ជប៉ុនហាមប្រាមពលរដ្ឋមិនឲ្យរក្សាទុកសៀវភៅរូបភាពអនាចារលើកុមារ
ថ្វីដ្បិតកន្លងមកព្រះរាជាណាចក្រជប៉ុនជាសមាជិកមួយក្នុងចំណោម៣៤ប្រទេសរបស់អង្គការសហប្រតិបត្តិការផ្នែកសេដ្ឋកិច្ច និងការអភិវឌ្ឍ (OCED) ដែលគ្មានការហាមប្រាមពលរដ្ឋក្នុងការរក្សាទុកសៀវភៅ និងរូបភាពអនាចារលើកុមារក៏ដោយ ក៏ប៉ុន្តែនៅពេលបច្ចុប្បន្នសភាជប៉ុន បានឆ្លងការអនុម័តច្បាប់ហាមប្រាមពលរដ្ឋមិនឲ្យរក្សាទុកនូវរូបភាពអាសអាភាសឬអនាចារកុមារឡើយ ដែលច្បាប់ថ្មីនេះបានផ្តន្ទាទោសឲ្យជាប់ពន្ធនាគារកំណត់រយៈពេល១ឆ្នាំ ឬពិន័យជាប្រាក់ចំនួន១ម៉ឺនដុល្លារអាមេរិក ក្នុងករណីមានការប្រព្រឹត្តល្មើស។
ទោះយ៉ាងណា បម្រាមដែលមានចែងនៅក្នុងច្បាប់ថ្មីរបស់ជប៉ុននេះ មិនមានដែនវិសាលភាពអនុវត្តន៍ទៅលើរូបគំនូរជីវចលកុមារដែលហៅថា «Manga» នោះឡើយ។
សមាគមទស្សនាវដ្តីជប៉ុន ដែលមានសមាជិកជាង៩០ក្រុមហ៊ុន បានចេញសេចក្តីថ្លែងការណ៍កាលពីដើមខែមិថុនា ឆ្នាំ២០១៤ ថា ច្បាប់ថ្មីនេះអាចមានផលប៉ះពាល់ដល់សិល្បករ និងការផ្សព្វផ្សាយផ្នែកវប្បធម៌។
ដោយឡែកខាងស្ថាប័នបណ្តាញសារព័ត៌មានបានរាយការណ៍ឲ្យដឹងថា កន្លងមកឧក្រិដ្ឋកម្មទាក់ទងនឹងបទល្មើសលើផ្លូវភេទក្មេងស្រីនៅក្នុងប្រទេសជប៉ុនមានការកើនឡើងច្រើន។ កាលពីឆ្នាំ២០១៣កន្លងទៅសមត្ថកិច្ចប៉ូលិសបានរាយការណ៍ថា មានសំណុំរឿងក្តីក្នុងលក្ខណៈស្រដៀងគ្នានេះចំនួន១.៦៤៤ករណី គឺកើនឡើងចំនួន១០ដង ក្នុងរយៈពេល១ទសវត្សរ៍កន្លងមក ពោលស្មើនឹងជាងពាក់កណ្តាលនៃរឿងក្តីសរុបទាក់ទងនឹងការលក់រូបថត និងវីដេអូអនាចារនៅលើប្រព័ន្ធ Internet ៕
Source from: www.dtn7.com
Post a Comment