ឃើញគ្រាប់ឡង់កប់ក្នុងដី យកដុំថ្មដំលេង ផ្ទុះរយះដាច់ខ្លួន ស្លាប់ ២នាក់ក្នុងថ្លុកឈាម
ខេត្តបាត់ដំបង៖ក្មេងស្រីប្រុស២នាក់បានប្រទះឃើញគ្រាប់ឡង់លៀនក្បាលលើអាចម៍ដីកាយចាក់ធ្វើផ្ទះខេត្តបាត់ដំបង ៖ ក្មេងស្រីប្រុស ២ នាក់ បានប្រទះឃើញ គ្រាប់ឡង់លៀនក្បាលលើអាចម៍ដី កាយចាក់ធ្វើផ្ទះ ក៏នាំគ្នាដំលេងផ្ទុះឡើងកក្រើកដី បណ្តាលឲ្យរយះដាច់ខ្លួន ស្លាប់ភ្លាមៗនៅនឹងកន្លែងកើតហេតុ កាលពីវេលាម៉ោង ១៣និង៣០នាទីថ្ងៃទី២១ ខែកុម្ភៈ ឆ្នាំ២០១៤ នៅចំណុចស្រះឬស្សី ភូមិជ្រោយស្នា ឃុំខ្នាចរមាស ស្រុកបវេល ខេត្តបាត់ដំបង។
លោក ប៊ុន រឿន មេបញ្ជាការងអាវុធហត្ថ ស្រុកបវេល បានប្រាប់ឲ្យដឹងថា ក្មេងរងគ្រោះរួមមានទី១-ឈ្មោះ រឿន រិទ្ធ ភេទប្រុស អាយុ ៧ឆ្នាំ មានឪពុកឈ្មោះ ពៅ ម៉ាន់ និងទី២-ឈ្មោះ ហ៊ុន ណារិន ភេទស្រី អាយុ ៧ឆ្នាំ មានផ្ទះនៅក្បែរគ្នា ក្នុងភូមិឃុំជាមួយគ្នា នៅចំណុចស្រះឬស្សី ភូមិជ្រោយស្នា ឃុំខ្នាចរមាស ស្រុកបវេល ខេត្តបាត់ដំបង។ សពក្មេងរងគ្រោះទាំង ២នាក់ ត្រូវគ្រាប់ឡង់ ផ្ទុះត្រូវរយះដាច់ខ្លួនប្រាណ ស្លាប់ភ្លាមៗ យ៉ាងអាណោចអាធ័ម ក្នុងថ្លុកឈាម។
សាក្សីឈ្មោះ ពៅ ម៉ាន់ បានឲ្យដឹងថា ដីដែលមានគ្រាប់ឡង់ កប់ក្នុងដីនេះ គឺគាត់ជួលម៉ៃខូង កាយមកចាក់ធ្វើផ្ទះ ប្រមាណ ៤ទៅ៥ ឆ្នាំហើយ មិនដែលជួបប្រទះ ឃើញគ្រាប់ផ្ទុះទេ។ នៅរសៀលថ្ងៃទី២១ ខែកុម្ភៈ ឆ្នាំ២០១៤ កូនប្រុសរបស់ខ្លួន និងកូនស្រីរបស់ អ្នករស់នៅក្បែរគ្នាអាយុ ៧ឆ្នាំ បានទៅអង្គុយកាយដី លេងបាយឡុកបាយឡជាមួយគ្នា ហើយប្រទះឃើញក្បាលគ្រាប់អណ្ដែតចេញ ហើយក៏យកដុំថ្មដំលេង បណ្តាលឲ្យផ្ទុះឡើង ស្លាប់ទាំង ២នាក់តែម្ដង។
លោក ប៊ុន រឿន មេបញ្ជាការង អាវុធហត្ថស្រុកបវេល បានបញ្ជាក់ថា សពក្មេងទាំង ២នាក់ត្រូវបាន ប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណី ហើយសូមផ្តាំផ្ញើ ដល់អាណាព្យាបាលទាំងអស់ ត្រូវយកចិត្តទុកដាក់ ចំពោះ អាវុធ ឬគ្រាប់មិនទាន់ផ្ទុះ កុំអោយកូនលេងផ្តេសផ្តាស់ បើមានសូមរាយការណ៍ ជូនសមត្ថកិច្ចស៊ីម៉ាក់ អោយយកទៅកំទេចចោល ចៀសវាងមានគ្រោះថ្នាក់ផ្សេងៗ៕ ដោយ សុខជា
Source from: watphnom-news.com
Loading...
Post a Comment