លិខិត​​ព្រះ​មហាក្សត្រ​​មានន័យ​​ស្នើរ​នឹង​​ច្រាន​ចោល​​ការស្នើរ​​សុំ​ពន្យា​​ពេល​​ប្រជុំ​​សភា​​លើក​​ដំបូង​

9/18/2013 03:55:00 AM

ព្រះមហាក្សត្រនៃព្រះរាជាណាចក្រកម្ពុជាព្រះករុណាព្រះបាទសម្ដេចព្រះបរមនាថ នរោត្ដម សីហមុនី បានបដិសេធលិខិតស្នើសុំរបស់គណបក្សសង្គ្រោះជាតិ ដែលសុំពន្យារពេលប្រជុំសភាលើកដំបូង ដែលគ្រោងបើកនៅថ្ងៃទី២៣ ខែកញ្ញាខាងមុខនេះ។

ព្រះរាជសាររបស់ព្រះមហាក្សត្រ ដែលតបនឹងលិខិត របស់ក្រុមតំណាងរាស្ដ្រជាប់ឆ្នោតគណបក្សសង្គ្រោះជាតិទាំង៥៥រូបឡាយព្រះហត្ថលេខានៅថ្ងៃទី១៨ខែកញ្ញាឆ្នាំ២០១៣បានឲ្យដឹងថាយោងតាមមាត្រា៨២ថ្មី នៃរដ្ឋធម្មនុញ្ញព្រះអង្គ នឹង យាងជាព្រះរាជាធិបតីភាពដ៏ខ្ពង់ខ្ពស់ក្នុងសម័យប្រជុំសភាដំបូងនៃរដ្ឋសភានីតិកាលទី៥ ដូចមានចែងក្នុងព្រះរាជសារអញ្ជើញប្រជុំចុះថ្ងៃទី១៤ខែកញ្ញា។

ព្រះរាជសារបានស្នើសុំក្រុមតំណាងរាស្ត្រជាប់ឆ្នោត របស់គណបក្សសង្គ្រោះជាតិទាំងអស់ចូលរួមក្នុងសម័យប្រជុំដំបូងនៃរដ្ឋសភាដើម្បីបង្ហាញនូវការរួបរួមនិងឯកភាពជាតិ។

យ៉ាងណាក៏ដោយលោកយឹម សុវណ្ណ អ្នកនាំពាក្យគណបក្សសង្គ្រោះជាតិបានថ្លែងប្រាប់អ្នកកាសែតនៅក្រោយកិច្ចប្រជុំកំពូលរវាងមេដឹកនាំជាន់ខ្ពស់គណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី១៧ ខែកញ្ញាថា ការចូលរួមប្រជុំសភារបស់គណបក្សសង្គ្រោះជាតិនឹងបន្តពិចារណាព្រោះគណបក្សសង្គ្រោះជាតិនៅមានរយៈពេល៥ថ្ងៃទៀត ដើម្បីពិភាក្សាជាមួយគណបក្សប្រជាជនកម្ពុជា ប៉ុន្ដែកិច្ចពិភាក្សានឹងធ្វើឡើងមុនកិច្ចប្រជុំសភាលើកដំបូងមកដល់។

ចំណែកគណបក្សប្រជាជនកម្ពុជាវិញ នៅតែបង្ហាញជំហរចូលរួមប្រជុំសភាលើកដំបូងដដែលតាមព្រះរាជតម្រិះព្រះមហាក្សត្រ។ លោកប្រាក់សុខុនមន្ដ្រីជាន់ខ្ពស់គណបក្សប្រជាជនកម្ពុជាបានថ្លែងថាការពន្យារពេលឬមិនពន្យារពេលប្រជុំនោះមិនអាស្រ័យលើគណបក្សនយោបាយនោះទេគឺអាស្រ័យទៅលើព្រះមហាក្សត្រ។

ពាក់ព័ន្ធនឹងការប្រជុំសភានេះដែរ កាលពីថ្ងៃទី១៧ ខែកញ្ញា អង្គការសង្គមស៊ីវិលជាង៤០ ដែលស្ថិតនៅក្នុងបន្ទប់ស្ថានការណ៍បោះឆ្នោតបានអំពាវនាវឲ្យមានការពន្យារពេលកិច្ចប្រជុំសភាលើកដំបូងដែលគ្រោងនៅថ្ងៃទី២៣ ខែកញ្ញាខាងមុខនេះ ដើម្បីឲ្យគណបក្សនយោបាយទាំងពីរមានពេលវេលាបន្តកិច្ចចរចារគ្នា រកដំណោះស្រាយសមស្របសិន។

គួរបញ្ជាក់ ថា កាលពីថ្ងៃទី១៧ ខែកញ្ញាអគ្គលេខាធិការដ្ឋានរដ្ឋសភា បានចេញសេចក្តីប្រកាសព័ត៌មានមួយដោយបញ្ជាក់ថា រដ្ឋសភា នីតិកាលទី៥ នឹងបើកសម័យប្រជុំដំបូងរបស់ខ្លួននៅថ្ងៃច័ន្ទទី២៣ ខែកញ្ញាខាងមុខនេះ បន្ទាប់ពីមានបញ្ហាចម្រូងចម្រាស់ខ្លះៗ ទាក់ទងនឹងការបោះឆ្នោតកាលពីថ្ងៃទី២៨ ខែកក្កដា ឆ្នាំ២០១៣កន្លងមកនេះ។

កិច្ចប្រជុំសភាលើកដំបូងនេះ គឺក្រោមព្រះរាជធិបតីភាពរបស់ព្រះមហាក្សត្រ។ បន្ទាប់ពីការបើកសម័យប្រជុំសភាលើកដំបូងបានបញ្ចប់សម័យប្រជុំរដ្ឋសភាលើកទីមួយ នីតិកាលទី៥ នឹងចាប់ផ្ដើមការងារក្រោមអធិបតីភាពសម្ដេច ហេង សំរិន ព្រឹទ្ធសមាជិករដ្ឋសភា ដើម្បីសម្រេចអំពីសុពលភាពនៃអណ្ណត្ដិសមាជិកនីមួយៗ និងការអនុម័តបទបញ្ហាផ្ទៃក្នុងនៃរដ្ឋសភានីតិកាលទី៥៕(ដោយៈឃួន សុភ័ក្រ)

Source from: Vayofm