លោក អ៊ុក ឃ្នួច និង​​លោក ស ថេត មិន​គួរ​​មើល​រំ​លង​​ពី​​ភាព​អ​នា​ធិប​តេ​យ្យ នៅ​​ច្រក​របៀង ៦៣ ហៅ​​ច្រក​​អង់​តែ​ន​ ក្នុង​ស្រុក​​​សំ​​ពៅ​​​លូន

10/10/2013 05:30:00 PM

ខេត្តបាត់ដំបង៖មិនថារដូវទឹកស្រកឬទឹកឡើងនោះទេគេសង្កេតឃើញពលកររាប់សិបនាក់បានធ្វើចំណាកស្រុកតាមច្រករបៀង

ខេត្តបាត់ដំបង ៖ មិនថារដូវទឹកស្រក ឬទឹកឡើងនោះទេ គេសង្កេតឃើញ ពលកររាប់សិបនាក់ បានធ្វើចំណាកស្រុក តាមច្រករបៀង ៦៣ ហៅច្រកអង់តែន ស្ថិតក្នុងភូមិពោធិ៍ជ្រៃ ឃុំជ្រៃសីមា ស្រុកសំពៅលូន ខេត្តបាត់ដំបងដោយខុសច្បាប់ជាប់ជាប្រចាំ ព្រោះសមត្ថកិច្ចនៅតាមច្រកនេះ មិនបានទប់ស្កាត់នោះទេ ថែមទាំងឃុបឃិតគ្នា យកប្រាក់ពីមេខ្យល់ ដែលនាំពលករចេញទៅប្រទេសថៃទៀតផង។

ជាពិសេសឈ្មោះ ក្លឹង ម៉ាប់ មេបញ្ជការយោធា(ខ)របស់សឹករងស្រុក សំពៅលូន គឺជាអ្នកជួយសម្របសម្រួល ឲ្យពលករឆ្លងដែន ដោយខុសច្បាប់។ នៅច្រករបៀង ៦៣ ហៅច្រកអង់តែន មានកម្លាំងនគរបាល វរៈការពារព្រំដែនគោក ៨១៧ និងកម្លាំងយោធាសឹករង ស្រុកសំពៅលូន ជាអ្នកយាមប្រចាំការ ហើយប្រជាពលរដ្ឋដែលធ្លាប់ ឆ្លងដែនបានឲ្យដឹងថា ឈ្មោះ ក្លឹង ម៉ាប់ ជាអ្នកយកប្រាក់ចំនួន ១០០ បាតពីពលករម្នាក់ៗ ដែលត្រូវដើរឆ្លងកាត់ច្រកនេះ ចូលទៅប្រទេសថៃ។

ឈ្មោះ ក្លឹង ម៉ាប់ មេបញ្ជាការយោធា ប្រចាំច្រក ៦៣ នេះធ្លាប់បានអះអាងថា គាត់មិនដែលបានយកប្រាក់ ពីពលករតាមច្រកនេះទេ។ នៅព្រឹកថ្ងៃទី១០ ខែតុលា អ្នកសារព័ត៌មាន បានធ្វើបទសម្ភាស ជាមួយលោក ឯម សុខន មេបញ្ជាការយោធា សឹករងស្រុកសំពៅលូន ក៏លោកបានបញ្ជាក់ថា មិនទាន់ដឹងច្បាស់ ពីការឆ្លងដែនរបស់ពលករនៅឡើយទេ ចាំលោកសួរទៅកូនចៅសិន ម្យ៉ាងទៀតលោកកំពុងជាប់រវល់ ចុះជួយសង្គ្រោះប្រជាពលរដ្ឋ នៅឃុំអូរតាគី ស្រុកថ្មគោល។

ចំណែកលោក ស្រី សុខុន មេបញ្ជាការនគរបាល វរៈការពារព្រំដែនគោក ៨១៧ មិនលើកទូរស័ព្ទឡើយ។ ចំពោះការនាំពលករឆ្លងដែនខុសច្បាប់ នៅច្រក ៦៣ នេះអ្នកសារព័ត៌មាន បានចុះផ្សាយតាំងពីមិនទាន់ មានទឹកអូរកាលពីដើមខែសីហា ឆ្នាំ២០១៣ ដូចរូបភាពឈ្មោះ ក្លឹង ម៉ាប់ កំពុងឈទំនាក់ទំនងជាមួយមេខ្យល់ ក្បែរម៉ូតូយកប្រាក់ជាដើម។ មានរូបថតមួយទៀត បង្ហាញពីរថយន្តដឹកពលករ ចូលកាលពីព្រឹកថ្ងៃទី០៩ ខែតុលា ឆ្នាំ២០១៣ និងរូបភាពឆ្លងទឹកតាមខ្សែរ៉ត ចូលទៅកាន់ទឹកដីថៃ នៅព្រឹកថ្ងៃទី១០ ខែតុលា ឆ្នាំ២០១៣។

យ៉ាងណាក៏ដោយ អាជ្ញាធរស្រុកសំពៅលូន បានបញ្ជាក់ថា មេបញ្ជាការសឹករង និងមេបញ្ជាការនគរបាល វរៈការពារព្រំដែនគោកលេខ ៨១៧ បានបើកដៃឲ្យកូនចៅ ប្រព្រឹត្តខុសឆ្គងគ្មានថ្ងៃកែខ្លួនឡើយ ព្រោះគ្រប់ពេលដែល ប្រជាពលរដ្ឋបានរាយការណ៍ ពីករណីឆ្លងដែនខុសច្បាប់ សឹងរាប់ភ្លេចទៅហើយ មិនមានការទប់ស្កាត់ ម្តងណាឡើយ។ ដូច្នេះសូមលោក អ៊ុក ឃ្នួច ជាមេបញ្ជាការសឹករងខេត្ត និងលោក ស ថេត ស្នងការនគរបាលខេត្តបាត់ដំបង មេត្តាពិនិត្យមើលកូនចៅ ក្រោមឱវាទនៅប្រចាំច្រក៦៣ ហៅច្រកអង់តែនទាំងនេះផង៕