រាជធានីភ្នំពេញ ៖ កាលពីថ្ងៃទី១៨ ខែតុលា ឆ្នាំ២០១៣ គណៈកម្មាធិការជាតិ សុវត្ថិភាពចរាចរណ៍ផ្លូវគោក សហការជាមួយអង្គការ សុខភាពពិភពលោក បានធ្វើសន្និសីទសារព័ត៌មាន ប្រកាសផ្សព្វផ្សាយយុទ្ធនាការ “ បើពិសាគ្រឿងស្រវឹងកុំបើកបរ! ” ដែលជាផ្នែកមួយនៃកម្មវិធី សុវត្ថិភាពចរាចរណ៍ផ្លូវគោកសកល ក្រោមការឧបត្ថម្ភពីមូលនិធិប្ល៊ូមបឺគភីលែនត្រូភី (Bloomberg Philanthropies) ដែលយុទ្ធនាការនេះ មានគោលបំណងបង្កើនការយល់ដឹង ដល់សាធារណជនអំពីផលបច្ច័យអាក្រក់ និងភាពធ្ងន់ធ្ងរនៃការបើកបរ ក្រោមឥទ្ធិពលគ្រឿងស្រវឹង។
នៅក្នុងប្រទេសកម្ពុជាការស្លាប់ និងការរងរបួសដោយសារ គ្រោះថ្នាក់ចរាចរណ៍គឺជា បញ្ហាសុខភាពសាធារណៈ គួរឲ្យព្រួយបារម្មណ៍។ ជាមធ្យមក្នុងមួយថ្ងៃ មានមនុស្សប្រមាណ ៥នាក់បានស្លាប់ និង ១៦នាក់ទៀតរងរបួសធ្ងន់ នៅលើផ្លូវនៃប្រទេសកម្ពុជា ដោយយោងតាមប្រសាសន៍របស់ ឯកឧត្តម ត្រាំ អ៊ីវ តឹក រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោក។ ក្នុងឆ្នាំ២០១២នេះ ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរណ៍បានរាយការណ៏ថា ជនរងគ្រោះដោយសារគ្រោះថ្នាក់ចរាចរណ៍ មានចំនួន ១៥,៦១៥ នាក់ ដែលក្នុងនោះមានអ្នកស្លាប់ ១,៩៦៦ នាក់ និងរបួសធ្ងន់ ៥,៣៤៩ នាក់។
ការបើកបរនៅក្រោម ឥទ្ធិពលគ្រឿងស្រវឹងគឺជា កត្តាហានិភ័យចំបងទីពីរ បន្ទាប់ពីការបើកបរលើសល្បឿនកំណត់ ដែលជាឥរិយាបទដ៏មានគ្រោះថ្នាក់បំផុត នៃគ្រោះថ្នាក់ចរាចរណ៍ ដែលបានធ្វើឲ្យបាត់បង់ជីវិតមនុស្សចំនួន ២៥៤ នាក់គឺស្មើនិង ១៣% នៃការស្លាប់ដោយសារ គ្រោះថ្នាក់ចរាចរណ៍ទាំងអស់។ ប្រមាណជា ៦៣% នៃអ្នកបើកបរនៅក្រោមឥទ្ធិពលគ្រឿងស្រវឹង ដែលបង្កឲ្យមានគ្រោះថ្នាក់ចរាចរណ៍ មានអាយុពី ២០-៣៤ ឆ្នាំ។ បន្ថែមទៅលើសោកនាដកម្ម ដែលបានបង្កឡើង គ្រោះថ្នាក់ចរាចរណ៍បានធ្វើឲ្យ បាត់បង់ចំណូលសេដ្ឋកិច្ច ដ៏ធ្ងន់ធ្ងរដល់ជនរងគ្រោះ ក្រុមគ្រួសារ និងសង្គមទាំងមូល ហើយថែមទាំងបង្កើននូវបន្ទុក ដ៏ធ្ងន់ថែមទៀតដល់ប្រព័ន្ធសុខាភិបាល ដែលមានថវិកាកំណត់។ ការបាត់បង់សេដ្ឋកិច្ចជាតិ ប្រចាំឆ្នាំដោយសារការបើកបរ ក្រោមឥទ្ធិពលគ្រឿងស្រវឹង មានប្រមាណជា ៤៣លាន ដុល្លារអាមេរិក។
