ការផ្សាយពាណិជ្ជកម្មដ៏ញាក់សាច់របស់មន្ទីរពេទ្យម៉ាលីយ៉ាខាង”ប៉ះសន្ទះព្រហ្មចារី”ទទួលរងការរិះគន់យ៉ាងចាស់ដៃ
បន្ទាប់ពីលេចធ្លាយរឿងអាស្រូវទាក់ទងនឹងកំហុសបច្ចេកទេសលើការព្យាបាល បណ្តាលឲ្យព្រះសង្ឃជាចៅអធិការវត្តមួយអង្គព្រះនាម នឹម វណ្ណី ព្រះជន្ម២៥ព្រះវស្សា គង់នៅវត្តអង្គអណ្តែត ឃុំថ្មី ស្រុកជុំគិរី ខេត្តកំពត សុគតក្នុងពេលវះកាត់ដុំសាច់បំពង់ក កាលពីវេលាព្រឹកនាថ្ងៃទី១៧ ខែធ្នូ ឆ្នាំ២០១៣កន្លងទៅដ៏គួរឲ្យភ្ញាក់ផ្អើល ខណៈបិទបញ្ចប់សំណុំរឿងត្រឹមបង់លុយនោះ ឥឡូវនេះមន្ទីរពេទ្យម៉ាលីយ៉ា(Maliya Hospital)មានទីតាំងឋិតនៅអគារលេខ៤១០ មហាវិថីព្រះមុនីវង្ស សង្កាត់បឹងកេងកងទី១ ខណ្ឌចំការមន រាជធានីភ្នំពេញ បានចាប់ផ្តើមទទួលរងការរិះគន់យ៉ាងចាស់ដៃសុសសាយពាសពេញបណ្តាញព័ត៌មានសង្គម Facebook ដ៏ពេញនិយមនៅកម្ពុជាទៀតហើយ ដោយសារមន្ទីរពេទ្យនេះប្រើប្រាស់វិធីសាស្ត្រផ្សព្វផ្សាយពាណិជ្ជកម្មថ្មីរបស់ខ្លួនថា មានបច្ចេកវិទ្យាវះកាត់ប៉ះសន្ទះព្រហ្មចារី និងដេរបង្រួមទ្វារមាសបែបកូរ៉េ ដោយធានាសុវត្ថិភាព គ្មានការឈឺចាប់ ងាយស្រួលឆាប់រហ័ស ឆាប់ជាសះស្បើយ និងរក្សាការសម្ងាត់ផ្ទាល់ខ្លួន…(Sic!) ។
មជ្ឈដ្ឋានប្រិយមិត្តអ្នកលេង Facebook បានលើកជាសំណួរថា ទាក់ទងនឹងការផ្សព្វផ្សាយពាណិជ្ជកម្មដ៏គួរឲ្យភ្ញាក់ផ្អើលរបស់មន្ទីរពេទ្យម៉ាលីយ៉ាបែបនេះ តើក្រសួងសុខាភិបាល និងមន្ទីរសុខាភិបាល បានជ្រាបដែរឬទេ ខណៈដែលការផ្សព្វផ្សាយពាណិជ្ជកម្មនេះត្រូវបានគេរិះគន់ថា ប៉ះពាល់ដល់កិត្តិយស និងសេចក្តីថ្លៃថ្នូរស្ត្រីខ្មែរ ព្រមទាំងប៉ះពាល់ដល់ប្រពៃណីទំនៀមទម្លាប់ខ្មែរយ៉ាងធ្ងន់ធ្ងរ ដ្បិតស្ត្រីខ្មែរមិនមែនគ្រប់យ៉ាងប្រដូចបានទៅនឹងស្ត្រីកូរ៉េនោះទេ ។
បុរសម្នាក់ដែលជាអ្នកលេង Facebook បាន Comment បែបចំអកលេងសើចថា "ចុមកន្តុមឆែប ធ្លាប់តែឮគេប៉ះកង់ ម៉ូតូ…ឥឡូវគេមានជំនាញខាងប៉ះដល់អានោះទៀត និងមានបែបកូរ៉េឯណោះផង គិតចង់ទៅសាកមើលដែរ ប៉ុន្តែខ្លួនឯងជាប្រុស…!" ។
សូមថ្នាក់ដឹកនាំក្រសួងសុខាភិបាល និងមន្ទីរសុខាភិបាលរាជធានីភ្នំពេញ មេត្តាត្រួតពិនិត្យមើលអំពីរូបភាពនៃការឃោសនាផ្សព្វផ្សាយពាណិជ្ជកម្មរបស់មន្ទីរពេទ្យម៉ាលីយ៉ាបែបនេះផង ពីព្រោះជាការផ្សព្វផ្សាយពាណិជ្ជកម្មមានចរិតបង្អាប់បង្អោនមើលងាយមើលថោកដល់តម្លៃស្ត្រីខ្មែរ និងប្រពៃណីទំនៀមទម្លាប់ខ្មែរយ៉ាងធ្ងន់ធ្ងរបំផុត ៕
Source from: www.dtn7.com
Loading...
Post a Comment