អាមេរិក​និង ​រុស្ស៊ី​​ព្រម​ព្រៀង​គ្នា​​ថា ​គ្រោង​នឹង​​កំទេច​​អាវុធ​​គីមី​​ស៊ី​រី​​ឆាប់ៗ​

រយៈពេល៣ថ្ងៃនៃជំនួបរវាង លោកJohn Kerry ប្រមុខការទូតរបស់អាមេរិក និងលោក Sergei Lavrov ប្រមុខការទូតរបស់រុស្ស៊ីក្នុងទីក្រុងហ្សឺណែវ ស្តីពីបញ្ហាប្រទេសស៊ីរីនោះ ភាគីទាំងពីក៏បានឈានដល់ចំណុចរួមគ្នាគួរឲ្យតក់សម្គាល់។

ពោលគឺ ទាំងភាគីអាមេរិក និង រុស្ស៊ីសុទ្ធតែបានត្រូវរ៉ូវគ្នាត្រង់ថា ពួកគេមានគម្រោងក្នុងការបំផ្លាញ់ចោលនូវអាវុធគីមីក្នុងប្រទេសស៊ីរី ដែលវាជាប្រភេទអាវុធដ៏សាហាវ និង ជាអាវុធដែលពិភពលោកហាមឃាត់មិនឲ្យប្រើប្រាស់នោះ។

ក្រៅពីមានជំហរក្នុងការបំផ្លាញ់អាវុធទាំងនោះហើយ ទាំងលោក John Kerry ប្រមុខការទូតរបស់អាមេរិក និងលោក Sergei Lavrov ប្រមុខការទូតរបស់រុស្ស៊ី ក៏បានបើកចំហរទ្វាឲ្យមានការដាក់ទណ្ឌកម្មលើប្រទេសស៊ីរី ក្នុងករណីដែលប្រទេសនេះមិនព្រមធ្វើទៅតាមការលើកឡើងរបស់ខ្លួន ព្រោះថាកន្លងមកថ្មីៗនេះ លោកអាសាឌ ប្រធានាធិបតីស៊ីរីបានប្រកាសប្រាប់ពិភពលោកថា ខ្លួនមានបំណងលះបង់ចោលអាវុធគីមីក្នុងប្រទេសរបស់ខ្លួន។

ប្រធានាធិបតី អាមេរិក លោកបារ៉ាក អូបាម៉ា ក៏បានបង្ហាញ់ការស្វាគមន៏ចំពោះ ដំណើរប្រកបដោយភាពវិជ្ជមាននាពេលនេះផងដែរ តែលោកនៅតែបោះពាក្យសំដីព្រមានថា បើកាលណារដ្ឋាភិបាលលោក អាសាឌ មិនធ្វើទៅតាមការលើកឡើងរបស់ខ្លួនខាងដើមទេ អាមេរិកនឹងបើកការវាយប្រហារជាមិនខាន។

យ៉ាងណាក៏ដោយ រុស្ស៊ីនៅតែបញ្ជាក់ហើយបញ្ជាក់ទៀតថា ខ្លួននឹងមិនយល់ស្របនោះទេ ចំពោះការចូលអន្តរាគមន៏យោធាក្នុងប្រទេសស៊ីរី បើទោះបីជាស្ថិតក្នុងស្ថានការណ៏អ្វីក៏ដោយ ព្រោះវានឹងបង្កបញ្ហា ឲ្យកាន់តែស្មុគស្មាញ់ខ្លាំងថែមទៀតជាមិនខាន។

ស្របពេលដែលអាមេរិក និង រុស្ស៊ីបានព្រមព្រាងគ្នាលើចំណុចនេះ ក្រុមឧទាមស៊ីរីឯនោះវិញបានសម្តែងនូវការមិនពេញចិត្តឡើយ ហើយបានបញ្ជាក់ថាវាមិនអាចជាដំណោះស្រាយក្នុងការបញ្ចប់ភ្លើងសង្គ្រាមដ៏ស្មុគស្មាញ់នោះទេ។

រីឯលោក បានគីមូន អគ្គលេខាធិការអង្គការសហប្រជាជាតិបានចោទប្រកាន់លោកអាសាឌ ប្រធានាធិបតីស៊ីរីថា គឺជាប់ពាក់ព័ន្ធទៅនឹងឧក្រិតកម្មសង្គ្រាមប្រឆាំងនឹងមនុស្សជាតិ។

ក្រុមអ្នកជំនាញអាវុធគីមីដែលបានបើកការស៊ើបអង្កេតក្នុងប្រទេសស៊ីរីនាពេលកន្លងទៅនោះ គ្រោងនឹងបង្ហាញ់របាយការណ៏របស់ខ្លួននៅថ្ងៃចន្ទ ដើម្បីបញ្ជាក់ថា ការវាយប្រហាកាលពីថ្ងៃទី២១សីហាកន្លងទៅក្នុងប្រទេសស៊ីរីបណ្តាលឲ្យមនុស្សជាង ១ពាន់នាក់ ភាគច្រើនជាស្ត្រី និងកុមារបានស្លាប់នោះជាករណីប្រើប្រាស់អាវុធគីមី ឬមិនមែន។(ដោយៈអ៊ុន រស្មី)

Source from: Vayofm