ខេត្តបាត់ដំបង៖អគ្គិភ័យបានឆាបឆេះផ្ទះធ្វើពីឈើប្រក់ស័ង្កសីមួយខ្នងរបស់ស្ត្រីមេម៉ាយម្នាក់និងឆេះកូនប្រុសអាយុ២០ឆ្នាំដែលមានរោគសរសៃប្រសាទ ខេត្តបាត់ដំបង ៖ អគ្គិភ័យបានឆាបឆេះផ្ទះ ធ្វើពីឈើប្រក់ស័ង្កសីមួយខ្នង របស់ស្ត្រីមេម៉ាយម្នាក់ និងឆេះកូនប្រុសអាយុ ២០ ឆ្នាំដែលមានរោគសរសៃប្រសាទ ស្លាប់យ៉ាងអាណោចអាធ័ម កាលពីវេលាម៉ោង ៤ទៀបភ្លឺថ្ងៃទី១៨ ខែតុលាឆ្នាំ២០១៣ ស្ថិតនៅភូមិសួសអី ឃុំពាមឯក ស្រុកឯកភ្នំ ដោយគ្មាននរណាម្នាក់ ដឹងមូលហេតុនោះឡើយ ។
អធិការរងស្រុកឯកភ្នំលោក ចង់ សោភ័ណ្ឌ បានឱ្យដឹងថា ផ្ទះដែលឆេះសម្លាប់ បុរសរងគ្រោះមានទំហំ ៤គុណ៥ ម៉ែត្រ សង់ពីឈើប្រក់ស័ង្កសី បាំងជញ្ជាំងស្លឹកដូង។ នៅក្នុងផ្ទះជនរងគ្រោះ មិនមានសម្ភារមានតម្លៃប៉ុន្មានទេ គឺមានតែគ្រែមួយ សម្លៀកបំពាក់បន្ដិចបន្ដួចប៉ុណ្ណោះ ។ ផ្ទះជនរងគ្រោះមានតែមនុស្ស ២ នាក់ប៉ុណ្ណោះរស់នៅ គឺម្ដាយចាស់ជរាឈ្មោះ ហែម ឈុនលន់ អាយុ ៥៥ ឆ្នាំ និងកូនប្រុសដែលបាត់បង់ជីវិត ក្នុងភ្នក់ភ្លើងឈ្មោះ ហែម សុភ័ក្ដ្រ អាយុ ២១ ឆ្នាំ និងជាមនុស្ស មានជំងឺសរសៃប្រសាទ។
មុនកើតហេតុម្ដាយជនរងគ្រោះ ព្រោះតែមានជំងឺបានទៅស្នាក់នៅ ជាមួយបងប្អូនអ្នកជិតខាង នៅសល់តែឈ្មោះ ហែម សុភ័ក្ដ្រ ដេកនៅក្នុងផ្ទះតែម្នាក់ឯង។ នៅម៉ោង ៤ទៀបភ្លឺថ្ងៃទី១៨ ខែតុលា អ្នកភូមិបានឃើញអណ្ដាតភ្លើង ឆេះផ្ទះជនរងគ្រោះ យ៉ាងសន្ធោសន្ធៅនៅលើដំបូលផ្ទះ យ៉ាងពេញបន្ទុកទើបមិនអាចពន្លត់ និងជួយជនរងគ្រោះបាន ។ អគ្គិភ័យនេះអាចបណ្ដាល មកពីទុស្សេខ្សែភ្លើង ព្រោះនៅផ្ទះជនរងគ្រោះ មានតខ្សែភ្លើងរញ៉េរញ៉ៃ ដែលអាចផ្ទុះប៉ះជញ្ជាំងស្លឹកដូង ៕
Source from: watphnom-news.com
Loading...
Post a Comment