទទួលភាពអយុត្តិធម៌ក្នុងរបបគ្រប់គ្រងអំណាចរបស់បុរសខ្លាំង
សម្តេចអគ្គមហាសេនាបតីតេជោ នាយឧត្តមសេនីយ៍ផុតលេខផ្កាយមាស៥ បណ្ឌិតសភាចារ្យ ហ៊ុន សែន ហៅបុរសខ្លាំង អនុប្រធានគណបក្សប្រជាជនកម្ពុជាដ៏មានឥទ្ធិពល បានឡើងកាន់កាប់អំណាចជានាយករដ្ឋមន្ត្រីនៃរាជរដ្ឋាភិបាលរបបព្រះរាជាណាចក្រកម្ពុជាទី២តែម្នាក់ឯងនៅអាណត្តិទី២ ឆ្នាំ១៩៩៨ បន្ទាប់ពីបញ្ចេញថ្វីដៃវាយផ្តួលរំលំសម្តេចក្រុមព្រះ នរោត្តម រណឫទ្ធិ អតីតព្រះប្រធានគណបក្សហ្វ៊ុនស៊ិនប៉ិច និងជាអតីតនាយករដ្ឋមន្ត្រីទី១ នាថ្ងៃទី០៥-០៦ ខែកក្កដា ឆ្នាំ១៩៩៧បានសម្រេច និងទទួលបានជោគជ័យក្នុងសម័យបោះឆ្នោតជ្រើសតាំងតំណាងរាស្ត្រនីតិកាលទី២ (១៩៩៨-២០០៣)រួចមក ។ មានន័យថា បុរសខ្លាំងបានទទួលឱកាសមាស ឱកាសពេជ្រពីការចាញ់ឆ្នោតនៅអាណត្តិទី១ បានឡើងកាន់កាប់អំណាចជានាយករដ្ឋមន្ត្រីទី២ រួចហើយវាយផ្តួលរំលំនាយករដ្ឋមន្ត្រីទី១បានយ៉ាងជោគជ័យ ទើបឡើងកាន់កាប់អំណាចជានាយករដ្ឋមន្ត្រីម្នាក់ឯងនៅអាណត្តិទី២ ។
ក្រៅពីមានមនុស្សរងគ្រោះដោយការបាត់បង់ដីធ្លី បាត់បង់ផ្ទះសម្បែង និងបាត់បង់ទ្រព្យសម្បត្តិទាំងអយុត្តិធម៌ ដោយសារអំពើរបស់អ្នកមានអំណាច អ្នកមានលុយ តុលាការពុករលួយ កងកម្លាំងនគរបាលយុត្តិធម៌ "ដើរតួជាចោរ" គឺនៅមានមនុស្សជាច្រើននាក់ទៀតជាសកម្មជនសហជីព ជាសកម្មជនព្រៃឈើ ជាអ្នកសារព័ត៌មាន និងជាសិល្បការិនី…បានទទួលរងការវាយប្រហារបាញ់សម្លាប់ និងការប្រើអំពើហិង្សាផ្សេងៗ បណ្តាលឲ្យស្លាប់បាត់បង់ជីវិត និងរងរបួសទាំងអយុត្តិធម៌ ដោយអាជ្ញាធរមិនអាចចាប់ឃាតកយកមកផ្តន្ទាទោសតាមច្បាប់ មិនអាចកាត់ទោសជនដៃដល់ឲ្យសមនឹងការប្រព្រឹត្តល្មើស…នៅក្នុងរបបកាន់កាប់អំណាចរបស់បុរសខ្លាំង (នេះមិននិយាយដល់ការចាប់ខ្លួនសកម្មជនព្រំដែន សកម្មជនសហជីព សកម្មជនសិទ្ធិមនុស្ស អ្នកសារព័ត៌មានដាក់ពន្ធនាគារផង) ។
