គណបក្សកាន់អំណាច​ប្រដៅ​គណបក្សប្រឆាំង​ឲ្យ​មានការ​ឯកភាព​ផ្ទៃក្នុង​ជា​មុន​សិន​សឹម​ចរចា​ជាមួយ​គណបក្សកាន់អំណាច​នៅ​ថ្ងៃក្រោយ

10/16/2013 01:56:00 PM

កាលពីថ្ងៃទី១២ខែតុលាឆ្នាំ២០១៣ម្សិលមិញនេះឯកឧត្តមឧត្តមសេនីយ៍ឯកខៀវសុភ័គ

កាលពីថ្ងៃទី១២ ខែតុលា ឆ្នាំ២០១៣ម្សិលមិញនេះ ឯកឧត្តម ឧត្តមសេនីយ៍ឯក ខៀវ សុភ័គ នាយកខុទ្ទកាល័យឯកឧត្តម ស ខេង សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា បានចេញសេចក្តីប្រកាសព័ត៌មានមួយក្នុងន័យប្រដៅថ្នាក់ដឹកនាំគណបក្សសង្គ្រោះជាតិ ឲ្យធ្វើការពិភាក្សាឯកភាពគ្នាក្នុងផ្ទៃក្នុងរបស់គណបក្សខ្លួនជាមុនសិន មុននឹងទំនាក់ទំនងផ្លាស់ប្តូរយោបល់ជាមួយឯកឧត្តម ស ខេង សំដៅជំរុញដល់ដំណើរការចរចានាពេលអនាគត ឲ្យមានភាពប្រាកដប្រជាសម្រេចបានលទ្ធផលជាផ្លែផ្កាល្អប្រសើរជូនជាតិ និងមាតុភូមិកម្ពុជាយើង ។

សេចក្តីប្រកាសព័ត៌មានរបស់ខុទ្ទកាល័យឯកឧត្តម ស ខេង បានឲ្យដឹងថា កាលពីរសៀលថ្ងៃទី០៦ ខែតុលា ឆ្នាំ២០១៣ មុននឹងចូលរួមកម្មវិធីដែលហៅថា "សមាជប្រជាជន" ឯកឧត្តម សម រង្ស៊ី ប្រធានគណបក្សសង្គ្រោះជាតិ បានទូរស័ព្ទទាក់ទងជាមួយឯកឧត្តម ស ខេង និងបានបញ្ជាក់ថា គណបក្សសង្គ្រោះជាតិឈប់ទាមទារតំណែងប្រធានរដ្ឋសភា ប៉ុន្តែចង់ឲ្យមានការបែងចែកតំណែងសមាជិកគណៈកម្មាធិការអចិន្ត្រៃយ៍ទាំង១២នៅក្នុងរដ្ឋសភាស្មើគ្នា ។ សំណើថ្មីនេះ គណបក្សប្រជាជនកម្ពុជានៅតែមិនយល់ព្រមចំពោះសំណើនេះឡើយ ព្រោះថា គណៈកម្មាការអចិន្ត្រៃយ៍រដ្ឋសភាជាអ្នកដាក់របៀបវារៈសម្រាប់កិច្ចប្រជុំរដ្ឋសភា ហើយរដ្ឋសភាអាចប្រជុំបានទាល់តែមានសំឡេងគាំទ្រ៥០%បូក១ គឺ៧សំឡេងទល់នឹង៥សំឡេង ដូច្នេះ ការទាមទារចំនួនសមាជិកគណៈកម្មាធិការអចិន្ត្រៃយ៍នៃរដ្ឋសភា៦រូបស្មើគ្នា គឺជាការធ្វើឲ្យជាប់គាំងទាំងដំណើរការរដ្ឋសភា ទាំងរាជរដ្ឋាភិបាល ។ ផ្ទុយពីនេះ ឯកឧត្តម កឹម សុខា និងឯកឧត្តម យឹម សុវណ្ណ បានបញ្ជាក់ថា គណបក្សសង្គ្រោះជាតិនៅតែរក្សាជំហរទាមទារតំណែងប្រធានរដ្ឋសភាដដែល ។

ខ្លឹមសារនៃសេចក្តីប្រកាសព័ត៌មានរបស់ខុទ្ទកាល័យឯកឧត្តម ស ខេង ក៏បានជម្រាបជូនដល់ថ្នាក់ដឹកនាំគណបក្សសង្គ្រោះជាតិ និងជនរួមជាតិថា ឯកឧត្តម ស ខេង សមាជិកគណៈអចិន្ត្រៃយ៍នៃគណៈកម្មាធិការកណ្តាល ត្រូវបានថ្នាក់ដឹកនាំកំពូលគណបក្សប្រជាជនកម្ពុជាប្រគល់ភារកិច្ចឲ្យធ្វើការទំនាក់ទំនងជាមួយគណបក្សសង្គ្រោះជាតិ ជាពិសេសឯកឧត្តម សម រង្ស៊ី ។ ហេតុនេះ ការលើកឡើងខុសៗគ្នានូវមតិរបស់ថ្នាក់ដឹកនាំគណបក្សសង្គ្រោះជាតិ ស្តែងឲ្យឃើញនូវការខ្វែងគំនិតគ្នា និងមិនទទួលខុសត្រូវចំពោះឆន្ទៈប្រជាពលរដ្ឋជាម្ចាស់ឆ្នោត ។ ជាងនេះទៀត ការយកបញ្ហាជាតិមកធ្វើដូច្នេះ តាមរយៈការបញ្ចេញជំហរខុសគ្នារបស់ថ្នាក់ដឹកនាំគណបក្សសង្គ្រោះជាតិ បានធ្វើឲ្យជះឥទ្ធិពលមិនល្អដល់ដំណើរការចរចារវាងគណបក្សទាំងពីរ ។

ឯកឧត្តម យ៉ែម បុញ្ញឫទ្ធិ អ្នកតំណាងរាស្ត្រជាប់ឆ្នោតនៅមណ្ឌលខេត្តព្រៃវែង និងជាអ្នកនាំពាក្យរបស់គណបក្សសង្គ្រោះជាតិ បានមានប្រសាសន៍ប្រាប់បណ្តាញព័ត៌មានក្នុងស្រុក នៅថ្ងៃទី១៣ ខែតុលា ឆ្នាំ២០១៣នេះថា មេដឹកនាំគណបក្សសង្គ្រោះជាតិ និងសមាជិកគណបក្សមិនមានការខ្វែងគំនិតគ្នាជុំវិញគោលជំហររបស់ខ្លួននោះទេ និងមានឯកភាពផ្ទៃក្នុងរឹងមាំបំផុត គឺមានតែគណបក្សប្រជាជនកម្ពុជាទេដែលត្រូវឯកភាពគ្នានោះ ។

មជ្ឈដ្ឋានអ្នកតាមដានព្រឹត្តិការណ៍នយោបាយនៅកម្ពុជា បានលើកឡើងថា គណបក្សប្រជាជនកម្ពុជាតែងចូលចិត្តបង្កើត និងប្រើប្រាស់នូវវប្បធម៌មួយដ៏ពេញនិយមរបស់ខ្លួន គឺលូកលាន់ ជ្រៀតជ្រែកចូលផ្ទៃក្នុងគណបក្សនយោបាយដទៃ ដើម្បីឲ្យគណបក្សនយោបាយទាំងនោះមានការបែកបាក់គ្នា ហើយគណបក្សប្រជាជនកម្ពុជាជាអ្នករង់ចាំកើបផលចំណេញ ៕