បុរស២នាក់បានស្លាប់បាត់បង់ជីវិតភ្លាមៗនៅកន្លែងកើតហេតុនិងស្ត្រី២នាក់ទៀតបានរងរបួសធ្ងន់និងស្រាលបន្ទាប់ពីមានហេតុការណ៍បំផ្ទុះគ្រាប់បែក កើតចេញពីភ្លើងប្រចណ្ឌនឹងប្រពន្ធ កាលពីវេលាម៉ោង២២និង៣០នាទីយប់នាថ្ងៃទី២៥ ខែវិច្ឆិកា ឆ្នាំ២០១៣ ម្សិលមិញ ឋិតនៅភូមិគោកសំព័រ ឃុំលំទង ស្រុកអន្លង់វែង ខេត្តឧត្តរមានជ័យ ។
សមត្ថកិច្ចនគរបាលស្រុកអន្លង់វែងបានឲ្យដឹងថា ជនរងគ្រោះដែលស្លាប់បាត់បង់ជីវិតនៅក្នុងហេតុការណ៍បំផ្ទុះគ្រាប់បែកនោះ រួមមានឈ្មោះ ហៃ រឿម ភេទប្រុស អាយុ៣៤ឆ្នាំ មានប្រពន្ធឈ្មោះ ចាន់ ខេង អាយុ៣៣ឆ្នាំ មានកូនចំនួន៦នាក់ រាប់ទាំងកូននៅក្នុងផ្ទៃផង រងរបួសធ្ងន់និងឈ្មោះ ផួក ដា ភេទប្រុស អាយុ៤៥ឆ្នាំ មានប្រពន្ធឈ្មោះ ណយ ម៉ិញ អាយុ៤៤ឆ្នាំ រងរបួសស្រាល ។
សមត្ថកិច្ចនគរបាលបានឲ្យដឹងទៀតថា មុនពេលកើតហេតុជនរងគ្រោះដែលស្លាប់ឈ្មោះ ហៃ រឿម និងប្រពន្ធឈ្មោះចាន់ ខេង មានការឈ្លោះប្រកែកគ្នា រួចហើយប្រពន្ធបាននាំកូនតូចៗទៅដេកនៅផ្ទះឪពុកមា ជាហេតុធ្វើឲ្យបុរសជាប្តីកើតក្តីក្តៅក្រហាយគួបផ្សំនឹងការស្រវឹងស្រាខ្លះផង ក៏បានយកគ្រាប់បែកដៃដើរសំដៅទៅផ្ទះឪពុកមាតាមរករឿងប្រពន្ធរបស់ខ្លួនបន្តទៀត ។ ឃើញសភាពបែបនេះ ឪពុកមាក៏ចេញមកឃាត់នាំឲ្យកើតមានការប្រតាយប្រតប់គ្នា រហូតធ្វើឲ្យគ្រាប់បែកផ្ទុះក្ឌាំងឡើង បណ្តាលឲ្យជនរងគ្រោះនិងឪពុកមាស្លាប់ភ្លាមៗ នៅនឹងកន្លែងកើតហេតុតែម្តង ខណៈដែលប្រពន្ធរបស់ជនរងគ្រោះ ទាំង២នាក់ កំពុងឈរនៅក្បែរនោះទទួលរងរបួសធ្ងន់ ស្រាល ។
នគរបាលជំនាញបានបញ្ជាក់ឲ្យដឹងថា គ្រាប់បែកដែលជនរងគ្រោះយកទៅបោកនោះ គឺជាប្រភេទគ្រាប់បែកផលិតនៅប្រទេសចិន ហើយជនរងគ្រោះអតីតជាទាហានម្នាក់ដែរ ។
ប្រភពពីប្រជាពលរដ្ឋរស់នៅក្នុងស្រុកភូមិក្បែរលំនៅឋានជនរងគ្រោះបាននិយាយឲ្យដឹងថា មូលហេតុដែលជនរងគ្រោះទៅតាមរករឿងប្រពន្ធដលផ្ទះឪពុកមានោះ គឺមានបំណងទៅសម្លាប់កូនតូចៗចោល ព្រោះនៅមុនពេលស្លាប់ជនរងគ្រោះធ្លាប់បាននិយាយថា កូនតូចៗទាំងនោះ មិនមែនជាកូនរបស់ខ្លួនទេ ហើយជនរងគ្រោះបានសង្ស័យទៅលើប្រពន្ធខ្លួនថា ផិតក្បត់ជាមួយប្រុសផ្សេង ៕
Source from: www.dtn7.com
Loading...
Post a Comment