ខេត្តកោះកុង ៖ នៅវេលាម៉ោង៩និង៤៥នាទីព្រឹកថ្ងៃទី១៩ មិថុនា លោក ប៊ុន លើត អភិបាលនៃគណៈអភិបាលខេត្តកោះកុង អមដំណើរដោយមន្ត្រីក្រុមការងារសាលាខេត្តជាច្រើនរូបទៀត បានចុះសួរសុខទុក្ខនិងសំណេះសំណាលផ្ទាល់ជាមួយពលករខ្មែរ ដែលបានវិលត្រឡប់ពីប្រទេសថៃ ចូលមកកាន់ស្រុកកំណើតវិញ តាមច្រកទ្វារអន្តរជាតិចាំយាម ។
នៅក្នុងឱកាសសំណេះសំណាលនោះ លោកអភិបាលខេត្តក៏បានផ្តល់នូវថវិកាដល់ពលករប្រមាណជាង២០នាក់ ក្នុងម្នាក់ចំនួន៣ម៉ឺនរៀល បន្ថែមលើសោហ៊ុយរថយន្ត ដែលក្នុងម្នាក់ត្រូវទិញសំបុត្ររថយន្តក្រុង ឫរថយន្តតាក់ស៊ី ម្នាក់ៗអស់៣ម៉ឺនរៀល សម្រាប់អ្នកដែលមានទីកន្លែងកំណើតនៅជិតរាជធានីភ្នំពេញ និងអ្នកខេត្តឆ្ងាយ ត្រូវចំណាយសោហ៊ុយឡានក្នុងម្នាក់ចំនួន៥ម៉ឺនរៀល ហើយនឹងមានការផ្តល់សេវាស្នាក់អាស្រ័យតាមផ្ទះសំណាក់ទៀតផង សម្រាប់ពលករណាធ្វើដំណើរទៅមិនទាន់ ។
លោកអភិបាលខេត្តបានបញ្ជាក់ឱ្យដឹងថា ពលករខ្មែរដែលចេញតាមច្រកចាំយាម សុទ្ធសឹងជាពលករស្ម័គ្រចិត្ត វិលត្រឡប់មកមាតុភូមិដោយខ្លួនឯង ពុំមានការចាប់បញ្ជូនដោយអាជ្ញាធរថៃ ដូចច្រកទ្វារអន្តរជាតិផ្សេងឡើយ ហើយពលករភាគច្រើនគាត់មានលទ្ធភាពធ្វើដំណើរវិលទៅស្រុកកំណើតដោយខ្លួនឯង ប៉ុន្តែសម្រាប់ពលករដែលទីទាល់និងខ្វះខាត អាជ្ញាធរខេត្តត្រូវទំនុកបម្រុងពួកគាត់ និងបង្កលក្ខណៈងាយស្រួលឱ្យគាត់បានវិលត្រឡប់ដល់ស្រុកកំណើតគ្រប់ៗគ្នា ។
តាមរបាយការណ៍ប៉ូលិសអន្តោប្រវេសន៍ច្រកទ្វារបញ្ជាក់ថា គិតត្រឹមម៉ោង១២ថ្ងៃត្រង់ ថ្ងៃទី១៩ មិថុនា ចំនួនពលករបានចូលមកមាតុភូមិមានចំនួន៩៤នាក់ ស្រី៤១នាក់ ក្មេង១៣នាក់ ។
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
------------
Source from: kohsantepheapdaily
Post a Comment