ឯកឧត្តម ត្រាំ អ៊ីវតឹក បានមានប្រសាសន៍ថា ការពិសាគ្រឿងស្រវឹង សូម្បីតែក្នុងកម្រិតតិចតួចក្តី អាចបង្កើនហានិភ័យ ដោយបង្កឲ្យមានគ្រោះថ្នាក់ចរាចរណ៍ ដល់អ្នកបើកបរយានយន្ត និងថ្មើរជើង។ ដូច្នេះគេមិនចាំបាច់ពិសា ទាល់តែស្រវឹងនោះទេ ដើម្បីឲ្យបាត់បង់សមត្ថភាព ជំនាញក្នុងការបើកបរ ឬបង្កឲ្យមានគ្រោះថ្នាក់ចរាចរណ៍។ យុទ្ធនាការផ្សព្វផ្សាយ “បើពិសាគ្រឿងស្រវឹងកុំបើកបរ!”ត្រូវបានផលិតឡើង ដោយគណៈកម្មាធិការជាតិ សុវត្ថិភាពចរាចរណ៍ផ្លូវគោក ដោយមានការផ្តល់ ជំនួយបច្ចេកទេស ពីអង្គការសុខភាពពិភពលោក។ យុទ្ធនាការនេះរួមមាន ការផ្សព្វផ្សាយតាមទូរទស្សន៍ វិទ្យុ ផ្ទាំងប៉ាណួរូបភាព ហើយនិងផ្សាយតាមរ៉ឺម៉កផងដែរ។
លោកវេជ្ជបណ្ឌិត Pieter JM Van Maaren បានបញ្ជាក់ថា យុទ្ធនាការផ្សព្វផ្សាយនេះ និងពញ្ញាក់ស្មារតី របស់ប្រជាជនឲ្យយល់ដឹង អំពីគ្រោះថ្នាក់ដ៏ធ្ងន់ធ្ងរ និងពិតប្រាកដ នៃការពិសាគ្រឿងស្រវឹងហើយបើកបរ បើទោះបីជាពិសា ក្នុងកម្រិតតិចតួចក្តី។ នៅក្នុងរូបភាពគ្រោះថ្នាក់ដ៏រន្ធត់ យើងចង់បង្ហាញប្រជាជន ឲ្យយល់ដឹងអំពីថាតើហេតុដូចម្តេច បានជាអាចធ្វើឲ្យអ្នកបើកបរ បាត់បង់ម្ចាស់ការក្នុងការបញ្ជា យានយន្តមួយរំពេច នៅពេលដែលគេស្ថិត នៅក្រោមឥទ្ធិពលគ្រឿងស្រវឹង។
នៅក្នុងពេលជាមួយគ្នានេះដែរ យើងចង់ផ្តល់ព័ត៌មាន ដល់ប្រជាជនបានជ្រាបថា នឹងមាននគរបាលចរាចរណ៍ ចុះប្រតិបត្តិការត្រួតពិនិត្យ ការបើកបរក្រោមឥទ្ធិពល គ្រឿងស្រវឹងកាន់តែច្រើនថែមទៀត ហើយប្រសិនបើប្រជាជនសម្រេចចិត្តថា ចង់ពិសាគ្រឿងស្រវឹង ហើយបើកបរនោះ ការប្រឈមទៅនិងការឃាត់ខ្លួន ហើយនិងការផាកពិន័យ កាន់តែខ្ពស់ហើយធ្ងន់ជាងមុន នៅពេលឆាប់ៗខាងមុខនេះ។ យុទ្ធនាការនេះនឹងផ្សព្វផ្សាយមុនពេលបុណ្យអ៊ុំទូក ហើយមានរយៈពេលពីរខែ រហូតដល់ដំណាច់ ខែវិច្ឆិកាឆ្នាំ២០១៣។
