លោក អ៊ុក រ៉ា​ប៊ុន មិន​ទាន់​​ឆ្លើយ​បំ​ភ្លឺ​​ទាក់​ទិន​​ការ​កាប់​​ បំ​ផ្លាញ​​ព្រៃ​ឈើ​​ខុស​​គោល​ការណ៍ ដោយ​​ជ្រក​​ក្រោម​​គ​ម្រោង​​​ស្តារ​អាង វា​រី​​​អគ្គិ​ស​​នី​​រ​បស់​​​ឧក​​ញ៉ា គិត ម៉េង​

11/24/2013 08:02:00 AM

រាជធានីភ្នំពេញ៖រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីបានចេញលិខិតទៅរដ្ឋមន្ត្រីក្រសួងកសិកម្មរុក្ខាប្រមាញ់

រាជធានីភ្នំពេញ ៖ រដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី បានចេញលិខិត ទៅរដ្ឋមន្ត្រីក្រសួង កសិកម្ម រុក្ខាប្រមាញ់ និងនេសាទ ឲ្យបំភ្លឺចំពោះការអនុវត្តសេចក្តីជូនដំណឹង របស់រាជរដ្ឋាភិបាល ស្តីពីការផ្អាកសកម្មភាព ប្រមូលផល អនុផលព្រៃឈើរបស់ក្រុមហ៊ុន Ang & Associates Lawyers Co.,Ltd ដែលកាប់ឈើ នៅក្នុងអាងស្តុកទឹក នៃគម្រោងវារីអគ្គិសនី សេសានក្រោម ២ នៅខណៈដែលសំណង់វារីអគ្គិសនី មិនទាន់ចាប់ដំណើរការសាងសង់ បន្ទាប់ពីមានសេចក្តីរាយការណ៍ថា សកម្មភាពកាប់បំផ្លាញព្រៃឈើ នៅក្នុងតំបន់នោះ និងការប្រមូលទិញឈើ ពីតំបន់ខាងក្រៅបានកើតឡើង យ៉ាងពេញបន្ទុក។

នៅក្នុងលិខិតដែល ចុះហត្ថលេខាដោយ លោក ប៊ុន អ៊ុយ រដ្ឋលេខាធិការ ទីស្តីការគណៈរដ្ឋមន្ត្រី កាលពីថ្ងៃទី១៣ ខែវិច្ឆិកា បានសរសេរថា ឧបនាយករដ្ឋមន្ត្រី រដ្ឋមន្ត្រីទទួលបន្ទុក ទីស្តីការគណៈរដ្ឋមន្ត្រី ជម្រាមជូនឯកឧត្តម រដ្ឋមន្ត្រីក្រសួង កសិកម្ម ស្តីពីករណីរបាយការណ៍ វឌ្ឍនភាពលើការអនុវត្ត សេចក្តីជូនដំណឹង របស់រាជរដ្ឋាភិបាល ស្តីពីការផ្អាកសកម្មភាព ប្រមូលផល អនុផលព្រៃឈើ របស់ក្រុមហ៊ុន Ang & Associates Lawyers Co.,Ltd ដែលកាប់ឈើនៅក្នុង អាងស្តុកទឹកនៃគម្រោងវារីអគ្គិសនី សេសានក្រោម ២ មេត្តាជ្រាបថា មិនត្រូវឲ្យមានការប្រមូល ទិញឈើពីប្រភពខាងក្រៅ តំបន់អនុញ្ញាតឲ្យ ធ្វើអាជីវកម្មរបស់ខ្លួនឡើយ ពីព្រោះការប្រមូលទិញបែបនេះ និងក្លាយជាទីផ្សារមួយដែលលើកទឹកចិត្ត ឲ្យមានការកាប់ឈើ ដោយអនាធិបតេយ្យ។

នៅក្នុងលិខិតបានឲ្យដឹងទៀតថា សុំពិនិត្យឡើងវិញ ដែលតាមធម្មតា ក្នុងការសាងសង់ទំនប់វារីអគ្គិសនីមុនៗ គឺកំណត់តំបន់ដែលត្រូវលិច មុនពេលដាក់ឲ្យដេញថ្លៃ ដើម្បីកាប់ឈើនិងសម្អាតអាង សំណង់វារីអគ្គិសនី កសាងបានមួយចំនួនហើយ ទើបចាប់ផ្តើមកាប់ឈើ និងធ្វើការសម្អាតអាងជាក្រោយ។ ក្នុងលិខិតរបស់ ទីស្តីការគណៈរដ្ឋមន្ត្រី បានបញ្ជាក់ដោយចោទសួរថា លើកនេះការអនុវត្តខុសពីធម្មតា ទាំងបីចំណុច ជាពិសេសចំណុច ទី១ និង ទី៣ មិនទាន់កំណត់ទីតាំង និងមិនទាន់បានសាងសង់ បែរជានាំគ្នាកាប់ឈើ តើមកពីមូលហេតុអ្វី?

