មន្ត្រីរដ្ឋបាលកំពុងរុញលោកចៅក្រម អាំង មាលតី ប្រធានសាលាដំបូងរាជធានីភ្នំពេញ ទើបកាន់មុខតំណែងថ្មីឲ្យធ្លាក់ទឹក
ប្រជាពលរដ្ឋដែលមានរឿងក្តីពាក់ព័ន្ធនឹងស្ថាប័នតុលាការសាលាដំបូងរាជធានីភ្នំពេញ និងក្រុមអ្នកច្បាប់ បានសម្តែងនូវការមិនសប្បាយចិត្តចំពោះការបង្គាប់បញ្ជាខុសទំនង និងគ្មានសមហេតុសមផលរបស់មន្ត្រីរដ្ឋបាលដែលជាក្រឡាបញ្ជីសាលាដំបូងរាជធានីភ្នំពេញជំនាន់លោកចៅក្រម អាំង មាលតី ធ្វើជាប្រធានសាលាដំបូងក្នុងការដាក់ពាក្យបណ្តឹង ឬបំពេញនីតិវិធីផ្សេងៗជូនទៅប្រធានសាលាដំបូង និងទៅចៅក្រមទទួលបន្ទុក ដោយត្រូវឲ្យប្រើពាក្យថា "ឯកឧត្តមប្រធានសាលាដំបូងរាជធានីភ្នំពេញ" និងតម្រូវឲ្យគោរពជូនទៅប្រធានសាលាដំបូងទាំងអស់ ទោះបីជានីតិវិធីត្រូវសរសេរគោរពជូនផ្ទាល់ចៅក្រមទទួលបន្ទុកសំណុំរឿងក៏ដោយ ពោលគឺមានចំណុចខ្លះធ្លាក់ដល់សភាពយ៉ាប់យ៉ឺនជាងជំនាន់លោកចៅក្រម ជីវ កេង ធ្វើជាប្រធានសាលាដំបូងរាជធានីភ្នំពេញទៅទៀត ។
ព័ស្តុតាងត្រូវបានក្រុមអ្នកច្បាប់ និងប្រជាពលរដ្ឋដែលមានរឿងក្តីពាក់ព័ន្ធនឹងសាលាដំបូងរាជធានីភ្នំពេញ បង្ហាញឲ្យឃើញថា នៅពេលសរសេរពាក្យគោរពជូន"លោកប្រធានសាលាដំបូងរាជធានីភ្នំពេញ" គឺរដ្ឋបាលសាលាដំបូងមិនទទួលវាយត្រាចូលឲ្យឡើយ ហើយតម្រូវឲ្យសរសេរថា គោរពជូន"ឯកឧត្តមប្រធានសាលាដំបូងរាជធានីភ្នំពេញ"វិញ ទើបវាយត្រាចូលឲ្យ ។ លើសពីនេះ នៅពេលមានសំណុំរឿងក្តី និងមានចៅក្រមទទួលបន្ទុករឿងក្តីផ្ទាល់រួចហើយក៏ដោយ បើសរសេរគោរពជូនផ្ទាល់ទៅចៅក្រមទទួលបន្ទុកដើម្បីបំពេញនីតិវិធីផ្សេងៗក៏មិនបានដែរ គឺតម្រូវឲ្យសរសេរគោរពជូនឆ្លងកាត់តាម"ឯកឧត្តមប្រធានសាលាដំបូងរាជធានីភ្នំពេញ"ទាំងអស់(Sic!) ។
ក្រុមអ្នកច្បាប់និងប្រជាពលរដ្ឋធ្លាប់មានរឿងក្តីពាក់ព័ន្ធនឹងសាលាដំបូងរាជធានីភ្នំពេញកន្លងមក បានប្រាប់ឲ្យដឹងថា ជំនាន់លោកចៅក្រម ជីវ កេង ធ្វើជាប្រធានសាលាដំបូងរាជធានីភ្នំពេញ បានតម្រូវឲ្យសរសេរថា គោរពជូន"ឯកឧត្តមប្រធានសាលាដំបូងរាជធានីភ្នំពេញ"អ៊ីចឹងដែរ ខណៈពេលមានលិខិតស្នាមផ្សេងៗពីតុលាការកំពូលផ្ញើមកសាលាដំបូងរាជធានីភ្នំពេញហៅថា "លោកប្រធានសាលាដំបូងរាជធានីភ្នំពេញ" ប៉ុន្តែក្នុងករណីបំពេញនីតិវិធីផ្សេងៗទៅចៅក្រមទទួលបន្ទុកសំណុំរឿង គឺអាចសរសេរគោរពជូនផ្ទាល់ទៅឈ្មោះលោក ឬលោកស្រីចៅក្រមទទួលបន្ទុកសំណុំរឿងតែម្តង ដោយមិនចាំបាច់ឆ្លងកាត់"ឯកឧត្តមប្រធាន"របៀបជាច្រកចេញ-ចូលតែមួយក្តោបអំណាចខុសទំនងនោះទេ ។
