ខេត្តព្រះសីហនុ៖ប្រជាពលរដ្ឋនៅតំបន់ទំនប់រលកបានស្គាល់ពីឥទ្ធិពលអំណាចរបស់លោកឌិនវ៉ាន់ឌីដែលជាមេឈ្មួញរកស៊ីនាំចូលទំនិញគេចពន្ធនិងទំនិញខុសច្បាប់ខេត្តព្រះសីហនុ ៖ ប្រជាពលរដ្ឋនៅតំបន់ទំនប់រលក បានស្គាល់ពីឥទ្ធិពលអំណាចរបស់លោក ឌិន វ៉ាន់ឌី ដែលជាមេឈ្មួញរកស៊ីនាំចូល ទំនិញគេចពន្ធនិងទំនិញខុសច្បាប់ តាមផ្លូវសមុទ្រចូលមកលក់ចែកចាយ ពាសពេញខេត្តព្រះសីហនុនិងបន្តនាំ មកលក់ចែកចាយដល់ បណ្តាខេត្តមួយចំនួនទៀត គ្មាននរណាហ៊ានប៉ះពាល់ទេ មិនដឹងជាមេឈ្មួញដ៏មានឥទ្ធិពលម្នាក់នេះ ផ្តល់ផលប្រយោជន៍ឲ្យមន្ត្រីជំនាញ និងសមត្ថកិច្ចពាក់ព័ន្ធ ក្នុងកម្រិតណានោះទេ។
សេចក្តីរាយការណ៍ព័ត៌មាន ពីខេត្តព្រះសីហនុ បានឲ្យដឹងថា បច្ចុប្បន្ននេះមានរថយន្តទាំងតូចទាំងធំ បានធ្វើសកម្មភាពដឹកជញ្ជូនទំនិញ គេចពន្ធនិងទំនិញខុសច្បាប់ ចេញពីផ្ទះរបស់លោក ឌិន វ៉ាន់ឌី ជាមន្ត្រីយោធាជើងទឹក ដ៏មានឥទ្ធិពលនៅចំណុចទំនប់រលក មកលក់ចែកចាយបោះដុំតាមឃ្លាំង តាមហាងលក់ទំនិញ ដែលជាទីតាំងស្តុកដ៏សំខាន់ របស់ឈ្មួញកណ្តាល សម្រាប់លក់ចែកចាយបន្ត នៅទូទាំងខេត្តព្រះសីហនុ។ ទំនិញគេចពន្ធជាច្រើន ដែលត្រូវបាននាំចូលយកមកស្តុកទុក នៅចំណុចផ្ទះលោក ឌិន វ៉ាន់ឌី គឺមានប្រភេទគ្រឿងស្រវឹង ភេសជ្ជៈ គ្រឿងទេស និងទំនិញដ៏មានតម្លៃ ជាច្រើនប្រភេទទៀត។
ជាទៀងទាត់ទំនិញគេចពន្ធ របស់លោក ឌិន វ៉ាន់ឌី ត្រូវបានដឹកជញ្ជូនចូលតាមផែផ្ទាល់ខ្លួន ដោយគ្មានការត្រួតពិនិត្យអ្វីឡើយ។ មានការបង្ហើបឲ្យដឹងផងដែរថា ទូកដឹកទំនិញធំៗបានចូលចត នៅកណ្តាលសមុទ្រ ប៉ុន្តែទូកតូចៗត្រូវបានលោក ឌិន វ៉ាន់ឌី យកទៅសាងទំនិញ ឡើងតាមផែផ្ទាល់ខ្លួន ដែលស្ថិតនៅក្រោយផ្ទះរបស់គាត់ ទាំងយប់ទាំងថ្ងៃ គេមិនដែលឃើញសមត្ថកិច្ច ណាមួយយកចិត្តទុកដាក់ពីបញ្ហានេះនោះទេ ហើយទំនិញជាច្រើន ត្រូវបានដឹកជញ្ជូនតាមរថយន្ត ចេញពីផ្ទះរបស់លោក ឌិន វ៉ាន់ឌី ទៅលក់ចែកចាយយ៉ាងអនាធិបតេយ្យ ក៏គ្មាននរណាហ៊ានហើបមាត់ទាល់តែសោះ ព្រោះមានការបង់លុយជូនមន្ត្រីជំនាញ និងសមត្ថកិច្ចពាក់ព័ន្ធសព្វគ្រប់អស់ហើយ។
