បារាំងអាចទទួលបានប្រាក់៧ពាន់លានអឺរ៉ូលើការនាំចេញអាវុធក្នុងឆ្នាំ២០១៤នេះ
តាមការបញ្ជាក់របស់លោក Jean-Yves Le Drian រដ្មមន្ត្រីការពារជាតិបារាំងដែលស្រង់ដោយសារព័ត៌មាន Channel News Asia បានឲ្យដឹងថា នៅឆ្នាំ២០១៤នេះបារាំងដែលជាប្រទេសនាំចេញអាវុធធំបំផុតទី៤ក្នុងពិភពលោក និងទទួលបានប្រាក់ឡើងដល់កម្រិត៧ពាន់លានអឺរ៉ូ ពីការនាំចេញអាវុធ ខណៈកាលពីឆ្នាំ២០១៣កន្លងទៅមានកម្រិត៦,៧ពាន់លានអឺរ៉ូ ។
លោករដ្ឋមន្ត្រីការពារជាតិបារាំង បានឲ្យដឹងថា ការបញ្ជាទិញអាវុធពីប្រទេសនៅមជ្ឈិមបូព៌ាក្នុងឆ្នាំ២០១៤មានទំហំ៤០ភាគរយនៃចំនួនអ្នកបញ្ជាទិញទាំងអស់ ក្នុងនោះទឹកប្រាក់៥០០លានអឺរ៉ូ សម្រាប់ជូសជុលនាវាកងទ័ពរបស់ប្រទេសអារ៉ាប៊ីសាអូឌីត ។ នៅមានប្រទេសក្នុងទ្វីបអាស៊ី និងអាមេរិកឡាទីនក៏មានការបញ្ជាទិញដែរ ក្នុងនោះទឹកប្រាក់៣០០លានអឺរ៉ូសម្រាប់បំពាក់ផ្កាយរណបទាក់ទងនៅប្រទេសប្រេស៊ីល ។ លើសពីនេះ បារាំងកំពុងអនុវត្តន៍គម្រោងបញ្ចេញនូវរថក្រោះ Scorpion បំពាក់ដោយប្រព័ន្ធបច្ចេកវិទ្យាកម្រិតខ្ពស់ក្នុងទំហំទឹកប្រាក់៥ពាន់លានដុល្លារអាមេរិកក្នុងរយៈពេល១០ឆ្នាំផងដែរ ។
បារាំងជាប្រទេសនាំចេញអាវុធធំបំផុតលំដាប់ទី៤ក្នុងពិភពលោកកម្រិតប្រមាណ៧,២ភាគរយ បន្ទាប់ពីអាមេរិក៥២ភាគរយ, អង់គ្លេស១៣,៤ភាគរយ និងរុស្ស៊ី៨,៤ភាគរយ ៕
Source from: www.dtn7.com
Post a Comment