ក្រោយ​មាន​ឧបទ្ទវហេតុ​មនុស្ស​ជិត​៤០០​នាក់​ស្លាប់​នៅ​កោះ​ពេជ្រ​នា​ឆ្នាំ​២០១០​ បុណ្យអុំទូក​មុខ​វាំង​ត្រូវ​បាន​ផ្អាក​អស់​៣​ឆ្នាំ​ជាប់ៗ​គ្នា​

11/16/2013 05:00:00 AM

ថ្ងៃទី១៦-១៧-១៨ ខែវិច្ឆិកា ឆ្នាំ២០១៣នេះ គឺជាព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលតែងតែបានធ្វើនៅតាមដងទន្លេសាបមុខព្រះបរមរាជវាំង រាជធានីភ្នំពេញ ប៉ុន្តែព្រះរាជពិធីបុណ្យអុំទូកឆ្នាំ២០១៣ នៅរាជធានីភ្នំពេញ ត្រូវបានរាជរដ្ឋាភិបាលផ្អាកការប្រារព្ធតាមសារាចរលេខ០៥សរ ចុះថ្ងៃទី០៦ ខែតុលា ឆ្នាំ២០១៣ ដោយរាជរដ្ឋាភិបាលលើកហេតុផលសំអាងថាដោយសារមានគ្រោះទឹកជំនន់ ។

ជាការផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅរាជធានីភ្នំពេញចំនួន៣ឆ្នាំជាប់ៗគ្នាហើយ ចាប់តាំងពីឆ្នាំ២០១១ ដោយរាជរដ្ឋាភិបាលលើកហេតុផលថា មកពីគ្រោះទឹកជំនន់ និងនៅឆ្នាំ២០១២រាជរដ្ឋាភិបាលលើកហេតុផលថា មកពីរៀបចំព្រះរាជពិធីបុណ្យព្រះបរមសពព្រះបរមរតនកោដ្ឋ នរោត្តម សីហនុ ។

ទោះបីរាជរដ្ឋាភិបាលបានលើកនូវហេតុផលទាក់ទងនឹងការផ្អាកការប្រារព្ធពិធីបុណ្យអុំទូក បណ្តែតប្រទីប សំពះព្រះខែ និងអកអំបុក នៅមុខព្រះបរមរាជវាំង រាជធានីភ្នំពេញ ចំនួន៣ឆ្នាំជាប់ៗគ្នារួចមកហើយក្តី ក៏ការផ្អាកប្រារព្ធព្រះរាជពិធីបុណ្យអុំទូកនេះបានកើតមានឡើងបន្ទាប់ពីមានឧបទ្ទវហេតុមនុស្សស្លាប់ចំនួន៣៥៣នាក់ និងរងរបួសជាង៤០០នាក់ កាលពីរាត្រីថ្ងៃទី២២ ខែវិច្ឆិកា ឆ្នាំ២០១០ ក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១០ នៅលើស្ពានពេជ្រនៃតំបន់កម្សាន្តកោះពេជ្រ ដោយរាជរដ្ឋាភិបាលបានអះអាងថា មកពីមនុស្សរត់ជាន់គ្នា ។

រាជរដ្ឋាភិបាលមិនមានការទទួលខុសត្រូវចំពោះមុខច្បាប់ណាមួយឡើយ ទាក់ទងនឹងហេតុការណ៍មនុស្សស្លាប់ជិត៤០០នាក់ និងរងរបួសជាង៤០០នាក់ ក្នុងកម្មវិធីសប្បាយនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ឆ្នាំ២០១០ នៅតំបន់កោះពេជ្រ រៀបចំដោយគណៈកម្មាធិការជាតិរៀបចំបុណ្យជាតិ និងអន្តរជាតិនោះឡើយ ។

មជ្ឈដ្ឋានប្រជាពលរដ្ឋបានសម្តែងនូវការព្រួយបារម្ភថា ព្រះរាជពិធីបុណ្យអុំទូកនៅមុខព្រះបរមរាជវាំងរាជធានីភ្នំពេញ អាចនឹងផ្អាកជារៀងរហូត ឬលុបចោលតែម្តង ប្រសិនបើសម្តេចអគ្គមហាសេនាបតីតេជោ ហ៊ុន សែន ប្រមុខរាជរដ្ឋាភិបាលមិនសប្បាយចិត្ត និងមិនចង់ឲ្យមានការប្រារព្ធព្រះរាជពិធីបុណ្យនេះ ៕