តារាចម្រៀងល្បីពីរដួងក្នុងផលិតកម្មតែមួយគឺកញ្ញា ឱក សុគន្ធកញ្ញា និងកញ្ញា ពេជ្រ សោភា ត្រូវបានគេមើលឃើញថា មានភាពត្រដំត្រសងគ្នា ទាំងក្បាច់រាំ និងរូបសម្ផស្សទៀត។ តែចំណុចមួយដាច់ដោយឡែក គឺទឹកចិត្តសប្បុរស ដែលសិល្បករខ្មែរមួយចំនួន សុទ្ធតែមានវា។
យ៉ាងណា ដោយសារតែគេស្ថិតក្នុងទ្រនំតែមួយ និងសុទ្ធជាជើងខ្លាំងដូចគ្នា ដូច្នេះសូមក្រឡេកមើលពីចំណុចលេចធ្លោលើទឹកចិត្តសប្បុរសនេះ ក្នុងកិច្ចការសង្គម។
ឱក សុគន្ធកញ្ញា៖ តារារូបនេះ ត្រូវប្រភពអ្នកនៅក្នុងសិល្បៈបញ្ចេញឲ្យដឹងថា ជាតារាលេខ១នៅហង្សមាសផ្នែកនារី។ វិលមកទឹកចិត្តសប្បុរសធម៌ក្នុងកិច្ចការសង្គមវិញ សុគន្ធកញ្ញា ក៏មានសកម្មភាពច្រើនដែរ ក្នុងនោះ កញ្ញាបានចូលរួមជាមួយ “សមាគមក្ដីសង្ឃឹមជនក្រីក្រ” បំផុសឲ្យកុមារកំព្រា និងស្ត្រីទីទ័លក្រត្រូវមានសង្ឃឹម រួមទាំងការស្នើកុំឲ្យមានការរើសអើងចំពោះពួកគេផង។
ក្រៅពីនេះ ឱក សុគន្ធកញ្ញា គឺជាឯកអគ្គរាជទូតសុច្ឆន្ទៈ ចុងក្រោយនៃគម្រោងសាងសង់យុវជនឆ្នាំ២០១៣របស់ អង្គការលំនៅឋានមនុស្សជាតិ(Habitat) ទៀត។ ដោយប្រើប្រជាប្រិយភាពរបស់ខ្លួន សុគន្ធកញ្ញា មានតួនាទី ប្រមូលការគាំទ្រពីប្រជាពលរដ្ឋ ពិសេសយុវវ័យឲ្យចូលរាំគាំទ្រគម្រោងដើម្បីដោះស្រាយបញ្ហាខ្វះខាតលំនៅឋាន សម្រាប់ប្រជាពលរដ្ឋដែលគ្មានឱកាសរស់នៅបានសមរម្យ។
អត្ថបទ៖ ឱក សុគន្ធកញ្ញា បិទរូបម្ដាយលើទូរសព្ទ
មិនអស់នៅឡើយ ឱក សុគន្ធកញ្ញា ក៏ធ្លាប់បានស្នើឲ្យមានការចូលរួមលុបបំបាត់អំពើហិង្សានៅក្នុងគ្រួសារ និងបង្កើនក្ដីស្រលាញ់ជាជំនួសដែរ ពោលគឺនាង បានចូលរួមគាំទ្រកម្មវិធី “១០០កោដសំឡេងរបស់យុវជន” ដែលជាកម្មវិធីមានគោលបំណងទប់ស្កាត់អំពើហិង្សានៅក្នុងគ្រួសារ។
វិលមកកញ្ញា ពេជ្រ សោភា វិញ បើនិយាយពីការចូលរួមកិច្ចការសង្គមដោយប្រើប្រជាប្រិយភាពមិនសូវមានទេ បើធៀបនឹង ឱក សុគន្ធកញ្ញា គឺមានតែការច្រៀងអប់រំពីគ្រោះថ្នាក់ចរាចរណ៍ប៉ុណ្ណោះ ប៉ុន្តែសកម្មភាពចុះដោយផ្ទាល់គឺមានគួរឲ្យកត់សម្គាល់ ពិសេសសកម្មភាពចេញមុខរៃអង្គាសថវិកាជួយជនរងគ្រោះដោយទឹកជំនន់នារយៈចុងក្រោយនេះ។
ធ្លាប់មានអតីតកាលកម្សត់កម្រ ពេជ្រ សោភា បានបង្កើតមូលនិធិ “ខ្មែរជុំវិញពិភពលោក” ហើយប្រមូលថវិកាច្រើនពាន់ដុល្លារពីបងប្អូនខ្មែរនៅអាមេរិក យកមកជួយពលរដ្ឋខ្មែរក្នុងស្រុក ដែលរងគ្រោះដោយទឹកជំនន់ ក្នុងនោះគ្រាន់តែចុះពីលើយន្តហោះពីយប់ ព្រលឹមឡើង កញ្ញា ក៏បានដឹកនាំក្រុមការងារចុះទៅខេត្តកំពង់ចែកអំណោយសប្បុរសភ្លាមតែម្តង។
អត្ថបទ៖ ពេជ្រ សោភាមកដល់កម្ពុជាភ្លាម យកអំណោយទៅចែកជនរងគ្រោះទឹកជំនន់ភ្លែត
ក្រៅពីតារាល្បីទាំងពីរដួងនេះ ក៏មានតារាខ្មែរមួយចំនួនទៀត ក៏មានទឹកចិត្តសប្បុរសផ្ទាល់ខ្លួនដែរ មានដូចជាកញ្ញា មាស សុខសោភា និងកញ្ញា សូដា នីតា ជាដើម។មាស សុខសោភា មានមូលនិធិរបស់កញ្ញាឈ្មោះថា “មូលនិធិបេះដូង មាស សុខសោភា” ដោយធ្លាប់បរិច្ចាគថវិកា ខ្ទង់ពាន់ដុល្លារជួយជនរងគ្រោះដោយទឹកជំនន់នៅខេត្តព្រៃវែងកន្លងមក។
ដោយឡែកកញ្ញា សូដា នីតា ក៏លេចធ្លោណាស់ដែរក្នុងការងារសប្បុរសនេះ ក្នុងនោះដោយចាប់ដៃជាមួយក្រុម “ប្រហុកខ្មែរ” កញ្ញា បានចុះជួយប្រជាពលរដ្ឋខ្មែរ និងសិល្បករជួបការលំបាកជាច្រើននាក់ដែរ ដោយទទួលបានការគាំទ្រជាច្រើនទៀត។
ជាសរុប ទាំងឱក សុគន្ធកញ្ញា ពេជ្រ សោភា និងតារាខ្មែរពីរនាក់ទៀត លើការងារសប្បុរស គ្រាន់តែមានរបៀបធ្វើការខុសគ្នាតែប៉ុណ្ណោះ ប៉ុន្តែមានទិសដៅជួយពលរដ្ឋរួមជាតិដូចគ្នា៕
ដូច្នេះ តើប្រិយមិត្ត យល់យ៉ាងណាពីសំណព្វចិត្ត ហើយមានអ្វីលើកទឹកចិត្តពួកគេ?
អត្ថបទ៖ ទារិកា
Loading...
Post a Comment