មជ្ឈដ្ឋានអ្នកច្បាប់ឯករាជ្យបានធ្វើការពន្យល់ថា លោក អាំង មាលតី អតីតប្រធានសាលាដំបូងខេត្តបន្ទាយមានជ័យ ទើបត្រូវបានផ្ទេរមុខតំណែងឲ្យមកបម្រើការងារជាប្រធានសាលាដំបូងរាជធានីភ្នំពេញ តាមព្រះរាជក្រឹត្យលេខនស/រកត/០៤១៤/៤៤៨ ចុះថ្ងៃទី០៩ ខែមេសា ឆ្នាំ២០១៤ ដោយក្នុងព្រះរាជក្រឹត្យដែលត្រាស់បង្គាប់ដោយព្រះមហាក្សត្រ តាមសេចក្តីក្រាបបង្គំទូលថ្វាយរបស់រដ្ឋមន្ត្រីក្រសួងយុត្តិធម៌ ទទួលបានការឯកភាពពីឧត្តមក្រុមប្រឹក្សានៃអង្គចៅក្រម នាសម័យប្រជុំថ្ងៃទី០៨ ខែមេសា ឆ្នាំ២០១៤នោះ បានសរសេរឬហៅយ៉ាងច្បាស់លាស់ថា "លោក អាំង មាលតី" គឺមិនមែនសរសេរ ឬហៅថា "ឯកឧត្តម អាំង មាលតី"ឡើយ ។ ម្យ៉ាងទៀត ទោះបីលោកចៅក្រម អាំង មាលតីប្រធានសាលាដំបូងរាជធានីភ្នំពេញទទួលបានការតែងតាំងមុខងារ និងតួនាទីបន្ថែមជាសមាជិកឧត្តមក្រុមប្រឹក្សានៃអង្គចៅក្រមក្តី ឬជាទីប្រឹក្សារបស់ថ្នាក់ដឹកនាំស្ថាប័នណាមួយមានឋានៈចាប់ពីអគ្គនាយកឡើងទៅ ដែលមានគោរមងារជាឯកឧត្តមក្តី ក៏ក្នុងករណីអ្នកមានរឿងក្តីពាក់ព័ន្ធនឹងសាលាដំបូងរាជធានីភ្នំពេញដាក់ពាក្យបណ្តឹងមកប្រធានសាលាដំបូងឲ្យដោះស្រាយជាសមត្ថកិច្ច គឺត្រូវតែសរសេរ ឬហៅថា "លោកប្រធានសាលាដំបូងរាជធានីភ្នំពេញ" ទើបត្រឹមត្រូវតាមមុខតំណែងពិតប្រាកដរបស់លោកចៅក្រម អាំង មាលតី ជាប្រធានសាលាដំបូងរាជធានីភ្នំពេញ ។
ក្រុមអ្នកច្បាប់បានលើកឡើងដែរថា ក្នុងនាមសាលាដំបូងរាជធានីភ្នំពេញជាតុលាការគំរូ ទោះបីមិនទាន់មានច្បាប់រដ្ឋបាលសម្រាប់ប្រើប្រាស់ក្នុងស្ថាប័នតុលាការក៏ដោយ ក៏ថ្នាក់ដឹកនាំសាលាដំបូង និងមន្ត្រីរដ្ឋបាលសាលាដំបូងរាជធានីភ្នំពេញគួរតែចេះ និងស្វែងយល់អំពីបែបបទរដ្ឋបាលខ្លះផង កុំចេះតែនាំគ្នាឈ្លក់ ឬវង្វេងវង្វាន់នឹងពាក្យ"ឯកឧត្តម" ឬ "បណ្ឌិត" ដើម្បីលើកជើងខ្លាំងពេក ប្រយ័ត្នរហែកខោមេលេចកេរ្តិ៍ខ្មាស ។
សូមលោកចៅក្រម អាំង មាលតី ប្រធានសាលាដំបូងរាជធានីភ្នំពេញទើបទទួលតំណែងថ្មី ដែលទទួលបានសញ្ញាបត្របណ្ឌិតពីសាលា"CUP-ខាប់"នោះ មេត្តាត្រួតពិនិត្យ និងមានវិធានការឲ្យបានជាក់លាក់ទៅលើមន្ត្រីរដ្ឋបាលសាលាដំបូងរាជធានីភ្នំពេញនោះផង ពីព្រោះពួកគេកំពុងតែបញ្ចើចបញ្ចើបញ្ជោរលើកជើងរុញរូបលោកឲ្យធ្លាក់ទឹកហើយ ប្រសិនបើលោកមិនបានបង្គាប់បញ្ជាឲ្យមន្ត្រីរដ្ឋបាលសាលាដំបូងប្រព្រឹត្តអំពើដូច្នេះទេនោះ ៕
Source from: www.dtn7.com
Post a Comment