“ដោយមានការគាំទ្រពីការពង្រឹងច្បាប់ ប្រតិបត្តិការរឹតបន្តឹងច្បាប់ ដ៏តឹងរឹង និងជាប់ជាប្រចាំ ហើយនិងការចេញបញ្ញតិ ត្រួតពិនិត្យនូវការផ្សព្វផ្សាយគ្រឿងស្រវឹង នោះយុទ្ធនាការនេះ នឹងមានប្រសិទ្ធិភាពខ្ពស់ក្នុងការកាត់បន្ថយ គ្រោះថ្នាក់ចរាចរណ៍ដោយសារ ការបើកបរក្រោមឥទ្ធិពលគ្រឿងស្រវឹង នៅក្នុងប្រទេសកម្ពុជា ”នេះបើយោងតាមប្រសាន៍ របស់ឯកឧត្តម ចាន់ គឹមសេង ប្រធាននាយកដ្ឋានកណ្តាលសណ្តាប់ធ្នាប់សាធារណៈ នៃក្រសួងមហាផ្ទៃ។
កម្មវិធីសុវត្ថិភាពចរាចរណ៍ផ្លូវគោកសកលនេះ បានទទួលការឧបត្ថម្ភពីមូលនិធិប្ល៊ូមបឺគភីលែនត្រូភី និងការផ្តល់ជំនួយបច្ចេកទេស ដោយអង្គការសុខភាពពិភពលោក។ លោកស្រីវេជ្ជបណ្ឌិត Kelly Henning ប្រធានកម្មវិធីសុខភាពសាធារណៈ របស់ប្ល៊ូមបឺគភីលែនត្រូភី បានមានប្រសាសន៍ថា “ថ្ងៃនេះយើងបានប្រារព្ធព្រឹត្តការណ៏សំខាន់មួយទៀត នៃការខិតខំប្រឹងប្រែងរបស់យើង ក្នុងការប្រយុទ្ធជាមួយនិងការបាត់បង់ ដែលមិនអាចទទួលយកបាននូវ អាយុជីវិតរបស់ប្រជាជនកម្ពុជា ដោយសារគ្រោះថ្នាក់ចរាចរណ៍”។ “យុទ្ធនាការផ្សព្វផ្សាយថ្មីនេះ នឹងបង្កើនការយល់ដឹងរបស់ប្រជាជនថា ការបើកបរក្រោមឥទ្ធិពលគ្រឿងស្រវឹង គឺមិនអាចទទួលយកបានទេ ហើយវាប្រាកដដោយគ្រោះថ្នាក់បំផុត ដែលជាញឹកញាប់ វាបានបង្កឲ្យមានការរងរបួស និងការបាត់បង់ជិវិត”។
រាជរដ្ឋាភិបាលកម្ពុជា បានធ្វើវិសោធន៍កម្មច្បាប់ចរាចរណ៍ផ្លូវគោក ដើម្បីទប់ស្កាត់ការបើកបរក្រោមឥទ្ធិពលគ្រឿងស្រវឹង ហើយយើងបានគាំទ្រ ការខិតខំប្រឹងប្រែងនេះ ដើម្បីឲ្យការធ្វើវិសោធន៍កម្មនេះ បោះជំហ៊ានទៅមុខ។ ការធ្វើវិសោធន៍កម្ម ច្បាប់ចរាចរណ៍ផ្លូវគោកនេះ នឹងត្រូវលើកទៅពិភាក្សា នៅក្នុងសភានាឆ្នាំ២០១៤ ខាងមុខនេះ ដោយរួមមានការបង្កើន នូវកម្រិតផាកពិន័យ និងទោសទណ្ឌ រហូតដល់ទៅ ៥ដង ចំពោះបទល្មើសនៃការបើកបរ ក្រោមឥទ្ធិពលគ្រឿងស្រវឹង។ នៅពេលដែលច្បាប់នេះ ត្រូវបានអនុម័តដាក់ឲ្យប្រើប្រាស់នោះ វានឹងជាឧបករណ៍ដ៏មានសារៈសំខាន់ សំរាប់នគរបាលចរាចរណ៍ ធ្វើការរឹតបន្តឹងច្បាប់ដើម្បីទប់ស្កាត់ នូវការបើកបរក្រោម ឥទ្ធិពលគ្រឿងស្រវឹង។
នៅក្នុងប្រទេសកម្ពុជា គម្រោងមូលនិធិប្ល៊ូមបឺគភីលែនត្រូភី បានចាប់ផ្តើមដំណើរការ នៅក្នុងឆ្នាំ២០១០ ដោយផ្តោតលើ កត្តាហានិភ័យចំនួនពីរដែលចូលរួមចំណែក ក្នុងការល្មើសច្បាប់ធ្ងន់ធ្ងរ និងបង្ករឲ្យមានគ្រោះថ្នាក់ចរាចរណ៍ គឺការបើកបរក្រោមឥទ្ធិពលគ្រឿងស្រវឹង និងការមិនពាក់មួកសុវត្ថិភាព ចំពោះអ្នកបើកបរម៉ូតូ និងអ្នករួមដំណើរជាមួយ។ គំរោងនេះត្រូវបានដឹកនាំ និងសម្របសម្រួល ដោយគណៈកម្មាធិការជាតិសុវត្ថិភាព ចរាចរណ៍ផ្លូវគោក ដោយមានកិច្ចសហប្រតិបត្តិការជាមួយ ក្រសួងស្ថាប័នពាក់ព័ន្ធ និងការផ្តល់ជំនួយបច្ចេកទេស ពីដៃគូអន្តរជាតិរួមមាន អង្គការសុខភាពពិភពលោក អង្គការភាពជាដៃគូសុវត្ថិភាព ចរាចរណ៍ផ្លូវគោកសកល ហើយនិង សកលវិទ្យាល័យចនហុបគីន។
យោងតាមរបាយការណ៍ ស្ថានភាពសកលនៃសុវត្ថិភាពចរាចរណ៍ឆ្នាំ ២០១៣ របស់អង្គការសុខភាពពិភពលោកបានឲ្យដឹងថា ក្នុងមួយឆ្នាំមានប្រជាជនប្រមាណជិត ១,២៤ លាននាក់ បានបាត់បង់ជីវិត ដោយសារតែគ្រោះថ្នាក់ចរាចរណ៍ ហើយជាង ៩០% នៃការស្លាប់ដោយសារ គ្រោះថ្នាក់ចរាចរណ៍កើតឡើងនៅក្នុង ប្រទេសមានចំណូលទាប និងមធ្យម។ គ្រោះថ្នាក់ចរាចរណ៍គឺជា មូលហេតុចំបងនៃការស្លាប់ចំពោះមនុស្សវ័យក្មេង និងពេញវ័យអាយុ ១៥-២៩ ឆ្នាំ។ ការបើកបរក្រោម ឥទ្ធិពលគ្រឿងស្រវឹង គឺជាកត្តាបង្កចំបងមួយ ដែលបង្កើននូវហានិភ័យ ក្នុងការធ្វើឲ្យមានគ្រោះថ្នាក់ចរាចរណ៍។ នៅក្នុងប្រទេសមានចំណូលទាប និងមធ្យមមួយចំនួន ៥០% នៃគ្រោះថ្នាក់ចរាចរណ៍ គឺបណ្តាលមកពីការបើកបរ ក្រោមឥទ្ធិពលគ្រឿងស្រវឹង៕
Source from: watphnom-news.com
Post a Comment