តុលាការកំពូលបង្គាប់ឲ្យព្រះរាជអាជ្ញាអមសាលាដំបូងរាជធានីភ្នំពេញបើកការស៊ើបអង្កេតវែកមុខឃាតកសម្លាប់លោក ជា វិជ្ជា
ក្រៅពីការសម្រេចដោះលែងលោក ប៊ន សំណាង និងលោក សុខ សំអឿន ដែលមជ្ឈដ្ឋាននានាយល់ឃើញថាជាឃាតកសិប្បនិម្មិតក្នុងសំណុំរឿងឃាតកម្មលោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជាដ៏ល្បីឈ្មោះ ឲ្យមានសេរីភាពឡើងវិញ កាលពីថ្ងៃទី២៥ ខែកញ្ញា ឆ្នាំ២០១៣កន្លងមកនោះ តុលាការកំពូលក៏បានសម្រេចបង្គាប់ឲ្យឯកឧត្តមព្រះរាជអាជ្ញាអមសាលាដំបូងរាជធានីភ្នំពេញ បើកការស៊ើបអង្កេតប្រឆាំងលើជនល្មើសមិនស្គាល់មុខ ដែលបានធ្វើឃាតលើលោក ជា វិជ្ជា ផងដែរ តាមអំណាចសាលដីកាព្រហ្មទណ្ឌលេខ២៣៩ ចុះថ្ងៃទី២៥ ខែកញ្ញា ឆ្នាំ២០១៣ ។
គិតត្រឹមថ្ងៃទី២២ ខែមករា ឆ្នាំ២០១៤ស្អែកនេះ គឺគម្រប់ខួប១០ឆ្នាំគត់នៃមរណភាពរបស់លោក ជា វិជ្ជា ដែលត្រូវឃាតកបាញ់សម្លាប់យ៉ាងព្រៃផ្សៃនៅមុខតូបលក់កាសែតក្បែរវត្តលង្កា ផ្លូវប៉ាស្ទ័រ សង្កាត់បឹងកេងកងទី១ ខណ្ឌចំការមន រាជធានីភ្នំពេញ កាលពីថ្ងៃទី២២ ខែមករា ឆ្នាំ២០០៤ ប៉ុន្តែឃាតកពិតប្រាកដ និងអ្នកបញ្ជាពីក្រោយខ្នងដែលបានសម្លាប់លោក ជា វិជ្ជា នោះមិនទាន់ត្រូវបានវែកមុខចាប់យកមកផ្តន្ទាទោសតាមច្បាប់នៅឡើយ បានត្រឹមចាប់យកលោក ប៊ន សំណាង និងលោក សុខ សំអឿន មកដាក់ពន្ធនាគារអស់រយៈពេលជិត១០ឆ្នាំទាំងអយុត្តិធម៌ប៉ុណ្ណោះ ។
សហជីពសេរីកម្មករនៃព្រះរាជាណាចក្រកម្ពុជាបច្ចុប្បន្នដែលមានលោក ជា មុនី ត្រូវជាប្អូនប្រុសបង្កើតលោក ជា វិជ្ជា ជាប្រធាននោះ បានចាត់ទុកលោក ជា វិជ្ជា ជាវីរជនកម្មករ ដោយសារលោកកាលនៅរស់រានមានជីវិត តែងបានបង្ហាញនូវវីរភាពដ៏អង់អាចក្លាហានក្នុងការទាមទារសិទ្ធិសេរីភាព និងលក្ខខណ្ឌការងារល្អប្រសើរជូនកម្មករ កម្មការិនីខ្មែរគ្រប់រូប ជាពិសេសលោកបានចូលរួមយ៉ាងសកម្មក្នុងការជំរុញឲ្យមានការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា ។
ដោយសារគុណូបការៈដ៏ថ្លៃថ្លា និងតាមការស្នើសុំរបស់លោក ជា មុនី ប្រធានសហជីពសេរីកម្មករនៃព្រះរាជាណាចក្រកម្ពុជា ទើបរាជរដ្ឋាភិបាលបានសម្រេចអនុញ្ញាតឲ្យសហជីពសាងសង់រូបសំណាកលោក ជា វិជ្ជា ដាក់តម្កល់នូវចុងសួនខាងលិចវិមានឯករាជ្យក្បែរវត្តលង្កា រាជធានីភ្នំពេញ ហើយរូបសំណាកលោក ជា វិជ្ជា នេះបានសាងសង់រូបរាល់ និងធ្វើពិធីប្រោះព្រំសម្ពោធកាលពីថ្ងៃទី០៣ ខែឧសភា ឆ្នាំ២០១៣កន្លងទៅ ។
តាមគម្រោងរបស់សហជីពសេរីកម្មករនៃព្រះរាជាណាចក្រកម្ពុជា គឺនៅថ្ងៃស្អែកទី២២ ខែមករា ឆ្នាំ២០១៤ សហជីពនឹងជួបជុំគ្នាដង្ហែក្បួនយកកម្រងផ្កាទៅដាក់គោរពវិញ្ញាណក្ខន្ធលោក ជា វិជ្ជា នៅទីតម្កល់រូបសំណាករបស់លោក ទោះបីអាជ្ញាធររាជធានីភ្នំពេញមិនអនុញ្ញាតឲ្យមានការហែក្បួនក៏ដោយ ដ្បិតសហជីពយល់ឃើញថា ការដង្ហែកម្រងផ្កាយកទៅដាក់គោរពវិញ្ញាណក្ខន្ធលោក ជា វិជ្ជា ធ្លាប់បានធ្វើរៀងរាល់ឆ្នាំអស់ជាច្រើនឆ្នាំមកហើយ មិនដែលខកខានទេ ។
មជ្ឈដ្ឋានទូទៅបានបញ្ចេញទស្សនៈថា ហាក់គ្មានសង្ឃឹមទាល់តែសោះដែលថាអាជ្ញាធរបច្ចុប្បន្នអាចស្វែងរកមុខឃាតកសម្លាប់លោក ជា វិជ្ជា ចាប់ខ្លួនយកមកផ្តន្ទាទោសតាមច្បាប់ជាធរមាននោះ ដ្បិតការដឹកនាំប្រទេសសព្វថ្ងៃគ្មានយុត្តិធម៌សង្គមឡើយ ៕
Source from: www.dtn7.com
Loading...
Post a Comment