យ៉ាងណាក៏ដោយតាំងពី ថ្ងៃចេញលិខិតនោះមក លោក អ៊ុក រ៉ាប៊ុន រដ្ឋមន្ត្រីក្រសួង កសិកម្ម រុក្ខាប្រម៉ាញ់ និងនេសាទ ពុំទាន់មានការឆ្លើយតបនៅឡើយទេ។ សូមរំលឹកថា កាលពីថ្ងៃទី២ ខែវិច្ឆិកា ឆ្នាំ២០១៣ លោកនាយករដ្ឋមន្ត្រី ហ៊ុន សែន បានចុះហត្ថលេខា ស្តីពីការផ្អាកសកម្មភាព ប្រមូលផល អនុផលព្រៃឈើរបស់ក្រុមហ៊ុន Ang & Associates Lawyers Co.,Ltd ដែលកាប់ឈើ នៅក្នុងអាងស្តុកទឹក នៃគម្រោងវារីអគ្គិសនី សេសានក្រោម ២ ហើយនៅថ្ងៃទី២២ ខែកុម្ភៈ ឆ្នាំ២០១៣ លោកនាយករដ្ឋមន្ត្រី ក៏បានចុះហត្ថលេខា លើបទបញ្ជា ០២ បប ស្តីពីវិធានការបង្ការទប់ស្កាត់ និងបង្ក្រាបការកាប់ការដឹកជញ្ជូន ការប្រមូលការស្តុកទុក និងការនាំឈើគ្រញូងចេញផងដែរ។

ប្រជាពលរដ្ឋជាច្រើន កំពុងតែឆ្ងល់ចំពោះក្រុមហ៊ុននោះថា តើគេប្រមូលយកតែឈើល្អៗ ទោះលក់ដូរ ដើម្បីយកលុយមកវិនិយោគ តាមក្រោយឬ? ពីព្រោះក្រុមហ៊ុននោះ ពុំបានធ្វើអ្វីទាំងអស់ ក្រៅពីកាប់ឈើ។ ក្រុមហ៊ុន Hydrolancang International Energy ដែលជាសាខាមួយរបស់ក្រុមហ៊ុនចិនឈ្មោះ Huaneng ដែលជាកម្មសិទ្ធិ របស់រដ្ឋបានចុះអនុស្សរណៈ នៃការយោគយល់គ្នា ជាមួយក្រុមហ៊ុន Royal Group របស់លោក គិត ម៉េង កាលពីថ្ងៃទី២៦ ខែវិច្ឆិកា ឆ្នាំ ២០១២ សម្រាប់ការផ្តល់ហិរញ្ញវត្ថុ រយៈពេលពីរឆ្នាំ ចូលមកក្នុងគម្រោង ទំនប់វារីអគ្គិសនីនេះ។

នៅក្រោមរូបភាពនៃការ កាប់បំផ្លាញព្រៃឈើ យ៉ាងអនាធិបតេយ្យ ដែលមានឧកញ៉ា លឹម ប៊ុណ្ណា ហៅខ្នា និងមានឈ្មោះ សាន ចយ ជាមេការ បានធ្វើឲ្យប៉ះពាល់ដល់មុខមាត់ ឧកញ៉ា គិតម៉េង ហើយក្រុមហ៊ុន Ang & Associates ត្រូវបានរាយការណ៍ថា បានចុះកិច្ចព្រមព្រៀង វិនិយោគរួមគ្នាជាមួយលោក សុខ វណ្ណា ដែលជាបងប្អូនប្រុសលោក សុខ គង់ ដើម្បីឈូសឆាយតំបន់បាតអាង ដែលមានទំហំដល់ទៅ ៣៦.០០០ ហិកតា ជាការរៀបចំសម្រាប់គម្រោង ទំនប់វារីអគ្គិសនី ដែលមានទឹកប្រាក់ ៨១៦ លានដុល្លារ៕