លោក ឌិន វ៉ាន់ឌី បានប្រើប្រាស់រថយន្តចំនួន ៤គ្រឿង សម្រាប់ដឹកជញ្ជូនទំនិញគេចពន្ធ និងទំនិញខុសច្បាប់ចេញ ពីផ្ទះរបស់គាត់នៅតំបន់ទំនប់រលក យកទៅចែកចាយតាមដេប៉ូ និងហាងស្តុកទំនិញ គឺមានរថយន្តកូរ៉េ រថយន្តពណ៌ត្រេអ៊ី ពាក់ស្លាកលេខ ខេមរភូមិន្ទ របស់អង្គភាព រថយន្តទួរីស ដែលមានពាក់ស្លាកលេខស៊ីវិល បើកបរតាមផ្លូវផែលេខ៦៥ ស្ថិតក្នុងភូមិ៣ ទំនប់រលក ក្នុងសង្កាត់លេខ១ សឹងខូងផ្លូវទៅហើយ ហេតុអ្វីបានជាសមត្ថកិច្ច និងជំនាញពាក់ព័ន្ធ ធ្វើជាមិនដឹងមិនឮ ចំពោះភាពអនាធិបតេយ្យ នៃការដឹកជញ្ជូនទំនិញគេចពន្ធទាំងនេះ។
លោក ឌិន វ៉ាន់ឌី មានស្បែកជាយោធាជើងទឹកក៏ពិតមែន ប៉ុន្តែគាត់មិនសូវបង្ហាញ វត្តមានក្នុងបន្ទាយទេ គឺសកម្មបំផុតក្នុងការចាត់ចែង ដឹកជញ្ជូនទំនិញគេចពន្ធ តាមផ្លូវសមុទ្រមកពីស្រុកសៀម ឡើងតាមផែផ្ទាល់ខ្លួន ខាងក្រោយផ្ទះរបស់គាត់ ដើម្បីបន្តយកទៅចែកចាយ តាមដេប៉ូ និងហាងស្តុកទំនិញ យ៉ាងគគ្រឹកគគ្រេងបំផុត។ គេមិនដែលឃើញថ្នាក់លើ ចាត់វិធានការដាក់ពិន័យលើលោក ឌិន វ៉ាន់ឌី ដែលយកស្បែកជាយោធា ទៅរកស៊ីដឹកជញ្ជូនទំនិញខុសច្បាប់ បំផ្លាញចំណូលថវិកាជាតិនោះទេ ហើយប្រភេទទំនិញជាច្រើន ដែលលោក ឌិន វ៉ាន់ឌី នាំចូលដោយខុសច្បាប់ គេសង្ស័យថា ជាការប្រព្រឹត្តបំពានទៅលើសិទ្ធិផ្តាច់មុខ របស់ក្រុមហ៊ុនធំៗ មួយចំនួនផងដែរ។
យ៉ាងណាក៏ដោយការអនុញ្ញាតឲ្យឈ្មួញឯកជន បង្កើតផែផ្ទាល់ខ្លួនសម្រាប់ឡើងទំនិញ យ៉ាងអនាធិបតេយ្យបែបនេះ ច្បាស់ជាកើតចេញពីការឃុបឃិតណាមួយ ពីប្រធានមន្ទីរសាធារណការខេត្តព្រះសីហនុ អាចធ្វើបាត់បង់ចំណូលពន្ធ យ៉ាងច្រើនសន្ធឹកសន្ធាប់ ហើយសម្រាប់ការនាំចូលទំនិញ តាមផែផ្ទាល់ខ្លួនបែបនេះ ជាឱកាសដែលឈ្មួញ អាចនាំចូលទំនិញខុសច្បាប់ ចូលប្រទេសកម្ពុជា ដែលគ្មានការត្រួតពិនិត្យត្រឹមត្រូវ ពីមន្ត្រីជំនាញនិងសមត្ថកិច្ចពាក់ព័ន្ធ ហើយលោក ឌិន វ៉ាន់ឌី មានលុយមានអំណាច ក៏ដោយសារតែអាជីព រកស៊ីដឹកជញ្ជូនទំនិញគេចពន្ធតាមផ្លូវសមុទ្រ និងមានផែផ្ទាល់ខ្លួន មិនដែលខ្វល់ខ្វាយពីការរឹតបន្តឹង របស់អង្គភាពប្រឆាំងអំពើពុករលួយ ម្តងណាឡើយ៕
Source from: watphnom-news.com
Loading...
Post a Comment