កាលពីថ្ងៃទី០៣ ខែមករា ឆ្នាំ២០១៤ កន្លងទៅថ្មីៗនេះទៀតសោត កងកម្លាំងសមត្ថកិច្ចប្រដាប់អាវុធ ក្រោមការគ្រប់គ្រងរបស់បុរសខ្លាំងជានាយករដ្ឋមន្ត្រីអាណត្តិទី៥ កើតចេញពីសភាគណបក្សប្រជាជនកម្ពុជាដែលមានចំនួនអ្នកតំណាងរាស្ត្រត្រឹម៦៨នាក់នោះ បានធ្វើសកម្មភាពបាញ់ប្រហារយ៉ាងសាហាវឃោរឃៅទៅលើក្រុមប្រជាពលរដ្ឋស៊ីវិល ដែលជាកម្មករតវ៉ាទាមទារដំឡើងប្រាក់ឈ្នួលអប្បបរមា បណ្តាលឲ្យមានមនុស្សស្លាប់ និងរងរបួសជាច្រើននាក់នៅរោងចក្រសួនឧស្សាហកម្មកាណាឌីយ៉ា ។
មនុស្សស្លាប់ និងរងរបួសដែលទទួលរងនូវអំពើអយុត្តិធម៌នៅក្នុងរបបកាន់កាប់អំណាចរបស់បុរសខ្លាំងនោះ គេហទំព័រសារព័ត៌មានដើមត្នោត សូមរៀបរាប់ឈ្មោះត្រួសៗដូចខាងក្រោម ៖
១-អ្នកស្រី ពិសិដ្ឋ ពិលិកា ជាតារាសម្តែងដ៏ល្បីឈ្មោះ ដែលមជ្ឈដ្ឋានមួយចំនួនបានសង្ស័យថា មានទំនាក់ទំនងស្នេហាត្រីកោណជាមួយបុរសខ្លាំងផងនោះ ត្រូវបានឃាតកបាញ់ប្រហារ បណ្តាលឲ្យស្លាប់បាត់បង់ជីវិតកាលពីថ្ងៃទី០៦ ខែកក្កដា ឆ្នាំ១៩៩៩ នៅកណ្តាលរាជធានីភ្នំពេញ ។ រយៈពេលជិត១៥ឆ្នាំហើយ អាជ្ញាធររកឃាតកមិនទាន់ឃើញនៅឡើយ ហើយទំនងជាអាចរកមិនឃើញជារៀងរហូតផងក៏មិនដឹង ។
២-អតីតតារាសម្តែង និងចម្រៀង តាត ម៉ារីណា ត្រូវបានភរិយាឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រីបច្ចុប្បន្ន គឺលោកជំទាវ ឃួន សុផល និងគូកនចំនួន៥នាក់ផ្សេងទៀត បានវាយប្រហារដោយទឹកអាស៊ីដ បណ្តាលឲ្យរងរបួសពេញផ្ទៃមុខ និងដងខ្លួន កាលពីថ្ងៃទី០៥ ខែធ្នូ ឆ្នាំ១៩៩៩ នៅកណ្តាលរាជធានីភ្នំពេញ ។ លោកជំទាវ ឃួន សុផល ដែលជាជនដៃដល់ ត្រូវបានស្ថាប័នតុលាការដែលល្បីល្បាញខាងមិនឯករាជ្យ វិនិច្ឆ័យសម្រេចផ្តន្ទាទោសដាក់ពន្ធនាគារត្រឹមរយៈពេលមួយឆ្នាំប៉ុណ្ណោះ ហើយត្រូវព្យួរទោសថែមទៀត ។ ពោលគឺ អតីតតារាចម្រៀង និងសម្តែង តាត ម៉ារីណា ដែលកំពុងរស់នៅសហរដ្ឋអាមេរិកសព្វថ្ងៃ បានទទួលរងនូវអំពើអយុត្តិធម៌អស់រយៈពេលជិត១៥ឆ្នាំហើយ ។
៣-កញ្ញា ទូច ស៊ុននិច ជាតារាចម្រៀងដ៏ល្បីឈ្មោះ ត្រូវបានខ្មាន់កាំភ្លើងបាញ់ឲ្យរងរបួសធ្ងន់ កាលពីថ្ងៃទី២១ ខែតុលា ឆ្នាំ២០០៣ នៅកណ្តាលរាជធានីភ្នំពេញ ។ រយៈពេលជិត១១ឆ្នាំហើយ សមត្ថកិច្ចមិនទាន់អាចស្វែងរកជនដៃដល់ឃើញនៅឡើយ ។
