ក្រុម​​បង្ក្រាប​​បទ​ល្មើស​​លើ​​ផ្ទៃ​សមុទ្រ​​របស់​លោក តេង សួន ​យក​បទ​បញ្ជា​របស់​ថ្នាក់​លើ​ ទៅ​ប្រ​មូល​លុយ​​ពី​បទ​​​ល្មើស​​គ្រប់​​ប្រ​ភេទ

10/15/2013 06:00:00 PM

រាជធានីភ្នំពេញ៖ចាប់តាំងពីលោកតេងសួនបានឡើងជំនួសតំណែងលោកជុំសាវុធ

រាជធានីភ្នំពេញ ៖ ចាប់តាំងពីលោក តេង សួន បានឡើងជំនួសតំណែងលោក ជុំ សាវុធ ក្នុងនាមជាប្រធានគណៈកម្មការស្រាល បង្ក្រាបបទល្មើសលើផ្ទៃសមុទ្រ ចំណុះឲ្យអគ្គស្នងការនគរបាលជាតិ គេសង្កេតឃើញលោក តេង សួន អត់ដែលបានបង្ហាញស្នាដៃអ្វីទេ គឺសម្ងំយ៉ាងសុខស្រួល ក្នុងការប្រមូលលុយពីបទល្មើសនេសាទ ការដឹកជញ្ជូនឈើគ្រញូងនិងការនាំចូលទំនិញគេចពន្ធ និងទំនិញខុសច្បាប់ ដែលក្រុមឈ្មួញ ដឹកជញ្ជូនឆ្លងកាត់ផ្ទៃសមុទ្រខ្មែរ។ ដូច្នេះហើយបានជា មន្ត្រីតូចតាចមួយចំនួន បានសំណូមពរឲ្យ អគ្គស្នងការនគរបាលជាតិ ប្រកាសរំសាយក្រុមបង្ក្រាប បទល្មើសលើផ្ទៃសមុទ្រ ចាប់ពីពេលនេះតទៅ ដើម្បីសន្សំសំចៃថវិកាជាតិ។

មន្ត្រីតូចតាចមួយចំនួនបានអះអាងថា កាលពីជំនាន់លោក ជុំ សាវុធ គេសង្កេតឃើញនគរបាលបង្ក្រាបបទល្មើសលើផ្ទៃសមុទ្រ បានធ្វើសកម្មភាពបង្ក្រាប ក្រុមឈ្មួញដែលរកស៊ី ដឹកជញ្ជូនទំនិញគេចពន្ធម្តងម្កាលផងដែរ ប៉ុន្តែក្រោមការគ្រប់គ្រងរបស់លោក តេង សួន បែរជាស្ងាត់ដូចចោរលួចសេះ។ មិនមែនមានន័យថាជំនាន់លោក តេង សួន គ្មានបទល្មើសឆ្លងកាត់ផ្ទៃសមុទ្រនោះទេ ប៉ុន្តែលោក តេង សួន និងមន្ត្រីជំនិតៗរបស់គាត់ មានជំនាញស៊ីលុយពីក្រុមឈ្មួញស្ងាត់ៗ មិនខ្វល់ខ្វាយពីការបង្ក្រាប បទល្មើសលើផ្ទៃសមុទ្រនោះទេ ព្រោះក្នុងមួយខែៗ នគរបាលបង្ក្រាបបទល្មើស លើផ្ទៃសមុទ្រអាចប្រមូល លុយបានច្រើនសន្ធឹក យកបាវច្រកគ្មានទេ។

នៅលើផ្ទៃសមុទ្ររបស់កម្ពុជា ចាប់ពីខេត្តកំពត កោះកុង និងខេត្តព្រះសីហនុ គឺមានបទល្មើសគ្រប់ប្រភេទដូចជា ទូកដឹកជញ្ជូនឈើគ្រញូង ចេញពីខេត្តកោះកុងយ៉ាងគគ្រឹកគគ្រេង នាំយកទៅលក់នៅស្រុកយួន ប្រព្រឹត្តដោយឈ្មួញធំៗ២នាក់ គឺឈ្មោះ ពៅ និងឈ្មោះ ហេង។ ដោយឡែក មានទូកដឹកជញ្ជូនប្រេងសាំងគេចពន្ធ រួមទាំងប្រេងម៉ាស៊ូត មកពីស្រុកសៀម និងស្រុកយួន ចូលខេត្តកោះកុង ខេត្តកំពត និងខេត្តព្រះសីហនុ មួយថ្ងៃៗរាប់ម៉ឺនលីត្រ ត្រូវជារាប់សិបតោន គេមិនដែលឃើញក្រុមបង្ក្រាប បទល្មើសលើផ្ទៃសមុទ្រ របស់លោក តេង សួន យកចិត្តទុកដាក់គិតគូរ បង្ការបង្ក្រាបទប់ស្កាត់បទល្មើសទាំងនេះទេ។

