រាជធានីភ្នំពេញ៖ស្ត្រី២នាក់ម្តាយនិងកូនបានស្លាប់ភ្លាមៗយ៉ាងអាណោចអាធ័មហើយក្មេងប្រុសចំនួន២ រាជធានីភ្នំពេញ ៖ ស្ត្រី ២ នាក់ម្តាយនិងកូនបានស្លាប់ភ្លាមៗ យ៉ាងអាណោចអាធ័ម ហើយក្មេងប្រុសចំនួន ២ នាក់ផ្សេងទៀតបានរងរបួស ដោយសាររថយន្តធុនធំដឹកទ្រុងមាន់ ចុះពីលើស្ពានព្រះមុនីវង្សថ្មី ជ្រុលទៅបុកម៉ូតូរបស់ជនរងគ្រោះ ពីក្រោយមួយទំហឹង ហើយជ្រុលទៅបុក គូទរថយន្តធុនដ្រា មួយគ្រឿង របស់មន្ត្រីនគរបាលម្នាក់ រងការខូចខាតផងដែរ នៅគល់ស្ពានព្រះ មុនីវង្សថ្មីខាងកើតស្ថិត ក្នុងសង្កាត់ច្បារអំពៅទី១ ខណ្ឌមានជ័យ កាលពីវេលាម៉ោង ១១និង៥០ នាទីថ្ងៃទី១៧ ខែវិច្ឆិកា ឆ្នាំ២០១៣។
ជនរងគ្រោះជាម្តាយមានឈ្មោះ មោង ម៉ាច អាយុ ៥៦ឆ្នាំ និងកូនស្រីមានឈ្មោះ នួន ណាវី អាយុ ៣០ឆ្នាំ បានស្លាប់ភ្លាមៗ នៅនឹងកន្លែងកើតហេតុ ខណៈដែលក្មេងប្រុស ២នាក់ ដែលត្រូវជាចៅ និងកូនប្រុសឈ្មោះ មករា អាយុ ៤ ឆ្នាំ និងឈ្មោះ វិសាល អាយុ ៣ឆ្នាំ បានរងរបួសស្រាល ។ ជនរងគ្រោះទាំង៤ នាក់នេះ រស់នៅភូមិព្រែកជាងគង់ សង្កាត់វាលស្បូវ ខណ្ឌមានជ័យ។
តាមប្រភពព័ត៌មាន នៅកន្លែងកើតហេតុ បានឲ្យដឹងថា រថយន្តបង្កម៉ាកហ៊ីយ៉ាន់ដាយ ដឹកទ្រុងមាន់ ពាក់ស្លាកលេខ ភ្នំពេញ 3B-8944 បើកដោយបុរសម្នាក់ បានបើកបរ ក្នុងទិសដៅឡើង ស្ពានព្រះមុនីវង្សថ្មី ពីលិចទៅកើត ហើយនៅពេលចុះពីស្ពាន ស្រាប់តែរថយន្តនោះ ជ្រុលទៅបុកម៉ូតូម៉ាក សេ១២៥ ពណ៌ខ្មៅរបស់ជនរងគ្រោះ ទាំងកំរោលតែម្តង មិនដឹងថា មកពីមូលហេតុអ្វីនោះទេ បណ្តាលឲ្យមានមនុស្សស្លាប់ និងរបួសជាច្រើននាក់ ។
រថយន្តបង្កដែលមិនទាន់អស់ល្បឿន បានជ្រុលទៅបុកគូទ រថយន្តធុនដ្រា មួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2M-8858 បើកដោយបុរសម្នាក់ មានឈ្មោះ សេង បូរី អាយុ ៣៥ឆ្នាំ ជាមន្ត្រីនគរបាល រស់នៅផ្ទះលេខ ២០០ ផ្លូវលេខ១៥០ សង្កាត់ទឹកល្អក់ទី២ ខណ្ឌទួលគោក។ អ្នកបើករថយន្តបង្កឈ្មោះ អោក ដារ៉ា អាយុ៣៤ឆ្នាំ ស្នាក់នៅផ្ទះលេខ១០៩ ផ្លូវលេខ ៣០៤ សង្កាត់ទួលស្វាយព្រៃ២ ខណ្ឌចំការមន ត្រូវបានសមត្ថកិច្ចឃាត់ខ្លួន៕
Source from: watphnom-news.com
Loading...
Post a Comment