ឧត្តមសេនីយ៍​ ជួន​ សុវណ្ណ​ និង​ឧត្តមសេនីយ៍​ រ័​ត្ន​ ស្រ៊ា​ង​ ក្លាយជា​មុខសញ្ញា​គេ​រិះគន់​ខ្លាំង​ក្នុង​បណ្តាញ​សង្គម​

11/16/2013 05:00:00 AM

ក្រោយកើតមានព្រឹត្តិការណ៍អំពើហិង្សាដ៏សាហាវដែលសមត្ថកិច្ចនគរបាល និងកងរាជអាវុធហត្ថបង្ក្រាបទៅលើក្រុមបាតុករដែលជាកម្មកររោងចក្រ SL កាលពីថ្ងៃទី១២ ខែវិច្ឆិកា ឆ្នាំ២០១៣ នៅមុខវត្តស្ទឹងមានជ័យ បណ្តាលឲ្យប្រជាពលរដ្ឋម្នាក់ស្លាប់ របួសធ្ងន់ស្រាល៩នាក់ និងរបួសសមត្ថកិច្ចចំនួន៤៧នាក់ ព្រមទាំងខូចខាតរថយន្ត ម៉ូតូសមត្ថកិច្ចរួចមកនោះ លោកឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ បានក្លាយជាមុខសញ្ញាដែលគេរិះគន់យ៉ាងខ្លាំងនៅក្នុងបណ្តាញសង្គម Facebook ដ៏ពេញនិយមនៅកម្ពុជា ។

មិនត្រឹមតែឧត្តមសេនីយ៍ ជួន សុវណ្ណ និងឧត្តមសេនីយ៍ រ័ត្ន ស្រ៊ាង ប៉ុណ្ណោះទេ ដែលអ្នកលេង Facebook ធ្វើការរិះគន់យ៉ាងចាស់ដៃនោះ គឺរលកនៃការរិះគន់នេះបានរុញច្រានធ្លាក់បន្តទៅលើសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាយ៉ាងធ្ងន់ធ្ងរថែមទៀត ដោយអ្នករិះគន់បានលើកឡើងថា នាយករដ្ឋមន្ត្រីអសមត្ថភាពក្នុងការដោះស្រាយរឿងរ៉ាវវិវាទការងារត្រឹមរោងចក្រមួយ ធ្វើឲ្យរឿងតូចក្លាយទៅជារឿងធំ ពីរឿងជជែកពិភាក្សាគ្នាបាន ទៅជារឿងបង្ក្រាបពោរពេញដោយហិង្សាវាយដំ និងបាញ់បោះឲ្យឈាមខ្មែរហូរ ។

កាលពីថ្ងៃទី១៥ ខែវិច្ឆិកា ឆ្នាំ២០១៣ម្សិលមិញនេះ ម្ចាស់Pageមួយឈ្មោះ ផែ សុវណ្ណារិទ្ធ បាន Post រូបភាពរបស់ខ្លួនដុតរូបថតលោកឧត្តមសេនីយ៍ ជួន សុវណ្ណ ដើម្បីបញ្ចេញកំហឹង និងបានធ្វើការរិះគន់ទៅលើ"សម្តេចតេជោ ហ៊ុន សែន " ទៀតផង តែម្ចាស់ Page ដែលដង្ហែគាំទ្រគណបក្សប្រជាជនកម្ពុជារូបនេះ មិនហ៊ានដុតរូបថតបុរសខ្លាំងទេ ។

មជ្ឈដ្ឋានអ្នកច្បាប់ឯករាជ្យនៅកម្ពុជា បានលើកឡើងថា ការដោះស្រាយ ការទប់ស្កាត់ និងការបង្ក្រាបបាតុកម្មរបស់កម្មកររោងចក្រ SL គឺឯកឧត្តម អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ និងជាប្រធានគណៈកម្មការដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា "គ.ក.ប" ឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេស និងឯកឧត្តមនាយឧត្តមសេនីយ៍ នេត សាវឿន អគ្គស្នងការនគរបាលជាតិ ជាអនុប្រធាន គ.ក.ប ទើបជាអ្នកទទួលខុសត្រូវខ្ពស់ រីឯសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាជាអ្នកទទួលខុសត្រូវខ្ពស់បំផុត ។ ដោយឡែក លោកឧត្តមសេនីយ៍ ជួន សុវណ្ណ និងលោកឧត្តមសេនីយ៍ រ័ត្ន ស្រ៊ាង គ្រាន់តែជាអ្នកអនុវត្តន៍ផ្ទាល់តាមការបញ្ជាពីប្រធាន និងអនុប្រធានរបស់ គ.ក.ប ប៉ុណ្ណោះ ក្នុងការបង្ក្រាបបាតុកម្មរបស់កម្មកររោងចក្រ SL កន្លងមក ៕