៤-លោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជាដ៏ល្បីឈ្មោះ ត្រូវបានឃាតកបាញ់សម្លាប់យ៉ាងព្រៃផ្សៃ នៅកណ្តាលរាជធានីភ្នំពេញ កាលពីថ្ងៃទី២២ ខែមករា ឆ្នាំ២០០៤ ។ អស់រយៈពេលចំនួន១០ឆ្នាំមកហើយ អាជ្ញាធរមានសមត្ថកិច្ចមិនទាន់អាចស្វែងរកចាប់ខ្លួនឃាតកយកមកផ្តន្ទាទោសតាមច្បាប់នៅឡើយទេ ។
៥-កញ្ញា ពៅ បញ្ញាពេជ្រ តារាចម្រៀងដ៏ល្បីឈ្មោះ ត្រូវបានខ្មាន់កាំភ្លើងបាញ់ឲ្យរងរបួសធ្ងន់សឹងបាត់បង់ជីវិត កាលពីថ្ងៃទី២៣ ខែកុម្ភៈ ឆ្នាំ២០០៧ នៅកណ្តាលរាជធានីភ្នំពេញ ។ ជនដៃដល់ដែលបាញ់ប្រហារទៅលើកញ្ញា ពៅ បញ្ញាពេជ្រ មិនទាន់បានវែកមុខឃើញនៅឡើយអស់រយៈពេលជិត៧ឆ្នាំ ខណៈដែលកញ្ញាតារាចម្រៀងរូបនេះកំពុងសម្រាកព្យាបាលជំងឺនៅសហរដ្ឋអាមេរិក ។
៦-លោក ឃឹម សម្បូរណ៍ ជាអ្នកកាសែតជើងចាស់ សម្រើការងារនៅក្នុងអង្គភាពសារព័ត៌មានមនសិការខ្មែរ (កាលណោះកាសែតមនសិការខ្មែរសរសេររិះគន់ប្រឆាំងទៅលើរាជរដ្ឋាភិបាលយ៉ាងខ្លាំងក្លា មិនមែនលំៗសើៗដូចសព្វថ្ងៃនេះទេ) ត្រូវបានឃាតកបាញ់សម្លាប់ឲ្យស្លាប់បាត់បង់ជីវិតកាលពីថ្ងៃទី១១ ខែកក្កដា ឆ្នាំ២០០៨ នៅកណ្តាលរាជធានីភ្នំពេញ ខណៈដែលកូនប្រុសរបស់លោកម្នាក់ក៏ទទួលរងរបួសធ្ងន់នាឱកាសបាញ់ប្រហារនេះដែរ ។ ឃាតក និងអ្នកបញ្ជាពីក្រោយខ្នងមិនទាន់ត្រូវបានវែកមុខឃើញចាប់ខ្លួនយកមកផ្តន្ទាទោសតាមច្បាប់នៅឡើយ ។
៧-លោក ឈុត វុទ្ធី ជាសកម្មជនការពារព្រៃឈើដ៏សកម្ម ត្រូវបានខ្មាន់កាំភ្លើងបាញ់ប្រហារឲ្យស្លាប់បាត់បង់ជីវិត កាលពីថ្ងៃទី២៦ ខែមេសា ឆ្នាំ២០១២ នៅខេត្តកោះកុង ខណៈលោកកំពុងចុះពិនិត្យមើលស្ថានភាពនៃការកាប់បំផ្លាញព្រៃឈើនៅតំបន់នោះ ។ ឃាតកមិនទាន់ត្រូវបានស្វែងរកឃើញដើម្បីយកមកផ្តន្ទាទោសតាមច្បាប់នៅឡើយទេ ។
នេះគឺជាព័ស្តុតាងបង្ហាញថា មានមនុស្សរងគ្រោះជាអ្នកស្លាប់បាត់បង់ជីវិត និងរងរបួសជាច្រើននាក់ដែលបានទទួលនូវភាពអយុត្តិធម៌នៅក្នុងរបបកាន់កាប់ គ្រប់គ្រងអំណាចរបស់បុរសខ្លាំង ៕
Source from: www.dtn7.com
Loading...
Post a Comment