ករណីចៅអធិការវត្តទួលក្រសាំងឆាន់ស្រាស្រវឹងបើករថយន្តបុករះត្រូវបានចាប់ផ្សឹកនិងតុលាការសម្រេចឃុំខ្លួនដាក់ពន្ធនាគារហើយ
ករណីព្រះចៅអធិការវត្តជលធារាសម្បត្តិ ហៅវត្តទួលក្រសាំង ព្រះនាម ខាន់ ហេង ព្រះជន៥៦ព្រះវស្សា រួមដំណើរជាមួយព្រះសង្ឃ និងសិស្សលោកចំនួន៤អង្គ-នាក់ទៀត ដែលឆាន់ស្រាស្រវឹងបើកបររថយន្តមួយគ្រឿងម៉ាក MITSUBISHI PAJERO ពណ៌ទឹកប្រាក់ ពាក់ស្លាកលេខភ្នំពេញ 2F-0003 ធ្លាក់ផ្លូវបុករះបណ្តាលឲ្យបាក់ស្លាកសញ្ញាមណ្ឌលសុខភាពឃុំកោះខែល បាក់បង្គោលភ្លើង១ដើមលេខ NR857 និងបាក់ដើមអំពិលទឹកមួយដើមទៀត ទើបរថយន្តទៅមុខលែងរួច កាលពីល្ងាចថ្ងៃទី១៨ ខែមិថុនា ឆ្នាំ២០១៤ ត្រង់ចំណុចផ្លូវជាតិលេខ២១B ភូមិទេពអរជូន ឃុំកោះខែល ស្រុកស្អាង ខេត្តកណ្តាល នោះ ត្រូវបានចាប់ផ្សឹកឲ្យលាចាកសិក្ខាបទរួចហើយនារាត្រីថ្ងៃដដែល ព្រមទាំងត្រូវបានស្ថាប័នតុលាការសាលាដំបូងខេត្តកណ្តាលសម្រេចឃុំខ្លួនដាក់ពន្ធនាគារបណ្តោះអាសន្ន កាលពីថ្ងៃទី១៩ ខែមិថុនា ឆ្នាំ២០១៤ម្សិលមិញថែមទៀត ដោយជាប់ចោទក្នុងបទល្មើសចំនួន៤ ។
លោក កេង សុម៉ារិទ្ធ ចៅក្រមស៊ើបសួរសាលាដំបូងខេត្តកណ្តាល បានចេញដីកាសម្រេចបង្គាប់ឲ្យឃុំខ្លួនអតីតព្រះចៅអធិការវត្តទួលក្រសាំង ព្រះនាម ខាន់ ហេង ដែលក្លាយជាជនត្រូវចោទពីបទបើកបរយានជំនិះដោយគ្មានប័ណ្ណបើកបរ, បទបើកបរយានជំនិះក្នុងភាពស្រវឹង, បទកាន់កាប់រក្សាទុកគ្រាប់រំសេវគ្មានការអនុញ្ញាត និងបទប្រើប្រាស់ឯកសណ្ឋានខុសច្បាប់ ។
គួររំលឹកជូនថា ខណៈដែលកើតមានហេតុការណ៍គ្រោះថ្នាក់ចរាចរណ៍កាលពីថ្ងៃទី១៨ ខែមិថុនា ឆ្នាំ២០១៤នោះ អតីតព្រះចៅអធិការវត្តទួលក្រសាំង ដែលព្រះអង្គជាអ្នកបើកបរយានជំនិះដោយផ្ទាល់ គ្រងឯកសណ្ឋានប៉ារ៉ាខាងលើ និងស្បង់ចីវរខាងក្រោម ឋិតក្នុងស្ថានភាពស្រវឹងជោកជាំមានកម្រិតជាតិអាល់កុលរហូតដល់១,០៦មីល្លីក្រាមក្នុង១លីត្រខ្យល់ ព្រមទាំងរក្សាទុកគ្រាប់កាំភ្លើង AK47 ចំនួន១គ្រាប់នៅក្នុងហោប៉ៅអាវប៉ារ៉ា ដាក់ស្លាកសញ្ញាកងរាជអាវុធហត្ថទៀតផង ។ បន្ទាប់ពីចាប់ផ្សឹកទាំងយប់រួចហើយ សមត្ថកិច្ចនគរបាលបានបញ្ជូនខ្លួនអតីតចៅអធិការវត្តរូបនេះ និងសំណុំរឿងទៅកាន់សាលាដំបូងខេត្តកណ្តាល ដើម្បីចោទប្រកាន់ និងឃុំខ្លួនដាក់ពន្ធនាគារតែម្តង ។
ក្រុមពុទ្ធបរិស័ទចំណុះជើងវត្តជលធារាសម្បត្តិ ហៅវត្តទួលក្រសាំង បានសម្តែងនូវការស្រងាកចិត្តយ៉ាងខ្លាំងចំពោះអំពើរបស់ព្រះតេជគុណ ខាន់ ហេង ក្នុងនាមជាចៅអធិការវត្តទាំងមូល ហើយមិនដឹងថា អតីតសង្ឃអង្គនេះបានប្រព្រឹត្តអំពើខុសធម្មវិន័យចាប់តាំងពីពេលណាមកនោះទេ បែរជាទើបដឹងនៅពេលឆាន់ស្រាស្រវឹងបើករថយន្តធ្លាក់ផ្លូវបុករះ បង្កគ្រោះថ្នាក់ចរាចរណ៍ នាំឲ្យប៉ះពាល់ដល់កិត្យានុភាព និងអានុភាពព្រះពុទ្ធសាសនានៅកម្ពុជា ៕
Source from: www.dtn7.com
Post a Comment