សូម្បីតែទូកដឹកជញ្ជូនទំនិញគេចពន្ធ និងទំនិញខុសច្បាប់ មកពីស្រុកយួននិងស្រុកសៀម របស់ក្រុមឈ្មួញទាំងធំទាំងតូច ជាពិសេសទូកដឹកទំនិញ មកពីចំណុចខ្លងស៊ុន នៃស្រុកសៀម មកលើកដាក់ទំនិញនៅចំណុច ផែស្រែអំបិល ផែកែវផុស សុទ្ធតែមានទំនាក់ទំនង បង់លុយឲ្យលោក តេង សួន ជាប់ជាប្រចាំ។ ទូកនេសាទ របស់សៀម យួន ដែលចូលមកធ្វើសកម្មភាព ដោយខុសច្បាប់ក្នុងដែនសមុទ្រខ្មែរ ក្នុងមួយថ្ងៃៗរាប់រយទូក ហើយទូកនេសាទទាំងនោះ បានប្រើប្រាស់ឧបករណ៍ នេសាទល្មើសច្បាប់ដូចជា ទូកអូសគូ ទូកប្រើភ្លើងហ្វា ប្រើអួនក្រឡាញឹក ឬអួនឆក់ បំផ្លិចបំផ្លាញធនធានមច្ឆជាតិខ្មែរ ក្នុងដែនសមុទ្រ ក៏មិនដែលមានការបង្ក្រាប។

ត្រង់ចំណុចនេះ ច្បាស់ណាស់ដែលថា បញ្ហាផលប្រយោជន៍ បានធ្វើឲ្យក្រុមបង្ក្រាប បទល្មើសលើផ្ទៃសមុទ្ររបស់លោក តេង សួន មិនដែលហ៊ានហើបមាត់ ពីបទល្មើសនេសាទ របស់ទូកសៀម និងយួន ប៉ុន្តែគេឃើញកម្លាំងរបស់លោក តេង សួន បានបើកម៉ារីន បើកអូប័រ ទៅសំចតកណ្តាលសមុទ្រ ធ្វើជាទីតាំងសម្រាប់ឲ្យក្រុមឈ្មួញ ចូលបង់លុយយ៉ាងអនាធិបតេយ្យបំផុត។ ដូចដែលប្រជាពលរដ្ឋមួយចំនួនបានលើកឡើងថា ក្នុងប្រទេសកម្ពុជា មានប៉ុស្តិ៍ជជុះទាំងលើគោក ទាំងក្នុងទឹក រហូតដល់ដែនសមុទ្រ ហើយក្រុមបង្ក្រាបបទល្មើសជើងទឹក របស់លោក តេង សួន ក៏បានធ្វើសកម្មភាពប្រដេញ ចាប់ទូកនេសាទខ្មែរតូចៗដើម្បីយកលុយ ដោយគ្មានការយោគយល់អ្វីឡើយ។

សម្រាប់ទូករបស់ សៀមនិងយួន ដែលបានចូលមកនេសាទ ដោយប្រើប្រាស់ឧបករណ៍ នេសាទល្មើសច្បាប់ក្នុងដែនសមុទ្រខ្មែរ យ៉ាងអនាធិបតេយ្យនោះ ត្រូវបានមន្ត្រីតូចតាចមួយចំនួន បង្ហើបឲ្យដឹងថា ទូកនេសាទ របស់សៀម យួន មួយគូៗត្រូវបង់លុយឲ្យមន្ត្រី របស់លោក តេង សួន មិនតិចជាង១០ម៉ឺនបាតនោះទេ ក្នុងមួយខែៗទើបគ្មានការបង្ក្រាប។ បើរួមបញ្ចូលទាំងទូក និងសាឡង់ ដែលដឹកជញ្ជូនឈើគ្រញូងយកទៅលក់នៅស្រុកយួន របស់ឈ្មួញធំៗមួយចំនួន ក៏បានបង់លុយឲ្យក្រុមបង្ក្រាបបទល្មើសលើផ្ទៃសមុទ្រមិនតិចដែរ ទើបអ្វីៗអាចដំណើរការដោយរលូនល្អ ហើយគេដឹងថាសាឡង់ ដឹកឈើគ្រញូងនីមួយៗ ធ្លាប់បង់លុយឲ្យក្រុមបង្ក្រាបបទល្មើស លើផ្ទៃសមុទ្រខ្ទង់រាប់ម៉ឺនដុល្លារឯណោះ៕