ខេត្តកណ្តាល ៖ ភាពមិនប្រក្រតីនិងអំពើពុករលួយ ពាក់ព័ន្ធការប្រមូលចំណូលជូនជាតិ បានកើតមានក្នុង សាខាពន្ធដារខេត្តកណ្តាល ស្ថិតក្រោមការគ្រប់គ្រង របស់លោក ទាវ សាវឿន ហើយកាលពីពេលថ្មីៗនេះ ប្រជាពលរដ្ឋបានលើកឡើង អំពីករណីដែលមន្ត្រីពន្ធដារ កោសរូសបង្ខំឲ្យពួកគាត់បង់ពន្ធដីប្រចាំឆ្នាំ និងការផ្ទេរកម្មសិទ្ធិដីធ្លី ទៅតាមតែបបូរមាត់របស់ពួកគេ គ្មានខ្លាចញញើត ពីច្បាប់ទម្លាប់នោះទេ ហើយគេចង់ឃើញលោក គង់ វិបុល ជាអគ្គនាយក នៃអគ្គនាយកដ្ឋានពន្ធដារ ក៏ដូចជាលោក ឱម យ៉ិនទៀង ស៊ើបអង្កេតទៅលើ ភាពមិនប្រក្រតី នៃអំពើពុករលួយ ដែលកំពុងកើតមាន យ៉ាងស្ងៀមស្ងាត់ ក្នុងសាខាពន្ធដារខេត្តកណ្តាល ជាបន្ទាន់។
ប្រជាពលរដ្ឋបានលើកឡើងថា មន្ត្រីទទួលបន្ទុកការប្រមូលពន្ធ មួយចំនួនមិនដែលបានបង្ហាញ ជាសាធារណៈឲ្យប្រជាពលរដ្ឋ និងក្រុមអាជីវករបានដឹងទេ ហើយនៅពេលគេចុះ មកប្រមូលពន្ធប្រចាំខែ ឬការប្រមូលពន្ធប៉ាតង់ អាស្រ័យទៅលើការទាមទារ ឬទៅតាមបបូរមាត់របស់មន្ត្រីពន្ធដារ ដែលពូកែកោសរូស គ្មានការយោគយល់អ្វីឡើយ។ ជាធម្មតា សេវានៃការបង់ពន្ធ មិនទៀងទាត់ ម្តងប៉ុណ្ណេះម្តងម្តងប៉ុណ្ណោះ អាស្រ័យតែលើបបូរមាត់ របស់មន្ត្រីពន្ធដារ ហើយករណីដែល ប្រជាពលរដ្ឋទាមទារ ឲ្យមានតម្លាភាពក្នុងការបង់ពន្ធ ក៏ត្រូវគេបង្កឲ្យមានបញ្ហា ឲ្យយឺតយ៉ាវនិងគួរឲ្យធុញទ្រាន់ តាមរយៈការទុកឯកសារ ចោលនៅកន្លៀតជញ្ជាំង។
ថ្មីៗនេះប្រជាពលរដ្ឋ នៅក្នុងស្រុកស្អាង ក៏បានលាតត្រដាងរឿង អាស្រូវពុករលួយ របស់មន្ត្រីពន្ធដារម្នាក់ឈ្មោះ រស់ ផល្លា ជាមនុស្សជំនិតបំផុត របស់លោក ទាវ សាវឿន ទទួលបន្ទុកការបង់ពន្ធដីធ្លី ប្រចាំស្រុកស្អាង តាមរយៈការបង្ខំ ឲ្យប្រជាពលរដ្ឋបង់ពន្ធដីធ្លី និងការផ្ទេរកម្មសិទ្ធិ ទៅតាមតែការនឹកឃើញរបស់គាត់។ ដូចជាករណីខ្លះទំហំដីតូចនិងធំ នៅជាប់គ្នា បែរជាការកំណត់តម្លៃ បង់ពន្ធខុសគ្នាដូចមេឃនិងដី ហើយសម្រាប់សេវា ផ្ទេរកម្មសិទ្ធិលោក រស់ ផល្លា បានកំណត់តម្លៃដល់ទៅរាប់ពាន់ដុល្លារ គឺសម្រាប់ប្រជារាស្ត្រ ក្រីក្រទន់ខ្សោយមិនសូវចេះដឹង ឬមិនយល់អំពីការបង់ពន្ធ ពិតជារងគ្រោះដោយការកាប់ឆៅរបស់លោក រស់ ផល្លា។
ប្រជាពលរដ្ឋបានលើកជាសំណួរថា ហេតុអ្វីបានជាសេវា ឬតម្លៃបង់ពន្ធដីសម្រាប់ ការផ្ទេរកម្មសិទ្ធិខុសគ្នាដូចមេឃនិងដី ក្រោមការគ្រប់គ្រងរបស់លោក រស់ ផល្លា? ជាក់ស្តែង ដីមួយចំនួននៅម្តុំផ្សារ លោក រស់ ផល្លា បានកំណត់ឲ្យបង់ពន្ធ សម្រាប់ការផ្ទេរកម្មសិទ្ធិម្តងៗ ចំនួន ៣ ពាន់ដុល្លារ ដែលជាតម្លៃគោលមួយ។ ប៉ុន្តែក្នុងនោះអាចតថ្លៃគ្នាបាន មិនខុសពីផ្សារត្រីប៉ុន្មានទេ ប្រសិនបើប្រជាពលរដ្ឋមួយចំនួន ពូកែតថ្លៃ ឬមានខ្សែទុយោ អាចសុំការយោគយល់ ចុះតម្លៃបង់ពន្ធផ្ទេរកម្មសិទ្ធិនៅសល់ ២ពាន់ ឬ១៧០០ដុល្លារ ប៉ុណ្ណោះ ក្នុងករណីដែលលោក រស់ ផល្លា ទាមទារឲ្យបង់ពន្ធក្នុងតម្លៃកំណត់ ៣ ពាន់ដុល្លារអាមេរិក។
អង្គភាពប្រឆាំងអំពើពុករលួយ បានព្រមានបោសសម្អាត មន្ត្រីខិលខូចពុករលួយ ក្នុងអង្គភាពពន្ធដារមួយចំនួន ដូច្នេះគេយល់ថា ភាពមិនប្រក្រតី និងអំពើពុករលួយ ដែលកំពុងកើតមានយ៉ាងពេញបន្ទុកក្នុងអង្គភាព សាខាពន្ធដារខេត្តកណ្តាល មិនគួរត្រូវបានថ្នាក់លើ មើលរំលងនោះទេ ជាពិសេសករណីពុករលួយ ពាក់ព័ន្ធការិយាល័យប្រមូលពន្ធតាមរបបពិត ឬប្រមូលពន្ធតាមរបបម៉ៅការ ដែលមន្ត្រីពន្ធដារមួយចំនួនមានឱកាស ប្រព្រឹត្តអំពើពុករលួយ។ ជាពិសេសករណីរបស់លោក រស់ ផល្លា ដែលមានជំនាញកោសរូស ឲ្យប្រជាពលរដ្ឋបង់ពន្ធដី ឬពន្ធផ្ទេរកម្មសិទ្ធិ តាមតែបបូរមាត់របស់គាត់ គេមិនដែលឃើញលោក ទាវ សាវឿន ហ៊ានហើបមាត់ម្តងណាឡើយ៕
Source from: watphnom-news.com
Post a Comment