អគ្គនាយកសារព័ត៌មានភ្នំពេញប៉ុស្តិ៍ប្រចាំនៅកម្ពុជា គឺលោក Chris Dawe បានសម្តែងនូវការអបអរសាទរចំពោះគណបក្សប្រជាជនកម្ពុជាដែលជាប់ឆ្នោត ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ និងក៏បានអបអរសាទរចំពោះឯកឧត្តម ខៀវ កាញារីទ្ធ ដែលបានកាន់មុខតំណែងជារដ្ឋមន្ត្រីក្រសួងព័ត៌មានបន្តក្នុងអាណត្តិ ទី៥នេះផងដែរ ។
សេចក្តីថែ្លងអបអរសាទររបស់លោកអគ្គនាយកសារព័ត៌មានភ្នំពេញប៉ុស្តិ៍ នេះ គឺបានធ្វើឡើងក្នុងជំនួបពិភាក្សារវាងលោកអគ្គនាយកជាមួយឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន នៅទីស្តីការក្រសួងព័ត៌មានកាលពីថ្ងៃទី២៤ខែតុលាឆ្នាំ២០១៣កន្លងមក។
នេះ អាចនិយាយបានថា សារព័ត៌មានភ្នំពេញប៉ុស្តិ៍គឺជាសារព័ត៌មានទី១ដែលអះអាងថា ជាសារព័ត៌មានឯករាជ្យដែលបានសម្តែងនូវការអបអរសាទរទៅនឹងជ័យជម្នះ របស់គណបក្សប្រជាជនកម្ពុជា ក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ ។
សូមរំលឹកជូនដែរថា យោងតាមលទ្ធផលប្រកាសដោយគណៈកម្មាធិការជាតិរៀបចំការបោះឆ្នោត គឺគណបក្សប្រជាជនកម្ពុជាទទួលបានអាសនៈនៅក្នុងរដ្ឋសភានីតិកាលទី៥ ចំនួន៦៨អាសនៈ និងគណបក្សសង្គ្រោះជាតិទទួលបានចំនួន៥៥អាសនៈ ដែលបេក្ខជនតំណាងរាស្ត្រជាប់ឆ្នោតគណបក្សប្រជាជនកម្ពុជាទាំងចំនួន៦៨ រូបបានធ្វើសច្ចាប្រណិធានចូលកាន់មុខតំណែងជាប្រធាន អនុប្រធានរដ្ឋសភា ប្រធាន អនុប្រធានគណៈកម្មការរដ្ឋសភា និងសមាជិករដ្ឋសភាអស់ហើយ នៅឡើយតែតំណាងរាស្ត្រគណបក្សសង្គ្រោះជាតិចំនួន៥៥រូបប៉ុណ្ណោះដែលមិន ទាន់បានធ្វើសច្ចាប្រណិធានចូលកាន់មុខតំណែង ដោយសម្អាងតាំងពីដើមទីមកថា លទ្ធផលឆ្នោតមានភាពមិនប្រក្រតី និងទាមទារឲ្យមានការបង្កើតគណៈកម្មការចម្រុះឯករាជ្យស៊ើបអង្កេតអំពី ភាពមិនប្រក្រតីនៃការបោះឆ្នោតឡើងវិញ ៕
Source from: www.dtn7.com
Loading...
Post a Comment