នាយក​រដ្ឋមន្ត្រី​ម៉ា​ឡេ​ស៊ី​អះអាង​ថា​ យន្តហោះ​ Boeing​ ដែល​បាត់​ខ្លួន​គឺ​ធ្លាក់​ក្នុង​សមុទ្រ​ឥណ្ឌា​ដោយ​សម្លាប់​មនុស្ស​ក្នុង​យន្តហោះ​ទាំងអស់​

3/25/2014 06:00:00 AM

នាយករដ្ឋមន្ត្រីម៉ាឡេស៊ីអះអាងថា យន្តហោះ Boeing ដែលបាត់ខ្លួនគឺធ្លាក់ក្នុងសមុទ្រឥណ្ឌាដោយសម្លាប់មនុស្សក្នុងយន្តហោះទាំងអស់

បន្ទាប់ពីយន្តហោះដឹកអ្នកដំណើរប្រភេទ Boeing 777-200 របស់ក្រុមហ៊ុនអាកាសចរណ៍ម៉ាឡេស៊ី នាំជាមួយនូវក្រុមអ្នកដំណើរ និងអាកាសយានិកចំនួន២៣៩នាក់ តាមជើងហោះហើរ MH370 ក្នុងទិសដៅពីទីក្រុងគូឡាឡាំពួ ប្រទេសម៉ាឡេស៊ីឆ្ពោះទៅទីក្រុងប៉េកាំង ប្រទេសចិន បានបាត់ខ្លួនកាលពីថ្ងៃទី០៨ ខែមីនា ឆ្នាំ២០១៤ ពោលគឺមានរយៈពេលជាងកន្លះខែមកហើយនោះ នៅរាត្រីថ្ងៃចន្ទ ទី២៤ ខែមីនា ឆ្នាំ២០១៤ម្សិលមិញនេះ ឯកឧត្តម Najip Razak នាយករដ្ឋមន្ត្រីប្រទេសម៉ាឡេស៊ី បានថ្លែងឲ្យដឹងថា យោងតាមរូបភាពបញ្ជាក់ដោយផ្តាយរណប និងការសន្និដ្ឋានរបស់អ្នកជំនាញ គឺយន្តហោះបានបាត់ដំណើរចុងក្រោយនៅសមុទ្រឥណ្ឌា ឋិតនៅខាងលិចទីក្រុង Perth ហើយយន្តហោះនេះបានធ្លាក់ក្នុងសមុទ្រឥណ្ឌាភាគខាងត្បូង ដោយបានសម្លាប់អ្នកដំណើរទាំងអស់ក្នុងយន្តហោះនៅទីនោះ ដែលជាការសោកស្តាយ និងសោកសៅជាទីបំផុត ។

សារបានផ្ញើទៅកាន់ក្រុមគ្រួសារសាច់ញាតិជនរងគ្រោះរួចហើយ កាលពីថ្ងៃចន្ទម្សិលមិញ ដែលដកស្រង់ដោយ BBC ថា "ក្រុមហ៊ុនអាកាសចរណ៍ម៉ាឡេស៊ីសោកស្តាយជាពន់ពេក ដែលយើងសន្មតថា យន្តហោះដែលមានជើងហោះហើរ MH370 បានបាត់នៅសមុទ្រឥណ្ឌាភាគខាងត្បូង ហើយពុំមានអ្នកនៅរស់" ។

ទោះជាយ៉ាងណាក៏ដោយ ឯកឧត្តម Najip Razak នាយករដ្ឋមន្ត្រីប្រទេសម៉ាឡេស៊ី មិនទាន់បានថ្លែងបញ្ជាក់លំអិតឲ្យដឹងអំពីមូលហេតុពិតប្រាកដដែលនាំឲ្យយន្តហោះដែលបាត់ខ្លួននោះធ្លាក់ក្នុងសមុទ្រឥណ្ឌា សម្លាប់អ្នកដំណើរទាំងអស់ក្នុងយន្តហោះនៅឡើយទេ ។

