រាជការ​ផឹកស្រា​ស្រវឹង​បើកបរ​រថយន្ត​ទំនើប​បុក​រះ​ម៉ូតូ​២​គ្រឿង​បណ្តាល​ឲ្យ​ស្លាប់​ម្នាក់​យ៉ាង​អាណោចអាធ័ម និង​ជេរប្រមាថ​សមត្ថកិច្ច​ថែមទៀត​

11/26/2013 05:00:00 AM

ហេតុការណ៍គ្រោះថ្នាក់ចរាចរណ៍ដ៏រន្ធត់មួយបានកើតឡើងកាលពីរាត្រីថ្ងៃទី២៥ ខែវិច្ឆិកា ឆ្នាំ២០១៣ វេលាម៉ោង២២ និង៣០នាទីម្សិលមិញ នៅតាមបណ្តោយមហាវិថីសហព័ន្ធរុស្ស៊ី ភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ បង្កដោយរថយន្តទំនើបម៉ាកហាយឡែនឌ័រ មួយគ្រឿង បើកបរដោយបុរសជាមន្ត្រីរាជការផឹកស្រាស្រវឹងជោកជាំបុករះទៅលើទោចក្រយានយន្ត២គ្រឿង បណ្តាលឲ្យបុរសម្នាក់ស្លាប់ភ្លាមៗយ៉ាងអាណោចអាធ័មនៅនឹងកន្លែងកើតហេតុ។

សមត្ថកិច្ចនគរបាលបានឲ្យដឹងថា ជនរងគ្រោះដែលស្លាប់បាត់បង់ជីវិតក្នុងហេតុការណ៍គ្រោះថ្នាក់ចរាចរណ៍នោះ មានឈ្មោះ ឯម ម៉ៅ ភេទប្រុស អាយុ៣០ឆ្នាំ មុខរបរជាអ្នកបើកបររថយន្ត រស់នៅភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ បានជិះម៉ូតូមួយគ្រឿងម៉ាក Honda Dream C125 ពណ៌ខ្មៅស៊េរីឆ្នាំ២០០៥ ពាក់ស្លាកលេខភ្នំពេញ 1M-9210 និងជនរងគ្រោះម្នាក់ទៀតមានឈ្មោះ ចន្ទ រិទ្ធី ភេទប្រុសអាយុ៣៩ឆ្នាំ មុករបររត់ម៉ូតូឌុប ស្នាក់នៅភូមិសន្សំកុសល សង្កាត់បឹងទំពុន ខណ្ឌមានជ័យ រាជធានីភ្នំពេញ ជិះម៉ូតូម៉ាកវ៉េវ អាល់ហ្វា ពណ៌ខ្មៅពាក់ស្លាកលេខភ្នំពេញ 1AH-4569។ រីឯរថយន្តបង្កម៉ាកហាយឡែនឌ័រ ពណ៌ទឹកមាសគ្មានពាក់ស្លាកលេខ បើកបរដោយបុរសម្នាក់ឈ្មោះ លាង សុផល អាយុ៣១ឆ្នាំ មុខរបរជាមន្ត្រីរាជការ បម្រើការងារនៅក្រសួងការងារ និងបណ្តុះបណ្តាលវិជ្ជាជីវៈ។

ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ ជនរងគ្រោះដែលស្លាប់បាត់បង់ជីវិតនោះជិះម៉ូតូម្នាក់ឯងក្នុងទិសដៅពីលិចទៅកើត លុះមកដល់ចំណុចកើតហេតុមានរថយន្តមួយគ្រឿងម៉ាកហាយឡែនឌ័រ បើករេពេញផ្លូវក្នុងទិសដៅបញ្ច្រសផ្លូវគ្នាជ្រុលមកបុកម៉ូតូពេញទំហឹងបណ្តាលឲ្យអ្នកបើកបរម៉ូតូខ្ទាតចេញពីលើម៉ូតូជាច្រើនម៉ែត្រស្លាប់ភា្លមៗតែម្តង។ បន្ទាប់ពីបុកម៉ូតូ១គ្រឿងនេះរួចហើយ រថយន្តបង្កមិនព្រមឈប់ទេ ដោយព្យាយាមបើករត់គេចក៏ជ្រុលចង្កូតទៅបុកនឹងម៉ូតូមួយគ្រឿងទៀតជាប់ក្រោមរថយន្តអូសជាង៥០០ម៉ែត្រ តែសំណាងល្អម្ចាស់ម៉ូតូរងគ្រោះបានលោតផុតចេញពីម៉ូតូរបស់ខ្លួនទាន់ពេលវេលា។

អ្វីដែលធ្វើឲ្យមានការចាប់អារម្មណ៍និងភ្ញាក់ផ្អើលនោះគឺនៅត្រង់ថា ពេលសមត្ថកិច្ចនគរបាលឃាត់ខ្លួនជនបង្កជាមន្ត្រីរាជការ ដើម្បីសាកសួរនៅប៉ុស្តិ៍នគរបាលរដ្ឋបាលចោមចៅ ជនបង្កបានទះតុបញ្ចេញកាយវិការច្រងេងច្រងាង និងជេរប្រមាថទៅលើសមត្ថកិច្ចយ៉ាងចាស់ដៃ ក្រោមអំណាចនៃគ្រឿងស្រវឹងចូលខ្លួន។

បច្ចុប្បន្នវត្ថុតាងមានរថយន្ត មានទោចក្រយានយន្ត ព្រមទាំងជនបង្ក ត្រូវបានសមត្ថកិច្ចបញ្ជូនទៅការិយាល័យនគរបាលចរាចរណ៍ជើងគោករាជធានីភ្នំពេញ ចាត់ការបន្តតាមនីតិវិធីច្បាប់ រីឯសាកសពបុរសរងគ្រោះប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕

Source from: www.dtn7.com