លែងលះប្រពន្ធចុងបានមួយខែ លបកាប់ពីក្រោយ ៣កាំបិត សង្ស័យស្តាយម្ហូបចាស់

ខេត្តបាត់ដំបង ៖ បុរសម្នាក់បានយកកាំបិតត្នោត កាប់ទៅ លើប្រពន្ធចុងចំនួន ៣ កាំបិតខណដែលកំពុងធ្វើត្រី ហើយកូនប្រុសម្នាក់ទៀត ដែលរត់ចូលជួយម្តាយ ក៏ត្រូវ ឪពុកចុងចិត្តអប្រិយកាប់ត្រូវ បណ្តាលឲ្យរងរបួសក្បាលមួយកាំបិត កាលពីវេលាម៉ោង ១១ និង៣០ នាទី ថ្ងៃទី១៦ ខែកញ្ញា ឆ្នាំ២០១៣ នៅក្រុមទី០៥ ភូមិដូង ឃុំបឹងរាំង ស្រុកកំរៀង ខេត្តបាត់ដំបង។

លោក ស្រី វុឌ្ឍី អធិការរងស្រុកកំរៀង បានឲ្យដឹងថា បុរស សង្ស័យជាប្តីមានឈ្មោះ ប៊ុន រឿត ហៅញាញ់ អាយុ ៣៦ ឆ្នាំជាប្តីចុង របស់ស្ត្រីរងគ្រោះ មានស្រុកកំណើត នៅខេត្តសៀមរាប។ចំណែកស្ត្រីរងគ្រោះ មានឈ្មោះ ទូច នី អាយុ ៤៥ ឆ្នាំរងរបួសក្បាលមួយកាំបិត ស្លាបប្រចៀវស្តាំមួយកាំបិត និងដើមដៃស្តាំចំនួនមួយកាំបិតត្នោត និងកូនប្រុសឈ្មោះ រឿន ពិសី អាយុ ១៦ ឆ្នាំ រងរបួសក្បាលមួយកាំបិត ហូរឈាមជោគខ្លួន ។

សាក្សីរស់នៅក្បែរផ្ទះកើតហេតុ បានឲ្យដឹងថាឈ្មោះ ទូច នី ជាប្រពន្ធនិងឈ្មោះ ប៊ុន រឿត ហៅញាញ់ ជាប្តីចុងបានធ្វើសំបុត្រលែងលះគ្នា នៅភូមិឃុំជាងមួយខែមក ហើយ រហូតដល់ព្រឹកថ្ងៃទី១៦ ខែកញ្ញា ឆ្នាំ២០១៣នេះ មិនដឹងមានរឿងអ្វី ពេលឈ្មោះ ទូច នី ត្រឡប់ មកពីផ្សារវិញកំពុងអង្គុយធ្វើត្រី នៅមុខផ្ទះ ស្រាប់តែបុរសជាប្តីចុង បានលបមកកាប់ពីក្រោយខ្នង ចំនួន ៣កាំបិត។

ពេលកូនប្រុសរបស់ស្ត្រីរងគ្រោះ ចូលមកជួយត្រូវបុរសជាប្តី ចុង កាប់ចំក្បាលមួយកាំបិតទៀតបណ្តាលឲ្យរងរបួសធ្ងន់។ ក្រោយពីកើតហេតុ បុរសជាប្តីចុងបានរត់ឡើង ម៉ូតូឌុប គេចខ្លួនបាត់ ហើយអ្នកជិតខាង បានដឹកស្ត្រីរងគ្រោះនិងកូន មកកាន់មន្ទីរពេទ្យ ធ្វើការសង្គ្រោះតែ ម្តង។ បុរសសង្ស័យឈ្មោះ ប៊ុន រឿត ហៅញាញ់ ជាប្តីចុង កំពុងត្រូវបានសមត្ថកិច្ច តាមប្រមាញ់ ឃាត់ខ្លួនយក មកផ្តន្ទាទោសតាមផ្លូវច្បាប់៕