សូមបញ្ជាក់ជូនថា យន្តហោះក្រុមហ៊ុនអាកាសចរណ៍ម៉ាឡេស៊ី មានជើងហោះហើរ MH370 ដែលបាត់ខ្លួនកាលពីវេលាព្រឹកនាថ្ងៃទី០៨ ខែមីនា ឆ្នាំ២០១៤ ជាមួយនឹងក្រុមអ្នកដំណើរចំនួន២៣៩នាក់ (អ្នកដំណើរចំនួន២២៧នាក់ និងក្រុមអាកាសយានិកចំនួន១២នាក់) មានប្រភពមកពីជាង១០ជាតិសាសន៍នោះ ត្រូវបានក្រុមអ្នកស្វែងរកជាលក្ខណៈអន្តរជាតិជាង២០ប្រទេសចំណាយពេលអស់ជាងកន្លះខែមកហើយ ប៉ុន្តែរកមិនទាន់ឃើញឡើយ ចាប់តាំងពីតំបន់ដែនសមុទ្រវៀតណាម ដែលសង្ស័យដំបូងថា យន្តហោះធ្លាក់នៅទីនោះ រហូតដល់សមុទ្រឥណ្ឌា ខណៈដែលមានការសន្និដ្ឋានផ្សេងៗពីគ្នា ដោយខ្លះថាជាករណីប្លន់ ខ្លះថាជាករណីពាក់ព័ន្ធនឹងភេរវកម្ម ខ្លះថាយន្តហោះបានធ្លាក់ក្នុងសមុទ្រ…។ល។

ដោយឡែក កាលពីថ្ងៃទី២០ ខែមីនា ឆ្នាំ២០១៤កន្លងមក កងកម្លាំងរុករករបស់អូស្ត្រាលី តាមរយៈផ្កាយរណបរបស់ខ្លួនបានប្រទះឃើញបំណែកកម្ទេចកម្ទីចំនួន២នៅដែនសមុទ្រឥណ្ឌា ដែលគេផ្តោតការសង្ស័យថា ជាបំណែករបស់រថយន្តហោះម៉ាឡេស៊ីដែលបាត់ខ្លួន និងក៏អាចក្លាយជាតម្រុយដើម្បីបន្តស្វែងរកទៅដល់ទីតាំងយន្តហោះបានធ្លាក់ ។ ក្រោយមក នៅថ្ងៃទី២៤ ខែមីនា ឆ្នាំ២០១៤ម្សិលមិញនេះ កងនាវានៃក្រុមរុករករបស់អូស្ត្រាលីក៏បានរកឃើញបំណែកទាំង២នេះ ដោយមួយមានរាងមូល និងមួយទៀតមានរាងចតុកោណនៅសមុទ្រឥណ្ឌាភាគខាងត្បូង ហើយក៏ត្រូវបានយកទៅពិនិត្យឲ្យដឹងថា ជាបំណែករបស់យន្តហោះដែលបាត់ខ្លួនឬយ៉ាងណា ។

តាមរយៈទិន្នន័យផ្តល់ដោយផ្តាយរណប Inmarsat ផង និងបន្ទាប់ពីកងកម្លាំងរុករករបស់អូស្ត្រាលីប្រទះឃើញបំណែកនៅសមុទ្រឥណ្ឌាផង ស្រាប់តែប៉ុន្មានម៉ោងក្រោយមក ឯកឧត្តម Najip Razak នាយករដ្ឋមន្ត្រីនៃប្រទេសម៉ាឡេស៊ីបានអះអាងថា យន្តហោះដែលបាត់ខ្លួនត្រូវបានធ្លាក់ក្នុងសមុទ្រឥណ្ឌាភាគខាងត្បូង និងបានសម្លាប់ជីវិតមនុស្សទាំងអស់នៅក្នុងយន្តហោះតែម្តង ។

ការបញ្ជាក់អះអាងរបស់ឯកឧត្តម Najip Razak ក្នុងសន្និសីទសារព័ត៌មាននារាត្រីថ្ងៃម្សិលមិញនេះដែលថា យន្តហោះបានធ្លាក់ និងសម្លាប់មនុស្សទាំងអស់នៅក្នុងយន្តហោះនោះ គឺមិនបានផ្តល់នូវអារម្មណ៍អស់ចិត្តដល់ក្រុមគ្រួសារសាច់ញាតិ បងប្អូនជនរងគ្រោះនោះទេ ដ្បិតពួកគេមិនបានឃើញសាកសពរបស់ជនរងគ្រោះពិតប្រាកដ ហើយមានអ្នកខ្លះមិនជឿជាក់លើការបញ្ជាក់អះអាងរបស់ឯកឧត្តមនាយករដ្ឋមន្ត្រីម៉ាឡេស៊ីនេះទៀតផង ៕

MH370-4 MH370-2 MH370-5 MH370-1